Makui ramthen Yesagyo myone Sinphyusin Lilawn ih palik sakhan cu June 9, sun nazi 12 hrawngah PDF komkhawm in an do ih, palik sakhan an thianfai theimi in ralthuampi an laksak thei.
PDF komkhawm in palik sakhan an kah tikah ralhrang 3 an thi ih,ralhrang pakhat nungdam in an kai ngah. Ralhrang dang pawl cu ralthuam khal la man loin an tlan man ih, PDF komkhawm cun Palik sakhan in meithal zun 8 , cerek 1000, bike 4, tangka ting 100 le bomb 1 pawl an ngah.
Sakhan in ralhrang pawl an suah thluh tikah PDF komkhawm cun sakhan in an duhmi pawl an la thluh ih, palik pawl umnak an nawkkang thluh. PDF komkhawm in palik sakhan an la timi thei in ralhrang pawl cu palik sakhan lam pan in an feh ih, cumi khal PDF komkhawm cun lamlak ah bomb an rak puah bet. Ralhrang mawtaw bomb puak ah ralhrang 10 an thi ih, hriam ngah tampi an um tlunah ralhrang mawtaw pakhat a siat tin PDF cun thu an suah.
Palik sakhan dotu PDF komkhawm pawl cu Yesagyo PDF, Myiang PDF, Salingyi PDF le pawlkom dang pawl an si tin Yesagyo PDF cun mipi an theihter.
Rakhine Ah Khawlal An Kap That – Rakhine ramkulh Amm khua ah ralhrang ruatmi khawlal Paing Paing cu June 9, zinglam ah nam in an dawt that.
Amm khua ih um pakhat cun “Zinglam nazi 9 hrawngah a si ih, lamlak ah nam in an dawt that. Khawlal thattu cu mi pahnih an si. Nam ih an dawhnak hmun a thi cih. Khawlal a tuan hlan khalah ralhrang thawn ngaih aw zet an si ih,ralhrang hnenah thuhla a sim theu. Ziangruangah, an that ti cu kan thei ve lo,” tin a sim.
Amm khua ih um ralhrang palik pakhat cun “Khawlal Paing Paing cu a thi ko. Tu ahcun zianghman rel theimi kan nei hrih lo. Ziangkim zingzoinak kan nei rero lai hrih. Tu ahcun Amm sizung ah a ruang ret hrih a si,” tin Rakhine thuthang a simthei.
Rakhine ramkulh sungah ralhrang le AA karlak boruak a tha tin thuhla a suak ciamco lawk nan,May 26 hnuah AA le ralhrang an kap aw sal hrih lo. May 26 khalah Chin ramkulh Paletwa peng sungah kap aw an si. Khawlal thih thu ahcun AA siseh ralhrang lam khalin thu an suah hrih lo.
N.Korea Ruangah China An Thinphang – A tufang China le N.Korea ramri ah thli a hrang nasa ih, N.Korea lamin China ramsung lamah a thli a hrang lut sawn. Hivek ruangah N.Korea ramri ih um China mipi le tuanvo neitu pawl an thinphang.
Leitlun ramdang bang lo zetin N.Korea cun Covid 19 natnak an tuar ciamco ih, an ram sung lockdown nasa ten an rak fehpi. Asinan, covid 19 natnak cu N.Korea ram sungin a hlo vivo ve ih, N.Korea cun may 30,2022 ah covid 19 natnak ruangih an ramsung lockdown an phelh.
Hivek hnuah an innhnen China tuanvo neitu pawl le mipi pawl cu N.Korea covid 19 natnak ruangah thinphang an si ih, thli in covid 19 natnak a ken tel ding an phang.
Covid 19 natnak a suah thokin tuini tiang thli in covid 19 natnak a suanawk theih timi felfai zetin an hmu hrih lo nan, China tuanvo neitu pawl le mipi pawl cu mahte thinphang in an rak thinphang.
Covid 19 suah hmaisabiknak ram China cu tuisun nitiang an ramsung ah covid 19 natnak a reh fel taktak thei lo ih, hmun hrekkhat ah covid 19 natnak an um thei ringring lai. Curuangah, N.Korea ramri ih um pawl cu thli a hran caan ah sangka khar dingin le covid 19 nat khamsi dawt lohli dingin theihter rero an si.
Leave a Reply