Tamu ah Hmun 3 In Ralhrang An Do – Sagaing ramthen Kalaymyo in Tamu lamih feh ralhrang ralkap pawl cu Tamu PDF in June 7 zingah hmun 3 in an do ih, naivai ten nasa ten an kap aw tin Tamu PDF cun mipi an thiehter.
Tamu PDF hotu cun “Zing nazi 10:30 hrawngah Kalaymyo lamih ra ralhrang pawl kan rak bawh ih, zan nazi 7 tiang lai kan kap aw ih, Tamu PDF tatyin zaten kan tel thluh. Ralhrang lam khalin ralthuampi 60 tluk an kap suak ve.
“Ziangtin zanlam nazi 7 tiang kan do aw ti asile lamzin ih kan rak kahmi ralhrang pawl cu Tamu peng sung an luh veten hmundang ih kan ralkap pawlin an rak kap cih ve. Netabik kan doawknak cu Tamu peng Kuantaung khua kiangah a si. Doawknak ah ralhrang ralkap pakhat a thi fel ih, ralhrang thi dang khal an um thei nan, a zat kan fiah thei lo. Kannih mipi ralkap komkhawm lam cun thi kan um lo a si,” tin mipi a simthei.
Kyauk Htu khalah mipi ralkap pawlin lamzin feh ralhrang mawtaw bomb an puah ih, ralhrang 10 hrawng an thi ding tin thu an suah. Kyauk Htu PDF cun ralhrang mawtaw bomb an puah hnuah an kah lai khal an pholang ih, ralhrang 10 hrawng an thi ih, hriam ngah 15 tluk an um ding tin thu an suah.
Kyauk Htu PDF cun “Ralhrang mawtaw fehkhawm bomb kan puahmi a si ih, bomb kan puah hnuah kan kap bet. Cumi ah ralhrang mawtaw pakhat a siat ih, ralhrang thi pawl cu anmah ralhrang dang pawlin an phur cih. Cutikah a zat cekci sim a har nan, 10 hrawng cu an thi ding tin kan ruat. Ralhrang pawl an ra ding timi thei cia in rak bawh kan si,” tin a sim.
Kalay PDF An Pe Aw – Kalaymyo ih ralhrang ralkap pawl cun an hnenah Kalay PDF sungtel pawl an pe aw tin June 7 zingah thu an suah ih, an nulepa hnenah kan ap zo tin an tarlang.
Ralhrang cun “June 7, zinglam nazi 9 hrawngah daan pahbal lo PDF zirhnak thehsuak mino pawl cu kan hnenah an pe aw ih, an nulepa hnenah hlannak puai kan tuahsak. Hlannak puai ahcun Kalay peng sung tuanvo neitu pawlin kan hnenih pe aw PDF pawl cu an nulepa hnenah an hlan.
“Hlanawknak puai ahcun Kalay ralkap bawi in daan simfiangnak a nei ih, tuanvo neitu dang pawl khalin thutawi simnak an nei. Cumi hnuah kan hnenih pe aw PDF lamin an hotu bik cun lungawithu simnak a nei ve a si,” tin thu an suah.
Kalay ih um pakhat cun “PDF zirnak ah an feh duak ih tlin lehlo in kirsal pawl an si thei. Tuih ralhrang ralkap do rerotu pawl an si hrimhrim lo ding. Ralhrang pawl ih thuthla suah dan vek asile PDF 5 hrawng an si ih, nunau 2 le mipa 3 an pholang. Ralhrang lemcannak khal a si thei. Curuangah, PDF lam kan ngaicang hrih a si,” tin media a simthei.
PDF Ih Ralthuam Cahmi An Kai Ngah – Makui ramthen PDF Yesagyo pawl ih cahmi ralthuam cu lamlak ah ralhrang pawlin an kaihsak ih, thudik a siko tin Yesagyo PDF khalin thu an suah.
Yesagyo PDF cun “Yesagyo PDF pawl ih ralthuam cahmi lamlak ah ralhrang pawlin an kai ngah tin thu a thangih, thudik a siko timi mipi kan lo theihter duh. Kan hnenah famkim zetin a thleng zikte nan, tisual palhmi kan rak nei ih, lamzin ceknak ah an kai ngah. Kannnih PDF pawl cu sa hman ei ngam loin kan khawl ih, kan leimi a si ih, in kaihsak tikah naa ka tituk. Mipi pawl in bawm hrih dingin kan lo sawm a si,” tin thu an suah.
Yesagyo PDF hotu cun “Famkim zetin mipi theih dingah thu kan suah zo ih, culo bak media simtheih bet ding a um ciamco lo. Ralhrang in kan ralthuam cahmi in kaihsak thu cu mipi kan simthei zo a si,” tin media a simthei.
Ralhrang ralkap khalin thu an rak suah ve ih, Makui ramthen Yesagyo in Pago ramthen Pyu myo ih kuat dingmi KA ( 25 )zun 22 le cerek tamzet kan kai ngah a si,” tin an tarlang.
Ralhrang pawlin Yesagyo in Pyi myo lamih phurh dingmi tin thu an suah nan, Yesagyo PDF cun kan hnen thlen zikte ah an kai ngah tin an sim ih, Yesagyo khawpi ah ralthuam an lut zo nan, ralhrang pawlin an kaihsak ngah in a lang.
PDF In Myanmar Idol Ih Tel An Kap That – Myanmar Idol season 2 zuamawknak ih tel Zin Gyi cu Yangon ih a fehnak ah meithal in an kap ih,sizung fehpi a sinan, sizung ah a thi tin PDF cun thu an suah.
Ultimate Revolutionary Movement Team cun “June 5 ah Yangon Dagon myotit anawyatar lamzin ih Emperor Hotel ah Myamar Idol season 2 zuamawknak ih tel Zin Gyi le fala a hruaimi vu kan kap ih, an pahnih in an thi. Falanu cu a hmunah a thi ih, Zin Gyi cu sizung ah a thi.
‘Hotel cu ralhrang ih ta a si ih, Zin Gyi khal ralhrang lamtang le thuthup pe ringringtu a si ve. PDF pawl cu tapung an si leh ding tin rak autu a si ih, hivekin PDF a dokalh tlunah dalan a si timi felfai zetin kan thei ih, rettha lawlaw kan si,” tin mipi an theihter.
Yangon Ah Bomb A Puak Nonsal – Yangon ramthen Hlaingtaya nisuahnak lamah bomb vei 2 a puak nonih hriam ngah mi 3 an um tin mit hmutu pawl cun an sim.
June 7, zinglam nazi 6 hrawngah bomb puak a si ih, lamzin sir hnawm retnak kiangah bomb a puak. Bomb puak ruangah a kiangih um mi pakhat hriam a ngah ih, a hnuah ralhrang pawl an thleng cih. Ralhrang pawl an thlen hnuah bomb a puak betih, bomb puaknak kiangih um nufa 2 te hriam an ngah ve tin a hmutu pawl cun an sim.
Bomb puak ruangah mipa pakhat le nufa hnihte hriam an ngah ih, Hlaingtaya pituh sizung ah an luhpi hngal.
Mit hmutu cun “Zinglam nazi 6 hrawngah bomb a puak ih, lamzin ih feh mi pakhat hriam a ngah. Bomb puak thuhla thei in ralhrang pawl an thleng cih ih, ralhrang pawl an thlen hnu zinglam nazi 7 hrawngah bomb a puak bet. Neta sawn bomb puak ruangah bomb puaknak kotih inn sungin nupinu le a fa kum 5 mi hriam an ngah veve. A nu sawn cu a vun hik thluh koin a naa ih, sizung luhpi hngal an si,” tin a sim.
Bomb puak cu ziang pawlkom in an puah timi theih a si hrih lo ih, kan dung May 31 khalah Yangon Kyauk Tada myone ah bomb rak puak zo. Cumi tumah mi 9 hriam an ngah ih, mi pakhat rak thi. Bomb puak thuhla ah ralhrang le NUG lam an puh aw veve.
NUG In Mipi Palik An Din – NUG cozah cun ramsung hmun tinkim ih misual le dankalh pawl kai dingin mipi palik an din thu June 7 ah thusuah in mipi an theihter.
NUG thusuahmi cu hitin a si, “Kannih NUG cozah cun mipi parih ralhrang ralkap pawl cangvaih dan, mipi parih an sualnak ,daan an pahbalnak le minung covo an siatsaknak pawl ah ralhrang pawl kai dingin le hremnak pe dingin mipi palik kan din. Mipi palik pawl cun lailak ukawknak ah mipi thawn tuantlang in daan thawn kaih aw in cangvai ding an si. Mipi palik daan thlun dingin din kan si,” tin thu an suah.
NUG cozah cun ralhrang pawl do dingin mipi humhimtu PDF an dinnak a rei zo ih, kum 1 a liam hnuah sual tuahtu pawl kai dingin mipi palik an din thu an tarlang.
Leave a Reply