Tial Thang In Misual Sal Ding – Chinmi dinhmun in One Championship ih lut hmaisabik Salai Tial Thang cun One Championship ah mi a sualsal ding. Tuitum ah Tial Thang ih sual dingmi Philippines mi Pacatiw a si. Tial Thang le Pacatiw cu December 3, Philippines caan zanlam nazi 6:30 ah sual aw ding an si.
Kum 28 mi Tial Thang cun 2019 kum ah One Championship ih a puai hmasabiknak hrang Rin Saroth a rak neh ih, 2019 kum thotho ah Woon Kim a neh bet. A dinhmun tha vivo in 2021 ah Lumihi a neh bet nan, 2021 kum thotho ah Jong Song a neh lo. Cumi hnu 2022 February tyhla ah Sunoto thawn an sual aw nan,Tial Thang a fawl tin puai an rak cemter. Cumi hnu tuitum ah Tial Thang in mi a sualsal ding.
Kum 26 mi Jeremy Pacatiw cu One Championship ah mi 15 a sual zo ih, cumi sungah vei 10 nehnak co in vei 5 a duai. 2022, February thla ah mi a rak sual ve ih, Andrade a rak neh lo. Tuitum ah nehnak tul tuk veve an si. An puai hi taikhap cuhawknak asilo dingih,taikhap cuh thei dingin dinhmun tha tuahawknak puai pakhat a si.
Falam,Tedim Le Hakha Ah Leimin – Chin ramkulh sungih ruah sur ruangah Falam le Hakha ah lei a min ih, khualtlawng sukso pawl khal zanriak in lamzin min an hngak phah.
Falam ahcun leimin ruangah inn pakhat malte a khing a um phah ih, inn sungih um pawl cu hmundang ah an tthawn. Hakha khalah ruahsur ruangah lamzin sukso ah leimin a um ve. Leimin ruangah thih phah cu an um lo. Leimin le inn siat cu mipi in theitawk in thianfainak an nei rero cih. Falam le Hakha ahcun leimin lawng siloin meisa Tower a siat ih, October 21 in October 25 tiang mipi in meisa an ngah thei hrih lo tin an sim.
Tedim peng sung khalah ruahsur ruangah lei a min ve ih, leimin ruangah khualtlawng mawtaw pawl an suak thei lo. Thenkhat khualtlawng pawl cu lamzin ih riak khal an um. Tedim le Rihkhawdar karlak ah lamzin siat hmun 3 a um. Cumi ruangah khualtlawng pawl an tang hrih. Kalaymyo khalah Myinttar tiva a thangih, a kiangkap ih lo nei pawl an buaizet. Tilian cun lo ih cinmi thlai le fang pawl a cim thluh.
Myanmar In Mizoram Ih Cawtawl An Kham – Myanmar le India ramri, Myanmar lampang ih caw thenkhat natnak an neih ruangah Mizoram State, Champhai District cun Myanmar in India lamah caw lut an kham hrih.
Sagaing le Chin ramkulh sungih doawknak ruangah raltlan tamzet cun an neihmi caw pawl cu Mizoram le Manipur lamah an zuar rero. Myanmar lamin Mizoram ih lut caw pawl cu a sa a thaw cuang tin mipi in an cuh aw rero. Asinan, tu ahcun ramri ih Myanmar lam caw pawl leihma natnak anneih ruangah caw hrekkhat an thi phah. Sagaing lamin India lamih caw a tawl lutmi khalah nat nei an um. Cumi ruangah Champhai cun Myanmar lamin caw lut ding pawl an kham hrih thu mipi theihternak an nei.
Kalay Ah Company Hrekkhat An Bang – Ralhrang in rampi thuneihnak an lak hnuah thilri man a kai ciamco ih , company tamzet cu an hna peh thei nawn loin an bang phah.
Kalay ih Engineer pakhat cun “A hlan thilri man ih inn kan sakmi pawl cu tuih dinhmun thilri man thawn a kaih nawn lo. Thilri man a kai thluh nan, thutiamnak kan neih zo ruangah inntek lam cu sumpai kan dil bet lo. Thilri man ziangkim a kai tikah kannih hrang hlawknak a um lo ih, kan sung. Cutikah inntek kan simfiang ih hna kan cawlhsan hrih.
“Inntek lamin sumpai in pek bet duh ahcun hna kan peh bet salmi khal a um. Thilri man akai nan, hlawh man a kai cuang lo tikah a buaithlak tuk. Curuangah inntek thawn remawknak kan neih lo ahcun inn tamsawn cu tuan hrih loin kan cawl hrih a si,” tin a sim.
An Sungte Hnen Thlen Loin Mipi Thi Pawl An Vui – Kachin ramkulh Phakhan myone A Nangpa hmun ih ralhrang bomb thlak thatmi mipi thi pawl cu an sungte pawl hgak thei loin hmunkhat te ah an vuiliam thluh.
Ralhrang in KIA, hlasakthiam lar le mipi umkhawmnak hmun bomb an thlakmi ah mipi 80 hrawng an thi tin ruang buaipitu pawl cun an sim ih, hriamhma ngah 100 hrawng an um tin an tarlang. Hriamhma ngah pawl cu hmundang panpi theih an silo ruangah duh vekin tuamhlawmnak sivai a um lo ih, hriamhma ngah lakin thih phah khal an um bet.
Ralhrang ralkap pawl cun Phakan lamzin an phit thluh ih, mipi thi ruang pawl khal an sungte hnen thlenpi theih a silo. An sungte pawl khal mithi umnak hmun a thleng thei lo ih, October 25 zan ahcun mipi thi pawl cu hmunkhat ah vuiliam thluh an si.
Ruang buaipitu cun “Tu ahcun ruang 60 hrawng kan phum hrih, Cucu an hmin le umnak kan theih felmi pawl an si. An sinak kan theih fel hrih lomi pawl cu kan phum ngam hrih lo. Ralhrang in lamzin an phit thluh tikah ruang phurh a theih lo. Cutikah hmunkhat ah vui kan si,” tin a sim.
KIA In Ralhrang An Kap – October 25, zinglam nazi 11 hrawngah Phakan myone Tamah Khan khua kiangah KIA le ralhrang an kap aw. Tuitum cu ralhrang in mipi 80 tlun an thah hnuah KIA le ralhrang an doawk hmaisabik ttum a si.
Khuami pakhat cun “Doawknak thawmvang cu kiangkap mipi zate theihmi a si ih, ralhrang pawl cun ralthuampi tiang an hmang. KIA lamin lamlak ah ralhrang pawl an bawh ih, an rak kap tin kan thei. Doawknak ah ralhrang thi an um tin kan thei nan, a zat cu felfai in theih a si hrih lo.
“A tufang cu Phakan myone sungah ralhrang an khat thluh. Hmun thenkhat ahcun phone line khal an phit. Phkan myone ahcun zan nazi 6 in zinglam nazi 6 tiang zan suah ngah lo thu an suah. Cumi tlunah mi 5 tlun umkhawm a theih lo tin ralhrang lam an aukio. Doawnak picang sawn a um vivo dingin a lang. Ziangahtile, mipi lam khalin ralhrang thungral dingin KIA nortu an tam tuk ve a si,” tin a sim.
AA Hotu In Ralhrang Do Cimit Ding Thu Aupi – Kachin ralkap KIA, Kachin hlasakthiam le mipi pawl umkhawmnak hmun cu ralhrang in raldonak vanzam 3 thawn bomb an thlak tikah mipi 80 kiangkap an thi ih,mithi lakah an ruang hmuh lomi, taksa parh thluh khal an um.
Hivek lawmmam cu Myanmar mipi hrang lawng siloin leitlun mipi hrang khalah thilmak le rapthlak a tling ih, ralhrang cangaih dan cu kilkip in mawhthluk a si. Ramsung ih ralthuamkai siseh ramleng ram tampi khalin ralhrang an mawhthluk ih KIA an tuarpi.
AA hotu Tun Myat Naing cun “Tuitum ih ralhrang pawl cangvaih dan cu ralkap uknak cemral ko do a tulnak langtertu, ralhrang do cimit dingin mipi kaithotu a si,” tin a sim.
AA hotu in thu a suah hlanah tlangpar ralthuamkai unau thum AA, MNDAA le TNLA pawl khalin lungrualten ralhrang do a tul thu, ralhrang donak ah thu bawhcahnak felfai neih a cu tuk zo tin thu an rak suah zo.
Leitlun Palik Meeting Ah Ralhrang Palai Tel – India ram New Delhi khawpi ih tuahmi leitlun palik pawl meeting ah ralhrang palik bawi Zin Min Htet khal a tel ve tin anmah ralhrang cun thu an suah.
Leitlun palik meeting ih tel ve ralhrang palai Zin Min Htet cun Malaysia ram CID palik bawi le Indonesia palik pawl thawn khalin thurel tlangnak an nei. Cumi ahcun ramri ah thupten Malaysia ih lut pawl kaih dan ding tlunah ramdang ih Myanmarmi an kaihmi pawl thlengawk dan ding tivek khal an rel.
Cumi hnuah ralhrang palai Zin Min Htet cun Bangladesh palik bawi a kawm betih ram pahnih tuantlang dan ding, rittheihsi kham dan ding tivek an rel. Ralhrang palai Zin Min Htet cun China palik bawi khal a kawm ih, ramri ah felfai zetih hnatuan dan ding pawl an rel. Ralhrang palai cun Thailand palik bawi le India palik bawi khal a kawm ih, tuantlang dan ding a phunphun an rel tin anmah ralhrang cun thu an suah.
Leave a Reply