PDF pawl kan cimit thluh ding tin hrosuang ralhrang Tin Htoo Naing cu Sagaing ramthen Salinkyi myone le Yinmarpin karlak ah May 10 ah bomb an palpuak ngah ih, a hmun rori ah a thi cih.
Ralhrang bawi Tin Htoo Naing ( kum 39 ) ih ruang cu Mungzua ah an phur ih, May 12 ah an vuiliam. Salinkyi in Yinmarpin lam feh an si ih, lamlak ah an mawtaw in bomb a puakpuak ngah. A hmun rori ah ralbawi cu a thi cih.
An sungte pakhat cun “A nupi cu Kalaymyo in Helicopter a to ih, Mungzua a thleng zo. A nulepa , a sungte dang pawl cu Yangon in Mungzua an pan ve. May 12 ah vuinak neih a si ih, Yangon ah sunnak an tuah bet ding. Ralbawi ih nupi cu pinmana suak a si ih, fanu kum 8 mi an nei. Ralhrang in rampi thuneihnak an lak tikah a lungkim tukih, PDF pawl kan cimit thluh ding tin hro a suang rero. Amah hrimhrim khal misual a si,” tin a sim.
April 22 doawknak ih thi ,Kalaymyo thlanglam ih ralbawi pathum ruang le Pyu Saw Htee hotu ih ruang pawl cu may 10 lawngah ralhrang pawlin cawleng in an phur ih, Inkyaun thlanmual ah an phum. Ralbawi pathum le Pyu Saw Htee hotu pawlih ruang cu a rak toih tuk zo ruangah , ruhro lawng ralhrang lamin an la ih, an vui.
Leave a Reply