PDF Kalewa In Palik Sakhan An La

Mindat Ah Innsang Khat Fangfai Pi 5 Lawng Lei An Siang Thlang – Chin ramkulh Mindat khawpi ah ralhrang ralkap pawl cun Innsang khat hrang fangfai dipkhat lei an siang nawn lo ih, innsang khat ah fangfai pi 5 lawng lei an siang thlang.

Fangfai an leimi pi 5 an ei thluh hnu lawngah a dang lei an siang ih, pi 5 an ei thluh hlanhlo a dang lei bet an siang lo. Innsang khat hrang pi 5 hnakin tam khal lei an siang cuang lo. A hlan ahcun Mindat khawpi sungah innsang khat hrang fangfai dipkhat a tambik lei an rak siang ih, cuti cing hmanin sungkua tam pawl an buai. Tu ah innsang khat hrang fangfai pi 5 lawng lei an siang thlangih, sungkua tam pawl an buai deuhdeuh dingin a lang.

Mindat ahcun anmah ralhrang ralkap pawl lawngin fangfai an zuar ih, an fangfai zuarmi cu cazin fel takten khuatlang hruaitu, Kawhhran hruaitu le Pastor pawl an zuarter. Mipi cun ralhrang hnenah fangfai an lei tengteng a tul ih, ralhrang in tuanvo an pekmi pawl hnenah an leiter. Asinan, aman zat le zuar theizat cu ralhrang lamin bikhiah an tuahsak thluh.

Mindat ih um pakhat cun “Tu ahcun ralhrang pawlin Mindat khawpi sungah innsang khat hrang fangfai pi 5 lawng zuar an siang thlang. A hlan ahcun dipkhat tiang zuar an rak siang dah. Tu ahcun innsang khat hrang fangfai pi 5 lawng zuar an siangih, pi 5 kan ei cem hnu lawngah a dang kan lei thei fang. Ralhrang pawlin hramlak ih umpawl hrang fangfai kan pek ding an phan tuk ruangah hivek in an kham siko. Midang dawi nei pawlin fangfai an zuar thei ve lo,”tin a sim.

Ralhrang in rampi thuneihnak an lak hnuah Mindat khawpi hi Kalaymyo thluh in ralhrang rak do cihtu an si ih, Mindat khawpi sungah nasaten an rak doaw. Doawknak a sosan tikah ralhrang pawl cun raldonak Helicopter an hmangih, cumi ruangah mipi tuar tuk ding phangin Mindat CDF cun 2021, April thla ah Mindat khawpi an rak suahsan.

Cumi ihsin thokin ralhrang cun Mindat khawpi cu Martial law an suah ih, ralkap thuneihnak hmangin an uk. CDF Mindat pawl cu Mindat khawpi an suahsan hnuin hramlak ah umhmun an khuar ih, tuisun nitiang theitawk in ralhrang do peh rerotu an si.

Matupi Ah Ralhrang 6 An Thi – Chin ramkulh Matupi ih doawknak ah ralhrang 6 an thi tin CDF Matupi cun mipi theihternak an nei.

CDF Matupi cun “Matupi mipi pawl ih kan hmang tangkai tukmi Mindat le Matupi fehnak lamzin ,Matupi luhnak kiangah ralhrang pawlin lamzin an kham ih, mi tampi harsatnak an ton phah. Hivekin ralhrang pawl an cangvaihnak cu kannih CDF matupi in kan thungrul hngal ih, Matupi in peng 2 hrawng hla ih um ralhrang sakhan cu September 19, zanlam nazi 5 hrawngah kan kap. Ralhrang sakhan ih doawknak ahcun ralhrang 6 an thi ih, ralhrang 8 hriamhma an ngah. Kannih CDF matupi pawl cu himdamten dung kan sip thei a si,” tin a sim.

PDF Kalewa In Palik Sakhan An La – PDF kalewa cun September 18, zinglam nazi 6 hrawngah mah-sein khua ih ralhrang palik sakhan an lak thu mipi theihternak an nei ih, Palik 7 le palik fapa pakhat an thih tlunah meithal zun 8 le ralthuam dang khal kan laksak thei tin mipi an theihter.

PDF Kalewa cun “September 18, zinglam nazi 6:5 hrawngah Kalewa myone Mah Sein khua ih nemi palik sakhan kan kap. A hmun ahcun palik 7 le palik fapa pakhat an thi. Palik dang hriamhma ngah khal an tam. Kannih Kalewa pDF cu palik sakhan ih ralthuam kan lak hnuah palik sakhan kan urkang ih, himdamten dung kan sip.

“Palik sakhan in G3 meithal zunthum, Uzi meithal zunhnih, M79 zunkhat, kutden bomb 3, cerek bawm 297, Uzi cerek 149, 125 bike 4, biakpawhnak cet 3,phone 10, Pawer bank 1, Lattop 1,tangka thawng 13,kutkhihnak 2,suithi 1 , bek pakhat le nam pakhat pawl kan laksak.

“Palik sakhan ih doawknak ah kiangkap mipi lakin mi pakhat a thih phah tin thuhhla kan thei ih, kan riahse tuk lawlaw. Siattong innsang parah ngaithiam kan dil ih, kan lo tuarpi tuk lawlaw. Palik 7 thi ih innsang pawl cu innsang khatah thawng 30 ciar kan pe a si,” tin thu an suah.

kalewa palik sakhan ih palik thi pawl cu Sakhanhmu Nyi Lin Myint, senthum Soe Moe Aung, Senthum Win Shing , senhnih Thant Zaw Myo, Chan Nyin Aung, Gam Lan Taung, KHin Mi Htwe, Sakhanhmu Nyi Lin Myint ih fapa le Khuami pakhat Daw Ngyat Mi pawl an si.

Ralhrang Pahnih An Pe Aw – Karen KNU hmunram 5 sungih cangvai ralhrang ralkap lakin ralhrang 2 cu thupten an tlansuak ih, KNU hnenah an pe aw tin KNU cun thu an suah.

KNU hnenih pe aw ralhrang pahnih cu Thar Hla le Thiha Htun an siih, ralhrang pakhat sawn lawngin meithal zunkhat le cerek a keng tel.

KNU cun “Kannih pe aw ralhrang pahnih lakin meithal le cerek keng sawntu cu ting 15 laksawng kan rak pe ih, ralthuam keng loin kan hnenih pe aw ralhrang pakhat cu ting 5 kyats laksawng kan pe a si,” tin mipi an simthei.

A tufang ram buainak sosang ah hmun tinkim in mipi ralkap lamih pe aw ralhrang ralkap le palik an um ringring lai. Ralhrang pawl ralthuam thawn an pekawk asile laksawng ah sumfai pek an si ih, mipi ralkap pawlkom tin in ralhrang pe aw sumpai an pek dan lawngte a bangaw thluh lo.

NUG palai le Malaysia Palai An Be Aw – Malaysia ramdang vuanci Abullah cun American a um sungah NUG palai, NUCC palai le CRPH palai pawl a kawm ih, Myanmar ram buainak thuhla an rel.

Malaysia ramdang palai le NUG palai pawl cu September 19 ah tongaw an si ih, NUG lamin vuanci Htin Lin Aung, ramdang vuanci bawmtu Moe Zaw Oo, UN palai U Kyaw Moe Tun le Aung Myo Min pawl an telih, CRPH palai lamin U Aung Kyi Nyunt an tel.

Tonawknak ahcun a tufang Myanmar ram dinhmun diktak cu Malaysia ramdang palai in NUG palai pawl a sutfiang hai. Tonkhawmawknak cu Malaysia ramdang palai ih tawlrelmi a si ih, Myanmar mipi dinpitu ramdang palai pawl khal an tel ve. Malaysia ramdang palai cu UN meeting ruangah American thleng a si.

Malaysia ramdang palai cun “Myanmar ram buainak kan relfel duh asile NUG le NUG thuronpetu NUCC pawl khal an tel thluh ve a tul. Culoin ralhrang pawl lawng thurelpi an theih nawn lo. Pawlkom zaten thu kan relpi lawngah Myanmar khal Democracy lamzin ah an feh thei ding. Curuangah, thu felfaiten kan fehpi a tul a si,” tin a sim.

Malaysia hi Myanmar ram a buai hnuah Myanmar mipi dinpi ringringtu an si ih, ralhrang pawl cangvaih dan a pom in an pom thei lo. Myanmar thuhla ih ASEAN fehdan khal an lungawi thei lo ih, ASEAN nor rerotu khal Malaysia an si.

Min Aung Hlaing Ih Tu 4 Pawl Tlawng An Kai Ngam Nawn Lo – Ralhrang ralkap in Sagaing ramthen Depayin myone sungih tlawnginn bomb an thlak ruangah tlawngta nauhak 5 an rak thih phah ih, hivek a thlen hnu cun Yangon ih Min Aung Hlaing tule 4 pawl khal tlawng an kai ngam nawn lo tin tlawnginn lam thu a suak.

Thuhla theitu cun “Inya Miayg EMPS 10 ah Min Aung Hlaing tule 4 pawl tlawng an lut nan, September 19 in tlawng an ra kai nawn lo. A thok ahcun Min Aung Hlaing tule pawl tlawng an kai ve tikah tlawnginn ahcun kilhimtu ralhrang le bomb thianfaitu ralhrang pawl an um ringring.

“Tu ahcun Min Aung Hlaing ih tule pawl tlawng an rak kai nawn lo tikah tlawnginn kiltu ralhrang pawl le bomb thianfaitu ralhrang pawl khal an um nawn lo. Hivek cu ralhrang in Depayin myone sungih tlawngta nauhak pawl bomb in an thlak that hnuah a thlengmi a si,” tin a sim.

Min Aung Hlaing ih tu Chit Po, Shwe Po, Eih Po le Mi Po pawl cu EMPS 10 tlawngap ih tlawng rak kai rero zo an si. EMPS tlawng cu Min Aung HLaing ih tuanpi Maung Maung Latt ih dinpi a si ih, EMPC tlawng ahcun midang ralkap fanu, fapa le tule pawl khal tlawng an kai ve.

Min Aung Hlaing sungkua le rualpi pawl ih dinmi EMPS tlawng cu 2013 kum ah an rak din ih, 2015 kum ahcun Yatana tlangkuai, 2017 kum ah Inya Maiyng EMPS 10 tlawng ,Universal Academy Myanmar le Grand Mandalay Shcool tlawng pawl an rak din bet rero zo.

Video Leakout Ruangah University An Khar – India ram, Punjab ih Chandigarh University tlawng ah nunau pawl dai an buai lai Video a darh suak ih, tlawngta pawl dilnak vekin tlawnginn an khar hrih.

Video leakout thuhla thawn pehpar aw in mi 3 an kai zo ih, thuhla suh bet vivo ding an si hrih. An kaihmi pawl cu Nunah innpi ih um ve an si ih, video darhtertu puh an si.

Kaihmi 3 lakin pakhat cun “Nunau pawl an bual aw lai video a ra la thup ringring ih, hmundang ih a ngaihzawngpa a kuat theu. Cutin a ngaihzawngpa kutin a darhsuak tin an rel. Tutiang ah video leakout 4 an hmu fel zo ih, video 60 hrawng a leakout zo ding tin an rel.

Palik pakhat cun “Tulai ziang video khal sisehla a leakout tikah nunau lamih hram thokmi a um hnuaihni thlang. Tuitum ah nunau lawng umnak innpi ih nunau pawl daibual lai a darhsuak ih,anmah nunau pawl ruangah thotho a si,” tin a sim.