Makui ramthen Pauk Myone thlanglam Kaile khua ih palik sakhan cu mipi ralkap komkhawm in June 7 zingah an do ih, palik pawl an tlan thluh tikah palik sakhan an nawkkang.
June 7, zinglam nazi 6 hrawngah mipi ralkap komkhawm cun palik sakhan an kap ih, palik lamin an rak kah ve tikah nasa ten an kap aw. Zinglam nazi 8 hrawng ahcun ralhrang Helicopter cun palik pawl a run ih, leihnuai ih um mipi ralkap pawl tlunsang in an kap.
Leihnuai lam khalin palik pawl bawm dingih feh ralhrang an tam tikah kiangkap khua mipi pawl cu khua ah um ngam loin khua an suahsan. Kaile khua , Taraphi khua le tichauk khua cu ralhrang tih ah an tlan thluh.
Khuami pakhat cun “Mipi ralkap komkhawm in palik sakhan an do tikah ralhrang cun Helicopter an hmangih, tlunlam in hnuailam an kap ciamco. Sakhan ih palik pawl cu sakhan suahsan in an tlan thluh ih, khawsung ah lutin inn sung tivek ah an relh. Palik pawl an him lo ruangah ralkap an ko ih, ralkap tamzet cun palik sakhan an pan.
“Cuvek a si tik ahcun mipi ralkap pawl khal dung an sip. Doawknak ih thilthleng cipciar cu kan thei ban ve lo. Asinan, palik pakhat nungdam in an kai. Tu ahcun ralhrang ra pawl khal Taraphi khua an thleng zo. Cumi ruangah mipi cu tlan kan si,” tin a sim.
Leave a Reply