Ralhrang ralkap cun ram buainak ruangah ralthuam thawn anmah do rerotu PDF pawl cu an hnenah pe aw dingin an leem ih, ralthuam thawn nan pekawk asile zianghman hremnak kan lo pe lo ding, hahdam ten thlah zalen nan si ding tin thu an suah.
Demoso PDF cun “Kum 1 sung dothlengnak kan fehpi zo ih, cumi hnuah ralthuam thlah thluh ding timi cu a ngah nawn lo. Peaw sal ding cun hram kan thok lo ding. Kannih cu pekawk men kan tum lo. Kum 70 sung rori duhtawk ih in rak uk rerotu ralhrang pawl thluak cu kan theifiang tuk zo. An mibumnak hrangah luh kan tum lo a si,” tin a sim.
Minmu PDF cun “Tutiang thuhla kan theih dan vek asile ralhrang an cak tuk nawn lo. Myone sung doawknak ah ralhrang thi an tam. An Mawtaw bomb puahmi khalah ralhrang pawl an tuar tuk. Doawnak ah ralhrang thi an tam ih, cuvek ruangah doawk siloin pe aw ding zawngin mi an leem. Kannih dothlengnak ralkap pawl cun ralhrang thusuak hrimhrim kan zum lo a si,” tin a sim.
CDF sungtuan pakhat cun “Hmaisabik ih ka rel duhmi cu ralhrang ih thusuahmi hrimhrim kan pompi lo. Thinlung khalah kan ret lo ih, ruat khal kan ruat lo. Ralhrang uknak a hramin phong ko do dingin thutluknak felfai nei zo kan si. Ralhrang in mipi ralkap sawmnak ca an suah timi hrimhrim , kan pomsak lo zo ih ruah ding le rel ding khal a um lo hrimhrim a si,” tin a sim.
NUG humhimnak vuanci zungin Naing Htu Aung cun “Tu ah ralhrang ralkap cun duhtawk in inn an nawkkang ih,mipi thilri an siatsak rero. Hivek minung pawlin ralthuam thlah uh in timi cu zum ding a um lo. Cucu, mipi theih ciami khal a siko ding,” tin a sim.
American ramsung vuanci zung palai Derek cun “Tuih dinhmun Myanmar ram buainak zoh rero tikah ralhrang pawlin mipi ralkap pawl nuai cimit theihnak thazang an nei nawn lo. Curuagnah, ralhrang pawl cu zamrang ten Democracy lamzin ah feh ding an si. An tum bangin dothlengnak ralthuam pawl cu an thianfai thluh thei lo ding,Cuuangah remnak tuah lohli ding an si,” tin a sim ve.
Ralhrang Lawng An Kap – Sagaing ramthen le Makui ramri Yesagyo myone le Myiang myone ah mipi ralkap pawl cun ralhrang ralkap lawng an kap ih, kiangkap hmun 2 ah ralhrang an do bet.
June 12, zingam nazi 4:30 hrawngah ralhrang ralkap pawl tomi lawng cu Ayeyarwaddy tipi ah thupten an feh ih, mipi ralkap pawl cun an rak kap ciamco. Tipi le tipi kapin an kap aw ciamco ih, ralhrang thi an um rori nan, ziangzat ciah an thi timi cu mipi ralkap lamin an fiah thei hrih lo.
Zinglam nazi 8 hrawngah Sinchuang khua kiangih umhmun khuar ralhrang ralkap pawl cu mipi ralkap komkhawm in an kap ih, ralhrang 2 an thi. Zinglam nazi 8:30 hrawngah Ngioto khua kiangih um ralhrang ralkap pawl cu mipi ralkap komkhawm in an kap betih, ralhrang 3 an thi tin mipi ralkap lam cun thu an suah.
Hmun 3 ih do an si ruangah ralhrang ralkap cun ralthuampi thawn kiangkap an kap ciamco nan, mipi ralkap lam an him ih, ralthuampi kiltu ralhrang pakhat cu mipi ralkap lamin Sniper in kan kap that bet tin an thusuah ahcun an tarlang.
Mipi ralkap komkhawm pawl cu Myinmu Revolution Force, Myiang PDF, CDSOm, Taloke PDF,MGN Tiger, NGN Ranger, Shwe Oo Force, Fighter 27 ,ISA le Faver DF pawl an si.
Sagaing le Kachin Ramri Doawknak Ah Ralhrang 9 An Thi – Kachin ramkulh moengyin le Sagaing ramthen Intaw myone karlak ih doawknak ah ralhrang 9 an thi tin Moengyin PDF cun mipi an theihter.
Ralhrang ralkap mipum 100 hrawng cu Moengyin le Indaw karlak ah ral an tho ih,moengyin pDF cun ralthuampi thawn an rak kap ciamco. Cumi ahcun ralhrang thi le hriam ngah an tam tin mipi an simthei.
Moengyin PDF cun “Ralhrang mipum 100 hrawng an si. Cucu, ralthuampi thawn kan rak kap ciamco ih, a hmunah ralhrang 7 an thi. Ralhrang hriam ngah 30 tluk an um ih, cumi lakin ralhrang 2 cu sizung ah an thi tin thu felfai kan thei. Hivek ruangah ralhrang cun lamzin an khar ih, an cek.
“Kannih Sagaing le Kachin ramri ahcun doawknak a sosang taktak ih, a tul dan vekin mipi ralkap lam kan sim aw thei ringring. Sagaing ramthen sung ahcun nitin in doawknak a um ih, Kachin ramri khalah ralhrang hrosuang pawl cu kan do ringring a si,” tin a sim.
PDF Hrotu Khawlal An Kap That – Pago ramthen Tayawaddy District Letpandan myone Kyuan Kalay khawlal U Myint Shwe cu June 11, zinglam nazi 10 hrawngah PDF pawlin an kap that.
Khuami pakhat cun “Khawlal cun PDF pawl ka that ding, ka cimit hai ding tin hro a suang ih, lamzin a feh lai ah vei 2 an kap. A hmunah a thi cih. Khua ih ralhrang pawl an rat tikah PDF pawl inn khar dingin lamzin rak hmuhtu rak hruaitu a si.
“Khawlal Myint Shwe lawng siloin amah thluntu a kuthnuai khal an kap ngah nan, a kuthnuai pa cu thi loin hriam a ngah. Khawlal Myint Shwe cu ralkap in cawl zo a si ih, cumi hnuah khawlal a tuan. Palik pawl khal a neh zetih khawlal, Pyu Saw Htee le dalan a cem thluh. Amah ruangah mipi in kan tuar tukih, tu ahcun an ret fel zo a si,” tin a sim.
Leave a Reply