Makui ramthen Myiang myone ih khua pawl cu June 11 ah ralhrang uknak dokalh in lamzawh duhphorhnak an nei ih, an thehzawng ah PDF hrang an neihsiah sungin an sui thilri pawl an pe.
Lamzawh duhphorhnak an neih thluh hnuin mipi cun an sui thilri sui hnakhaih, sui zunghruk le sui faute pawl PDF hnenah an pe ih, azaten 21 a kim thei. Sumpai nei pawlin an sumpai an rak thawh ve ih, tangka khal ting 6 a kim thei. Sui le tangka an ngahmi cu mipi in PDF hnenah an hlan cih.
A dongtu PDF cun “Mipi pekawknak cu a ropi tuk lawlaw. Ralhrang pawl cun mipi tih ding zawngin mipi inn an urkang sak ih, mipi an hnaihnok, an dekcok rero. Hivek dinhmun khalah mipi cun uknak tha an duh ih, ralhrang uknak cemral ko do dingin tansuah rerotu PDF pawl ke an kar vivo theinak dingah an neihsun khal an pe. A ropi in a sunglawi tuk a si,” tin an tarlang.
Ralhrang In Mipi 7 An Urkang – Makui ramthen Gangaw myone Ngiole khua cu June 3 ah ralhrang ralkap in an luhcilh ih, mipi 5 an kaih hnuah an urkangmi cu PDF pawlin an hmu.
Ralhrang pawl an khua ih an rat tikah mipi pawl cu khua ah um ngam loin an tlan thluh ih, tlan man lo mi 5 pawl cu ralhrang in an kai. Ralhrang cun an kaihmi mi 5 pawl cu inn pakhat sungah hridai thawn an ttawn ih, an urkang cih.
Ralhrang pawl cun mipi inn sungin an duhduh thilri an laksak vivo phah ih, Ngiole khua in inn 2 le Khuangtung khua in mipi inn 5 an urkang sak. Ralhrang in mipi 5 an kaih hnuah an urkangmi cu ralhrang pawlin khua an suahsan hnuah PDF in an hmu ih, theihtheih zetin mipi ruang hmuh ding a um.
Khuami pakhat cun “Kannih khalin ralhrang pawlih urkangmi ruang kan hmu ve. Inn pakhat sungah an that ih, meisa in an ruang pawl an urkang cih. Asinan, minung taksa cu a rak theihtheih tukih , an ruhro le taksa umdan a lang thluh. Zangfah an um tukih, ralhrang pawl cangvaih dan cu a rapthlak tuk lawlaw,” tin a sim ve.
Makui ramthen Yesagyo myone Te’ttaw khua khal June 9 ah ralhrang ralkap pawlin an luhcilh ve ih, mipi inn 31 an urkang sak hnuah pitar pakhat kum 80 mi an urkang that.
Khuami pakhat cun “Ralhrang mipum 200 hrawng an si ih,an lakah Pyu Saw Htee pawl khal an tel ve. Zinglam nazi 6 hrawngah khua an thlengih, manhlap le zamrang zetin kan thlan thluhhai. Tlan man lo khuami hrekkhat cu ralhrang in an kai ih, ralphaw ah an hmang. A hnu ahcun ralphaw ih an hmanmi pawl cu an thlahsal.
“Ralhrang ralkap cun mipi inn an urkang rualin pitar kum 80 mikhal an urkang cih. Mipi bike 30 tlun, sui thilri le mipi neihsiah pawl cu ke 12 nei mawtawpi thawn an phursuak. Hivekin kan khua an luhcilhnak san cu kan khua ah PDF pawl an um tin dalan pawlin an rak simthei ih,cumi ruangah a si,” tin media a simthei.
Mipi inn nawkkang ih, mipi thilri firtu ralhrang pawl cu lamlak ah PDF komkhawm in bomb puah in an rak do ih, ralhrang 15 an thi tin thu PDF cun an rak suah ve.
Yesagyo PDF cun “Ralhrang pawl cu hmun 2 in bomb kan rak puah ih, kan do. Hmaisa sawn ralhrang mawtaw bomb kan puahmi ah ralhrang 3 an thi ih, bomb kan puah non hnuah kannih mipi ralkap komkhawm cun ralhrang umkhawm kan kap ciamco ih ,ralhrang 12 an thi bet.
“Kanmah lawng siloin Myin Kyan PDF, Shwe Oo Army, Taungtar PDF le CDSOM pawl thawn ralhrang ralkap kan do. Ralhrang in mipi inn an urkang ih, sualnak nei lo mipi an that tlunah mipi thilri an laksakmi phuba laknak hrang do kan si,” tin mipi an simthei.
Ralhrang Hmanmi Mawtaw An Urkang Sak – Tanintharyi ramthen Tayet chuang myone Saw-phia’ khua kiangah PDF cun mawtaw pakhat an cek ih, mipi mawtaw a sinan, ralhrang hrang eiin a phurhsak ruangah mawtaw an urkang sak.
Tayet Chuang PDF cun “Mipi mawtaw a sinan, kan cek tikah ralhrang eiin ding pawl a phur. Cumi ruangah, a mawtaw kan urkang sak ih, amah cu ralrinnak kan pek hnuah kan thlahsal a si,” tin mipi an simthei.
Khuami pakhat cun “A hlanah mipi ralkap lamin ralhrang thilri phurhsak lo dingin ralrinnak an pe rero zo. Asinan, sumpai duh ah ralhrang pawl thilri a phurhsak theu. Tuitum ahcun mipi ralkap pawlin an kai ngah ih,amah cu nun an sim hnuah an thlahsal nan, hman theih nawn lo dingin a mawtaw an urkang sak. Kannih khuami pawl cun a phutawk a tong tin kan ruat. Mipi ralkap lam kan mawhthluk lo lawlaw a si,” tin a sim ve.
Ralhrang In Mibawmtu Mawtaw An Kap – Mon ramkulh Kyaikto myone In-kabu khua kiangih mibawmtu pawlkom mawtaw cu ralhrang ralkap in an rak kap ih PDF le KNU an puh. Ralhrang ralkap in mibawmtu mawtaw an rak kah tikah mawtaw mawngtu a thih phah.
Thil a thlen hnu reilo ah ralhrang ralkap cun mipi ralkap puhzawng in thu an suah ih, KNU le PDF lamin ralhrang ih thusuahmi an rak let cih ve. Ralhrang ralkap cun mibawmtu pawlkom mawtaw cu KNU le PDF tangtlang in an kap ih, mawtaw mawngtu a thih phah tin an than.
Kyaikto PDF cun “A kiangte ah ralhrang pawl umhmun an khuar. Lamzin cek ih mipi sumpai dil duh men an si. Zulesa an cen ringring ih, mumal khal an nei lo. Mibawmtu mawtaw cu ralthuampi in an kap ih, mawtaw mawngtu a thih phah. Rapthlak tukih an cangvaih hnuah kanmah lamlam in puh cu an sualnak langfiangtertu a si,” tin mipi an simthei.
A Pasal Aiah A Nupi Kum 20 An Hrem – Ralhrang ralkap cun Makui ramthen Situk taya myone sung NLD palai Bomin cu 2021, July 1 ah kai dingin an rak pan ih, Bomin a rak um lo ruangah ralhrang pawl cun Bomin nupi an kai ih, a fa kum 1 mikhal an hruaitel.
2022, June 10 ahcun ralhrang ralkap Court in Bomin nupi Hnin Moe Khaing cu kum 20 thawngtla dingin hremnak an pefel tin a sungte pawl cun an sim. Ralhrang cun Bomin cu a nupi him a duh asile pe aw dingin an hro rero ih, a nupi khal a pasal umnak rel dingin an hremzok rero. Asinan, a nupi cun ka thei lo taktak tin ralhrang pawl a el ih, hremnak an pe.
Thuhla buaipitu cun “An kaih laiah Hnin Moe Khaing cun kum 1 mi fa a pom lai. A pasal umnak an sut ih ka thei lo a ti ruangah dankalh pawlkom sungtel tin a nupi cu an kai. A pasal cu dothlengnak ah mino pawl hotu a si. Cumi ruangah ralhrang pawl cun a nupi an kai ih, kum 20 sung thawngtla dingin hremnak an pe zo.
“A fate cu thawnginn sungih umter ringring a rem lo ruangah a pasal upa hnenah a ret nan, ralhrang pawl cun a pasal upa khal an kai thotho. Curuangah, tu ahcun a fate unnak ding tiang a buai phah a si,” tin a sim.
Leave a Reply