PDF In Thawnginn Sungin Tlansuak Mi 5 An Humhim

PDF In Thawnginn Sungin Tlansuak Mi 5 An Humhim – Makui ramthen Pakukko District thawnginn ihsin tlansuak mi 5 pawl cu mipi ralkap pawlin an rak hmuak ih hmunhim an thlenpi zo thu mipi theihternak an nei.

Pakukko thawnginn in tlansuak mi 5 pawl cu dothlegnak ralkap 2 le dothlengnak ruangih kaihmi 3 an si. Thawngtla 5 pawl cu anmahten tlansuak an si ih, an tlansuah thu mipi ralkap lamin an theih tikah zamrang zetin an rak bawm hngal.

Pakukko ih um pakhat cun “Thawnginn an bauh ih an tlansuak tin kan thei. Hivek cu Pakukko ah veikhat thlennak a si. Thawngtla tlansuak an um ruangah ralhrang pawl cu khua sungah an khat thluh. Pakukko le Mungzua fehnak lamzin an kham ih , nasaten an cek,” tin a sim.

Pakukko PDF cun “September 10 ah Pakukko thawnginn sungin tlansuak thawngtla 5 pawl cu kannih Pakukko mipi ralkap komkhawm in kan runsuak thei. Tlansuak mi 5 lakin pahnih cu mipi ralkap an si ih, a dang pathum cu ram buainak ruangah dik lo zetih an kaihmi pawl an si. Thawngtla pawl kan buaipinak ih in bawmtu nan zate parah kan lungawi,” tin thu an suah.

Lal Vivo Tum China President – China khal 2022, October thlasung ah rampi hrilawknak an nei dingih, rampi president tuan rero lai Xi Jinping cun a damsung China President tuan lanta theinak dingah a rak tawlrel ve.

China hi veikhat an hrilawknak ah a tlingtu ih hnatuan caan kum 5 an pe. Tuih China president Xi Jinping cun kum 10 sung rori China president a tuan thangih, hrilawknak vei hnih ah nehnak a rak co veve. Veikhat nehnak a co tikah kum 5 sung ropi a um.

Tu ah China rampi hrilawknak caan neih tuk zo nan, China president Xi Jinping cun hrilawknak tuah loin amah a lal vivo theinak ding daan thar tuah a tum tin thu a suak. China president ih tummi cu Russia president Putin ih rak hman zomi a si. Tuitum ah China President a hlawhtling pei maw timi cu a caan a thlen tikah a theihtheih fang ding a si.