Palik le Ralkap An Sual Aw Ciamco

Makui ramthen Makui khawpi ah palik pawl le ralkap pawl an tithiam aw lo ih, kut an thlak aw, an sual aw ciamco. Hivek hnu khalah an bouak karlak a dai thei hrih lo tin an sim.

May 31 ah, vanzam ralkap pakhat palik zungah a feh ih, palik bawi Aung Soe kut a thlak. Curuangah, palik dang pawlin an kai ih, a kut an khihsak. Cumi hnuah vanzam ralkap in ralkap bawi le a kuthnuai pawl cu Makui palik zungah an feh ih, palik pawl thawn an be aw.

An Biakawk fel tikah palik pawl cun ralkap pakhat an kaih, a kut an khihsakmi cu an phelhsal. Cuveten , palik pawl ih kaihmi ralkap pa cu a thinheng tuk ih, an kut an phelhsak veten a hmai ih to palik bawi cu a thong hngal. Cutikah palik sang pawl cun ralkap pa cu an bawr ih, kut an thlak ciamco hnuah an kaisal.

A kiangih um ralkap bawi le ralkap dang pawl cun palik pawl cu an ralkap kutthlak lo dingin an rak simthei. Buainak cu a sosang zetih khatlam khatlam in an lungkim thei hrih lo. Ralkap pakhat palik zungih hro a suan ruangah palik pawl an lungawi thei hrih lo ih, vanzam ralkap pawl khal an ralkap pakhat palik pawlin a bur ih kut an thlak ruangah an lungawi ve lo.

Ralhrang lamin mipi lam thuthup simtu pakhat cun “Buainak cu a sosang deuhdeuh ih, ziangtin thu an relfel vivo ding tikhal rel theih a si hrih lo. Palik pawl khal an lungawi lo ih,ralkap pawl khal an lungawi lo. Ralthuam hmangin doawknak tiang a thleng pang ding phan um ngaingai. Asinan, tlunlam in thuhla an theih zo ruangah, an hotu veve pawl cu an fimkhur zetih, khoh zetin thu an rel ko ding,” tin a sim.

Be the first to comment

Leave a Reply

Your email address will not be published.


*