KNU Hnenah Meithal Zun 3 A Pe – KNU hmunram 5-nak sungih um Pha Hti Saw Mili cun a fapa pahnih cu ralthuam thlah in BGF suahsan dingah a nor rero nan, a nor thei lo ruangah a fapa pahnih ih meithal zun 3 le cerek pawl cu amah pabik rori’n KNU pawl hnenah a va pe.
Thuhla theitu cun “BGF cu ralhrang lamtang, ralhrang thawn tuantlang le ralhrang pawlih hlawh pekmi an si. A hlan ahcun zalennak hrang an rak zuam ve nan, ralhrang thawn remawknak an tuah hnuah ralhrang in ramri kil tuanvo an rak pe.
“Ram a buai hnu ahcun ramri kil men loin ralhrang an bawm ih, KNU pawl thawn an do aw ringring. Cutikah khatlam zawngih thlir cun karen le karen doaw vek tla a bang. Ziangahtile, BGF cu karen ralthuamkai pakhat an si ve.
“Cutikah pabik a um nuam thei lo ih, a fapa pahnih cu ralthuam famkim thawn KNU kutah pe aw dingin a fial hai. Theitawkin a lem, a sawm rero nan, a fapa le pahnih in pai’ thusim an thlun duh lo ruangah a pa cun lamzin dang a hawl.
“A fapa le pahnih an um lo sungah a fapa pahnih ih meithal zun 3 le cerek pawl cu amah rori’n KNU hmunpi hnenah a fehpi ih, a va ap. KNU lam khal an rak lungawi tukih, laksawng ah ting 40 an rak pe. Pabik cu ke khatlam tha nawn lo a si ih, kelem a hmang. A fapa pahnih khal thlem bet a tum rero lai,” tin a sim.
Shwemanntu le Shanmahlay Bus Bomb An Puah Ding – Sagaing PDF cun ralhrang sumpai lakluhnak pakhat Shwemantu le Shanmahlay buspi bomb an puah thlang ding thu mipi theihternak an nei ih, khualtlawng sukso zokhal Shwemanntu le Shanmahlay to nawn lo dingin an theihter.
Sagaing ramthen sung PDF cun “Ralhrang ralkap thawn tuantlang Shwemanntu le Shanmahlay bus mawtawpi to nawn lo dingah mipi nan zaten kan lo theihter duh. Theihternak kan tuah zo cingin, a to hrimtu nan um thotho ih, thil pakhat khat nan tong asile kannih mipi ralkap lamin mawh kan phur lo ding.
“Ralhrang ih tuanpi le ralhrang sum lakluhnak pohpoh do ding kan si ruangah, tu ihsin ralhrang tuanpi Shwemanntu le Shan Mahlay buspi khal theitawk in kan siatsuah thlang ding. Cucu, mipi kan lo theihter duh a si,” tin thu an suah.
Wave Money In Hmatpungtin An Dil – Myanmar ramsung ih sumpai kuatawknak pakhat Wave Money cun September 9 ihsin wave money hmangtu zaten hmatpuntin tel lo cun sumpai suah a theih nawn lo thu an simthei.
Wave money cun “Sumpai kuat le suah ding tikah rintlak zetih tuah a si thei ding cu kan duhmi a si. Curuangah Wave money hmangtu zokhal hmatpuntin keng tengteng dingah kan lo theihter ih, tulsammi nei thluh lawng kan lo buaipi thlang ding a si,” tin thu an suah.
Wave Money hmang ringringtu pakhat cun “A hlan ahcun sumpai suah dingah siseh suahpai kuat ding khalah phone number kan pe ih, duhtawk in Wave Money kan rak hmang thei. Tu ahcun sumpai kuat dingah siseh, sumpai suah ding khalah hmatpungtin kengkeng dingin thu an suah.
“Ziang an duhsan kan thei lo ih, kannih mipi hrang ahcun a buaithlak phah zet. A olsam tukih kan hmang rero tinak laiah tu ahcun buaithlak zawngin an fehpi tikah kannih cu Wave Money kan hmang nawn lo ding a si,” tin a sim.
Thuhla theitu pawl cun hivek cu ralhrang lamih thusuak le an fialmi a si ko ding. Ziangahtile, rampi a buai hnuah Wave money hmang tangkai tuk a si ih, ralhrang pawlin an mikaih duh ah hmatpungtin tiang an telhter siko ding tin an sim ve.
N.Korea I Nuclear Hman Theinak Thu An Suah – N.Korea president Kim Jung Un cun a tul a si ahcun ziangtik khalah Nuclear bomb kan hmang thei a si tin thu an suah tin N.Korea thuthang pawl cun September 9 ah an tarlang.
Kim Jung Un cun “Ziangvek remnak khal kan tul lo, Nuclear tuah lo dingin biakawknak khal kan pom lo. Nuclear kan buaipi reromi khal dungsip kan tum lo a si,” tin a mipi pawl a simthei.
Hivek a si tikah N.Korea cun Nuclear an buaipi vivo tum si ding tin zingzoitu pawl cun an sim. 2018 kum khalah US President hlun Donald Trump cun N.Korea president Kim Jung Un hnenah Nuclear buaipi nawn lo dingin remnak tuahpi a rak tum rero nan, remawknak felfai an rak tuah thei lo. N.Korea cun 2006 kum le 2017 kum ah Nuclear zohsinnak an rak nei zo.
N.Korea president Kim Jung Un cun a tul a si ahcun Nuclear hman theinak kan nei tin thu an suahmi ah ziangtikah an hmang ding? ziang ram an kap ding, ziangruangah an hmang ding tivek a cipciar pawl cu a phuang tel lo thung.
Leave a Reply