Aungla Mi A Sual Sal Ding – One Championship ih Champion taikhap pahnih rak ngah zo Aungla Nsang cun One Championship ah mi a sual sal dingih, a sual dingmi cu Japan misualthiam OKami a si.
An sual ding caan cu 2022, November 19, Singapore caan zanlam nazi 6:30 ah puai thok ding an si. Aung La Le Okami cu vei tamtuk Online in rak ngiar aw rero zo an si ih, tuitum ahcun a takin kulhsung ah an sual aw thlang ding.
Aung La Nsang sawn hi One Championship ah Middleweight Champion taikhap le Lightheavyweight Champion taikhap rak la zo a si. 2020 kum ah Aungla ih Middleweight Champion taikhap cu Netherlands misualthiam Ridder in a rak laksak thei ih, 2021 khalah Ridder cun Aungla ih kolmi Lightheavyweight Champion taikhap khal a laksak bet.
Cumi hnu cun Aungla in One Championship ah taikhap a lasal thei nawn lo ih, Champion lai Ridder khal vei 2 a duai hnuin a sualsal nawn lo. Aung La cun Ridder a neh lo hnuah Ataides a neh nan, Bigdash a neh lo ih, Champion taikhap cuh thei hrih loin a um.
Okami hi MMA ah mi 51 sual zo a si ih, champion taikhap a cawi hrih lo nan, MMA ah tonteh nei zet pakhat a si ve. Tu ah kum 41 a si zo ih, pi 6 le zungpi 2 in a sang. Aung La hi tu ah kum 37 a si ih, pi 6 le zungpi pakhat in a sang. Himi zohmen cun Aung La in Okami cu a neh dingah ruah a si hrih. Tuitum an sualawknak cu taikhap cuhawk a silo ih, taikhap cuh thei dingin dinhmun pe theitu sualawknak men a si.
KNU An Hril Aw Ding – Kum 4 veikhat hril aw ringring KNU cu covid 19 natnak ruangah kum 2 sung hril aw thei loin an um ih, kum 4 veikhat an hrilawk ding caan khal kum 2 rori a luan thlang. Curuangah tuikum 2022 kum sung rori ah hrilawknak neih a tum thu an sim.
KNU thuphuangtu Pado Saw Tawni cun “Kum 4 veikhat hril aw ding timi daan kan nei ih, buainak le remcanlonak a um pang asile kum 2 sung cu kan tthawn bet thei. Asinan, ziangvek asikhalle kum 2 tlun cu kan tthawn thei nawn lo. 2022 a cem cun kum 2 tthawn theihmi khal a cem ding ruangah 2022 kum sung rori ah kan hrilawk a tul ding. Tuhrih ahcun a ni khal kan rel thei hrih lo ih, hrilawk tengteng cu kan tum thlang a si,” tin a sim.
KNU in hrilawknak an nei asile District 7 le tatmaha 7 in hruaitu pawl an feh thluh ding. Tui dinhmun ah KNU hmunram tinkim ah doawknak a um ih, hivek dinhmun ah hrilawknak tuah ding timi cu an hrang a buaithlak ve zet ding.
Tu ih KNU hotu bik Saw Moetoe Sipho cun ttum hrih hotu sinak a pe zo ih, sungtuan cu Padosaw Tardomoe a si. Hrilawknak hrang tonawknak an neih tikah an hril aw men lo ih, an daan , feh tumdan le hmailam kekar tumdan tivek tiang cipciar zetin zohtlang thluh an si.
Lal Vivo Tum China President – China ram thuneitu Communist party cun kum 5 veikhat hrilawknak an neih theumi cu 2022 kum hrang October 16 in meeting an thokih, October 23 tiang meeting nei ding an si.
China dan ah president caan ttum 2 tlun tuan a theih lo tin a rak um nan, 2018 kum ah China president Xi Jinping cun caan 2 tlun khal President tuan a theih tin a rak thleng. Curuangah China ram president tuan peh rori tum Xi Jinping khal Communist party hrilakwnak ah a cuh bet hrih ih, nehnak a co peh rori zum a si.
Tu ah meeting nei rero lai an si ruangah thufel cu a um hrih lo. Asinan, Kum dang sung Xi Jinping a lalsal ding tin thuhla a suak tampi zo. Caan khat president hrang kum 5 caan pek a si ih, Xi Jinping in caan 2 president a tuan zo ruangah kum 10 sung China a rak uk zo.
Tuitum ah caankhat hrang nehnak a co bet asile kum 5 dang China president a tuan peh hrih ding. China mipi thenkhat cun an president an rak ningtuk thlangih, an president duhlonak catar tivek khal an um. Asinan, cozah hnuai ih um China thuthang pawl cun president duhlonak tivek cu an tarlang duh lo. Xi Jinping in China president a tuan peh hmel tuk zo ruangah buainak luarkai sawn a tuah thlang men ding titu khal an um.
Leave a Reply