Nupa Thattu PDF In Mipi Ngaithiam An Dil

Kalay Ah Zinkil Palik An Kap That – Sagaing ramthen Kalaymyo Thazin veng ah zinkil palik pakhat cu August 24, zinglam nazi 7 hrawngah an kap that.

Zinkil palik cu Palik zung kotah thil a lei ih, a suah zawngah bochuk lamzin lam ihsin ra mawtaw sungih to cun lamzin sir ih palik thil lei theh a kap ih, a hmunah a thi cih. Palik kaptu pawl cu mawtaw in a tlan cih.

Palik zung ahcun August 23 in ralhrang ralkap le palik pawlin lamzin sukso vak pawl nasaten an cek ih, bike number nei lo cu sumpai tam tuktuk an cawh.

August 24 zanlam nazi 5 hrawng khalah Kalaymyo Tahan veng bochuk lamzin AG biakinn kiang Letpanchuang fehnak lamzin ah bomb vei hnih a puak ih, Pi Za Nei Thluai ( kum 53 ) a thi. Hanghnah hangrah zuar pakhat khal a lu ah hriamhma naa zet a ngah. Tuih bomb puaknak hmunah zinglam ah bomb puak hrih lo pakhat an rak sar zo tin a kiangih um pawl cun an sim.

Ralhrang In A Bur In Chin Tleirawl An Sualpi – Chin ramkulh Tedim peng Haimual khuathar cu August 14 ah ralhrang ralkap in an rak luhcilh ih, khua sungin inn 16 an urkang hnuah unau hnihte an kai.

Ralhrang in an kaihmi unau hnihte cu Lal Nun Puii ( kum 17 ) le Lal Ruat Mawia ( kum 15 ) tei unau an si. Ralhrang in unau hnihte an kaih hnuah an thahmi ruang cu ralhrang pawl um nawn lo hnu August 16 zingah khua mipi pawl cun khuapawn ah an hmu. Unau hnihte ih ruang cu mithiam pawl zohter an si ih, a usawn Lal Nun Puii cu ralhrang in a bur in an sualpi hnuah an that timi an fiah.

Khuami pakhat cun “An taksa hrekkhat lawng an phumih, an taksa dang a lang tikah khua pan ih kan tlunnak lamzin ah an ruang kan hmu cih. Nauta sawn cu a pum le hmai a dup thluh ih, a kor hmailam nam in an at thlek. An vel thatin a lang. A unu sawn cu a lu ah meithal in an kap ih, khatlam ah a tlang thei.

“Kan rinhlelh ruangah mithiam pawl kan cekter ih, a zahmawh ah an sualpinak hriamhma pawl a um. Mithiam pawl ih an zohfel dan vek asile mi tampi in an sualpinak hriamhma a um a si,” tin a sim.

Ralhrang ralkap cun 2021 ,November thla khalah Tedim peng Aklui khua ih nupi pahnih an rak sualpi zo. Hminsin tuahtu pawl ih hminsin dan vek asile ralhrang in rampi thuneihnak an lak hnuah nunau 37 an sual zo tin an tarlang.

Nupa Thattu PDF In Ngaithiam An Dil – August 23 zingah Mandalay PDF Tiger Force cun Mandalay laminpi ih feh bikebih nupa phur aw an kap that ih, an thah tummi a rak silo ruangah mipi le siattong innsang hnenah Tiger Force Mandalay cun ngaithiam an dil.

Tiher Force Mandalay cun “Mipi le siattong parah nan ngaidamnak kan lo dil. Upat tihzahmi mipi nan zaten August 23, zinglam nazi 8:40 hrawngah mandalay lamzin ih kan thianfaimi cu dalan an rak silo ih, Hotel hnatuan nupa an si tin’ thu felfai kan thei zo. Kannih cu ralhrang in rampi thuneihnak an lakmi pom thei lo ruangah ralhrang doin Mandalay khawpi sungah thupte cangvai pawlkom kan si.

“Thuhla kan don vek asile CID palik bawi Soe Ko Ko cu Mandalay ah thupten hna a ttuan tin’ kan thei ih, kan sungtel zingzoitu pawl cun a bike number , inn a tlun caan le a kor hruh theumi pawl tiang in pe. Asinan, zingzoitu pawl tlaksamnak ruangah kan tum lopi in nupa sawn kan kap that ngah ih, poi kan tituk lawlaw. Kan thah ngahmi cu Hotel hnatuan nupa men an rak si.

“Thuhla kan theih dan vek asile Hotel hnatuan nupa kiang ahcun CID palik bawi khal a rak um ve ih, thilthleng cu a rak zoh thup ve. Tu ahcun CID palik pawl cu a sungte pawl khalin an pehtlaih thei nawn lo ih,khawitawk a thleng timi cu theitawk in kan zingzoi rero lai. Khatlam ah kanmai tlaksamnak ruangah tum lopi’n kan cangsualnak ah ziangvek dohlengnak khalin mawh an phur lo dingih,kanmah rori’n mawh kan phur ding.

“A tuartu innsang le mipi nan zaten thinlung takin in ngaidam dingah zagnfah kan lo dil. Kan thilsual tuahmi ruangah nikhat khat ahcun kan tuar rori ding tikhal thu kan lo tiam duh a si,” tin’ thu an suah.

Mandalay PDF pawlih kah thatmi Ko Sithu Ko Ko le a nupi Hnin Win Win cun fanute an nei ih, an fanu te cu a nupa vuinak ah supaw thei loin a tap rero hmuh tikah zangfah a um lawlaw. Tu ihsin a nulepa a hmu nawn lo dingih nupa tel loin leitlun caan hmang thlang ding a si.

Ralhrang 13 An Thi Ih, PDF 6 An Thi – Makui ramthen Maing myone, Tadwat khua kiangah ralhrang ralkap le mipi ralkap pawl ni 2 peh in an doaw ih , doawknak ah ralhrang 13 an thi tin’ God Of Myaing PDF cun thu an suah.

God Of Myaing People‚Äôs Defence Force cun “August 20, zinglam nazi 3 hrawngah pauk myone ih ralhrang pawl cu helicopter pahnih in an phur ih, Maing myone ah an tthum. Ralhrang mipum 100 hrawng an si ih, mipi inn an urkang tlunah mipi thilri duhtawk in an laksak.

“August 22 zanlam nazi 4 hrawngah kannih God Of Mayng PDF, Pale PDF, Myaing Hero le 7Star komkhawm pawlin ralhrang ralkap kan do ih, minute 30 sung hrawng doawknak ah ralhrang 8 an thi. August 23 ah ralhrang pawl cun Tadwat khua an urkang ih, khua in an suah zawngah kannih mipi ralkap komkhawm cun kan rak kap. Zinglam nazi 10:45 tiang kan do aw ih, kan doawk caan cu nazi 2 sung a rei. Doawknak ah ralhrang 5 an thi ih, kannih lamin miraltha 6 cun ram le miphun hrang an nunnak an hlan ih, hriamhma ngah 7 kan um a si,” tin thu an suah.

Thailand PM An Cawlter – A caan cem hnu hkalah ih cawlh tumnak nei lo Thailand Prime Minister Chan O Cha cu Thailand hrampi thuthennak zung cun a hna in cawlhternak ca an suah.

Thailand mipi le dotu party pawl cun Prime Minister Chan O Cha cu a hna in cawlh an phur rero nan, a cawlh duh lo ruangah Court ah zual an ko ih, tu ahcun Court in cawl dingin thu a suah. Thailand daan ah Prime minister in kum 8 tiang lawng a hna a kai thei timi a um. Prime Minister Chan O Cha cun ralkap a sinak hmang tangkai in 2014 ah thuneihnak a rak la ih, Prime minister ah a ret aw.

2019 Thailand rampi hrilawknak ahcun party in a tel ve ih, a caan hnihnak hrang Thailand Prime Minister ah a tling bet. Tu ahcun a caan a cem zo ruangah court in a hna ihsin cawl dingin thu a suah zo ih, a aiawh ah tuawlrel cih ding a si thlang.

Be the first to comment

Leave a Reply

Your email address will not be published.


*