Kalay KTV Ah Ralhrang 3 An Kai – Sagaing ramthen Kalaymyo Taungzalat vengih BMB KTV dawr ah ralhrang 3 pawl nuam an tawl ih,cumi laifang ah Kalay PDF pawlin an va kai tin mipi an theihter.
Kalay mipi palik pawlih kaihmi ralhrang pathum pawl cu ralhrang bank ih manager tuan ralhrang Htun Htun Naing, Khant Zaw le Min Zaw Oo pawl an si. Kaihmi pawl cu Kalay PDF in hmundang ih an hruai laiah an lakin pakhat ralhrang Zaw Oo timi cu tlansuah a tum ruangah an kap that lawlaw.
Kalay PDF sungtel cun “Khawpi sungih cangvaihnak a si tikah kan kaih hnuin zamrangten kan suak cih. Khua sungih lut PDF le Kalay mipi palik pawl cu an him thluh. Kaihmi lakin pakhat tlan a tum ruangah an thianfai lawlaw ih a dang pahnih cu NUG daan vekin kan kol tha hrih ih, daan vekin an tlun thu relcat a si ding,” tin a sim.
Mizoram Ah Myanmar Kuva Rah Phur Mawtaw 6 An Urkang – India ram, Mizoram State Zawl Nuam khua kiang lamzin ah Myanmar kuva rah phur mawtaw 6 le an phurhmi thilri pawl cu mipi in an kai ih, an urkang.
Mizoram ah daan loin Myanmar kuva rah a lut ringring ih,lut nawn loin nasaten an kil. December 10 khalah Aizawl in Zawl Nuam lam pan Myanmar kuva rah phur mawtaw 6 pawl cu Zawl Nuam khua thlen hlan lamzinpi pawl Zawl Nuam khua mino pawlin an rak bawh. Zinglam nazi 3 hrawngah Myanmar kuva rah phur mawtaw 6 pawl cu Zawl Nuam khua mino pawlin an rak kham ih an mawtaw le an phurmi kuva rah pawl cu lamzin zirah an urkang sak thluh. Mawtaw mawng pawl cu an tlan thluh man.
Mizoram ahcun daan vekin Myanmar kuva rah a lut thei nan, daan vekin siah pek ding a tam tukih a hlawk lo. Curuangah thupten Myanmar kuva rah cu Mizoram lamah phurh luh ringring a si ih, kuva rah lakah thildang ritheihsi tivek an phur tel cun buainak a sosang deuhdeuh.
Mizoram ih kuva cing pawl cun Myanmar lamin kuva rah lut nawn lo dingin theitawk an zuam ding thu le duty an ret ringring thu an sim.
Kuva rah lawng siloin a tufang Myanmar ih vok hna ruangah Myanmar in Mizoram lamih caw tawl pawl khal kham an si. Voknat hrik cu caw pawlin an kai thei ih cumi ruangah Myanmar in Mizoram ah caw tawl a ngah nawn lo tin Champhai penguk cun thu an suah.
TNLA Le Ralhrang Ni 5 Sung An Doaw Thlang – Shan ramkulh Nansan myone kungtar khua kiangkap ah ralhrang ralkap le TNLA pawl an do aw peh ih, ni 5 sung an do aw thlang.
Ralhrang ralkap le TNLA hi December 7 in an do aw thokih, December 11 tiang cawl loin an do aw peh hrih. Doawknak ralhrang pawl cun raldonak vanzam tiang an hmang rero zo.
Raltlan buaipitu cun “TNLA le ralhrang doawknak ruangah doawknak kiangkap ih khua 5 pawl cu khua ah um ngam loin an tlan thluh. Thenkhat cu Nansan khua ih tlan an um bangin thenkhat cu Lashio , Kyaukme le Mandalay tiangih tlan khal an um. Tu khalah doawknak a sosang tuk lai. Ralhrang lamin raldonak vanzam an hman rero tlunah Helicopter khalin ralhrang an ret bet rero. Nansan khawpi ih um khalin ralthuampi puak awn kan thei ban ringring. Hramlak ih raltlan khal an um ih ziangkim ah bomnak tul hlir an si,” tin a sim.
TNLA ralbawi cun “December 7 in ralhrang thawn kan doaw thokih, tuini tiang kan kap aw. Ralhrang pawl cun raldonak vanzam an hman rero tlunah Helicopter khalin ralhrang dang le ralthuam phunphun an ret bet rero. Kan doawknak hmun cu Nansan myone Kungtar khua ah a si. Tuhrih ahcun doawknak ih thi le hriamhma ngah tivek felfai in kan phuang thei hrih lo, ziangahtile doaw rero lai kan si.
“Kungtar khua sungah TNLA ralkap pawl an um cia ih, ralhrang in an milesa an va ret tikah kan kapaw siko. Anmah ralhrang pawl an rat ruangah doaw kan si ih, remawknak lam cu a um hrih lo. Kan unau thum TNLA , MNDAA le AA pawl thawn a rualin kan do lawlaw pei maw tikhal felfai in kan rel thei hrih lo a si,” tin a sim.
Ralhrang ralkap cun MNDAA le TNLA in PDF pawl ralthuam an pe tin TNLA le MNDAA umnak pawl an pan ih cumi ruangah doaw rero an si.
European Parliament In Myanmar Cozah Ah NUG An Pom – European Parliament cun Myanmar cozah dinhmun ah NUG cozah in pomfel zo tin NUG vuanci U Aung Myo Min cun mipi a simthei.
European Parliament cun Belgium ih an tuahmi thurelkhawmnak ah Myanmar aiawh in NUG palai U Aung Myo Min an sawm ve. Cumi ahcun U Aung Myo Min khal a feh ve ih, tonkhawmawknak hmunih a feh hnuah U Aung Myo Min cun European Parliament ah NUG cu Myanmar cozah ih an pom thu a rel.
U Aung Myo Min cun “European Parliament ahcun Myanmar cozah ah NUG in pom fel zo. Tonkhawmawknak ah ka fehih thurelnak khal ka nei. Cumi ahcun ralhrang pawl hremnak pe sinsin dingin le Myanmar mipi pawl bawm rero dingin ka sim hai. ASEAN in ralhrang remnak 5 an tuahpi nan, ralhrang lamin pitlin sakmi an neih lo tikah cu hnakih hmuar nei in ralhrang pawl hremnak pek an tul. Myanmar buainak hi ASEAN lawngih tifel theih a silo. European Parliament parah ka lungawi ngaingai a si,” tin a sim.
One Championship Ah Aungla Nsang Puai A Um – Myanmar in leitlun champion kan neihsun Aungla Nsang khal One Championship kulhsungah mi a sual sal dingih a misual caan cu 2023, January 13 ah a si ding ti’n amah Aungla cun mipi theihternak a nei zo.
Aungla ih sual dingmi hi Chinese misualthiam Fan Rong a si ih, tu ah kum 29 ih umpa, pi 6 ih sang a si. MMA ah mi 22 a sual zo ih, mi 19 neh thei in puai 3 a rak duai. One Championship ahcun puai 4 lawng a lek lai. One Champioship a puai hmaisabik 2019 kum ah Ridder cun round khatnak cem hlanah a rak neh. One Championship ih a puai hnihnak le puai thumnak ah nehnak a co thei nan, One Championship ih a puai linak ah Bigdash cun round thumnak ah a rak neh. Mi a nehnak puai pawl zoh tikah mithong hnakin mibuan thlukih le rek betih a nehmi an tam.
Aung La Nsang cu kan theih zet zo bangin One Championship rihnak hmun 2 ah rak champion veve thei a si ih, tu ahcun champion taikhap kolmi a neih nawn lo ruangah Champion sal dingin zuamsal rerotu pakhat a si. Tu ah Aungla hi kum 37 a kim zo ih,pi 6 le zungpi bok pakhat ih sang a si.
MMA ah mi 42 a sual zo ih, puai 28 ah nehnak coin puai 13 a rak sung. Aungla cun mithong le sit in nehnak a rak co tambik. One Championship a puai netabik ah Japan misualthiam Okami a neh nan,a hlan puai ah Bigdash le Ridder rak neh lotu a si ve. An puai hi taikhap cuhawknak a silo nan, taikhap cuh thei dingin an hrang nehnak co ding a thupi tuk veve. Aungla in nehnak a co thei asile neta ahcun Widdleweight champion taikhap lole Light Heavyweight Champion taikhap a cuh thei dingah beisei a si. Curuangah Aungla hrang nehnak co ding a thupi ngaingai in a lang.
Portugal Le England In World Cup An Mangtha – 2022 FIFA World Cup quarter final puai pawl cu December 10 le 11 zingah lek peh a si ih, Portugal le England cun an domi neh loin World Cup an suahsan fel.
Portugal cun tuitum World Cup ih cangtha zet Africa team Morocco an do ih, Morocco in 1-0 in nehnak an co.
Portugal Coach Santos cun Captain C.Ronaldo cu puai thok veten a luter lo ih, kan dung Switzerland puai ih goal 3 thuntu Ramos sawn a lut hmaisa. Caan hrek hmaisa sawn ah an duhtawk aw zetih khatlam khatlam in sit goal theinak caantha an nei. Minute 42 ah Morocco lamin an sit goal ih goal dang lut bet nawn loin cawlh an hmang.
Caan hrek neta sawn an thok ih Portugal lam nasaten țan an suah. Minute 51 ah Portugal Captain C.Ronaldo khal a lut ve ih, Portugal in nasaten Morocco lam an nor tluan. Morocco lam cun sit goal bet hnakin goal 1 an neihmi kilhim an tumsawm. Portugal in an nor zetih Felix, Fernandez le C.Ronaldo pawlin tha zetin khawl an sut nan, Morocco kawlkil in a rak khamsak thluh thei. Minute 90 hnuah Morocco lam pakhat Redcard a ngah ih, Portugal in an nor tuk luanah Morocco lamin sit goal theinak caan remcang thatuk an nei nan, kawlkil lawng um zo ah Morocco lamin an sit goal bet lo. Cutin goal dang lut bet loin caan a cem ih Morocco cun nehnak an co. Nehnak co Morocco in 2022 FIFA World Cup Semi final an lut ih, Portugal in World Cup an suahsan ve.
Morocco an neh lo hnuah Portugal Captain C.Ronaldo cun mitthli thawn Bualrawn a suahsan. Tu ah C.Ronaldo hi kum 37 a kim felzo ih, a hrang World Cup netabik a si thlang dingin a lang. Amah C.Ronaldo cun ram hrang bawhlung sit a cawlhsan thu a phuang hrih lo ih, 2026 FIFA World Cup ahcun kum 41 a kim thlang ding. Cutikah a lek thei asikhalle Coach in a ko lo khal a si thei. Curuangah tuitum cu C.Ronaldo hrang World Cup netabik dingah mi tamsawn ruah a si. C.Ronaldo hi World Cup vei 5 a lek zo nan, World Cup ah a champion hrih lo. Club zuamawknak ah laksawng cawi ding hmuahhmuah a cawi thluh zo ih, bulpak laksawng khal tampi a ngah zo. Asinan, World Cup cawi loin bawhlung sit a cawlhsan a tul thlang ding. Cumi ruangah C.Ronaldo cun Morocco an neh lo hnuah mitthli thawn bualrawn a suahsan.
Portugal Coach Fernando Santos cun “C.Ronaldo lut hngalter loin țhelhbawh ih ka toter hmaisat ruangah sirawknak ka nei lo. A țul kan ti caan ah kan lutter ih sirawknak a um lo.
“Kei cun Referee ruangah kan duai tin ka ruat lo. Curuangah referee mawhthluk thei kan silo ih, kanmah sawn nasa deuh in țan rak suahsawn ding kan si. Player țhenkhat in referee an soisel nan, kei cun ka pompi lo a si,” a ti.
December 11 zing khalah 2022 FIFA World Cup quarter final puai netabik ah France le England an lek ih, France cun 2-1 in nehnak an co.
Caan hrek hmaisa sawn minute 17 ah France lamin an sit goal ih, goal dang lut loin cawlh an hmang. Caan hrek neta sawn minute 54 ah England in penalty an ngah ih, England Captain Harry Kane cun a sit goal. Minute 78 ah France hrang Giroud in a sawh goal ih France cun 2-1 in hmai an hruai. Minute 84 ah England in penalty a ngah nan, Captain Harry Kane cun a sit goal lo ih, 2-1 cun caan a cem.
Nehnak co France le Morocco in December 15, Myanmar caan zinglam nazi 1:30am Semi final an lek dingih,khatlam Semi final hrang December 14 zinglam nazi 1:30am ah Croatia le Argentina an lek ve ding.
Leave a Reply