Ralhrang ralkap hotu Min Aung Hlaing in tlangpar ralthuammkai hotu pawl ton a duh thu a sim hnuah KNU, KIA, CNF le KNPP pawl cun sawmtlak zaten sawm an si thluh lo ahcun Min Aung Hlaing thawn tonawknak ah kan tel lo ding tin thu an suah zo.
Himi thuhla ah ralhrang thuphuangtu Zaw Min Tun cun KIA, KNU , CNF le KNPP pawl ih tongkam a letih sawmtlak pawl kan sawm thluh ko tin a simthei hai.
Zaw Min Tun cun “Hrekkhat in teltlak le sawmtlak pawl sawm thluh an si lo ahcun remnak hrang thurelnak ah kan tel lo ding tin an sim. Taktak teih rel ahcun tlangpar ralthuamkai lo bak sawmtlak le teltlak dang an um sawm?
“Tlangpar ralthuamkai pawl cu remnak hrang thurelpi dingah sawmtlak bik le teltlak bik an si ko. Curuangah, tlangpar ralthuamkai zaten kan sawm. Culo zosi teltlak le sawmtlak kan sawm lomi um cuang. Tui caan cu remnak tuahnak hrang caantha a si. Caantha fehsan in tonawkak ah kan feh lo ding ti ih thusuahtu pawl cu mipi hmaisong men an si,” tin a sim.
Ralhrang hotu Min Aung Hlaing ih sawmnak ah tlangpar ralthuamkai le pawlkom 10 an tel dingih, tlangpar ralthuamkai lakin thazang cak ti ih relmi KIA, KNU, CNA , KNPP le ABSDF pawl cun remnak hrang thurelnak ah an tel lo ding thu felfai zetin thu an suah zo.
Ralhrang ralkap cun ziangtik hmanah CRPH, NUG le PDF pawl an biak dah lo ding thu an sim ih, tuitum tonawknak an tuah tummi khalah CRPH, NUG le PDF pawl an sawm lo.
Leave a Reply