NUG Ramdang Vuanci le US Tlangsuak Upa An Tongaw

American ih thleng NUG cozah in ramdang vuanci Daw Zin Mar Aung le US tlangsuak upa hotu cu may 17 ah bulpak in an tongaw ih, thureltlangnak an nei.

American tlangsuak upa hotu McConnell cu Daw Aung San Suh Kyi thawn nel aw zet an si ih, Myanmar ram Democracy an ngah theinak dingah kum tampi sung theitawk in rak buaipi rerotu khal a si.

NUG palai le American tlangsuak upa an tonawk thu ah NUG cun “Myanmar ram buainak , ralhrang pawlih cangvaihnak rapthlak, Ziangtin Myanmar in Federal Democracy a ngah thei ding,Myanmar mipi in ziangtin ralhrang uknak an do tivek pawl relnak an nei ih, American in ziangtin Myanmar mipi le dothlengnak pawlkom pawl caksin in a bawm thei ding tivek pawl relnak an nei a si,” tin thu an suah.

NUG cozah in ramdang vuanci Daw Zin Mar Aung cu US ih um rero lai a si bangin, US ramdang vuanci hotu sang thawn khalin an kawm aw zo ih, tu ah tlangsuak upa thawn an kawm aw bet. US a um sungah US cozah hruaitu pawl thawn be aw vivo ding a si ih, US cun a himnak hrang mawtaw an tawlrel sak tlunah an kil ringring.