PDF Bawm Dingin Biden Hminkhen A Ngan – US Senate le House in Myanmar zalennak hrang zuam rerotu PDF le tlangpar ralthuamkai pawl bawm dingin an relcatmi cu US president Biden khalin a lungkimpi ve ih, December 23 zan ah Biden cun Myanmar zalennak hrang zuam rerotu PDF le tlangpar ralthuamkai pawl bawm dingin hminkhen a ngan fel.
US House palai pawl cun December 8 ah Myanmar ram buainak thawn pehparaw in tlangpar ralthuamkai le PDF pawl bawm dingin thu an rak relcat ih an thurelcatmi cu Senate ah an thlen. US Senate khalin December 15 ah House palai pawl ih thuburmi relnak an nei ih, mi tamsawn vote hmangin US Senate khalin Myanmar zalenak hrang zuam rerotu PDF le tlangpar ralthuamkai pawl bawm dingin lungkimnak an nei. House le Senate in Myanmar zalennak hrang zuam rerotu PDF le tlangpar ralthuamkai pawl bawm dingin lungkimnak an neih hnuah an thurelcatmi cu US President Biden hnenah an kuat ih, US President Biden cun December 23 zan ah Myanmar ram zalennak hrang zuam rerotu PDF le tlangpar ralthuamkai pawl bawm dingin lungkimnak hminkhen a ngan ve.
US House, Senate le US President Biden pawlin Myanmar ram zalennak hrang zuam rerotu PDF le tlangpar ralthuamkai pawl bawm dingin lungkimnak tuahmi le hminkhen an nganmi pawl cu “Zalennak hrang zuamtu Myanmar mipi pawl kan dinpi vivo ding. Ralhrang uknak do rerotu NUG, NUCC, CRPH le CDM pawlih zuamnak khal kan theihpi vivo ding. Mipi hrilmi in cozah an tuan theinak ding le tlangpar miphun pawlin Federal Democracy a takih an ngah theinak dingah theitawk kan suahpi ding. Ralhrang dinpitu China le Russia in mawhphurhnak la ngam dingin kan nor ding. Ram buainak ruangih raltlan pawl bomnak kan pe vivo ding. Ram buai ruangih kaihmi thawngtla pawl a suah theinak ding khal tan kan la vivo ding.
Ramsung ramleng ih Myanmar raltlan pawl a takih bomnak an ngah theinak dingah theitawk kan zuam vivo ding. Ralhrang le an tuanpi pawl khal hremnak kan pe vivo ding. Ralhrang hremnak kan pekmi cu kum 8 tiang daih a si ih, hremnak phelhsal dingin President hnen thlen a tul. Ralhrang in ralthuam an ngah theilonak dingah theitawk kan suah ding. Ralhrang uknak do rerotu PDF le tlangpar ralthuamkai pawl cu ralthuam silo, thiamnak le santhar thilri tha pawl thawn kan bawm ding. Tuih kan relmi pawl hi 2023 in 2027 tiang sumpai hman dingmi cazin ah telh thluh a si,” tin US President Biden cun Senate le House ih thurelcatmi pawl a lungkimpi ve.
US in Myanmar zalennak hrang zuam rerotu PDF le tlangpar ralthuamkai pawl sumpai silo, thiamnak le santhar thilri tha in kan bawm ding an timi cu leitlun mipi hna verh zettu a si ih, thurelcatmi pawl hi 2023 hnu lawngah a takin fehpi theih ding an si.
Matupi Ah Zarh 2 Sung Meisa An Ngah Lo – Chin ramkulh Mindat khawpi kiangih ralhrang ralkap le CDF Mindat an doawk tumah ralhrang ralkap cun Matupi lamih feh meisa hri an rak kap siat ngah ih, Matupi ah zarh 2 tluk meisa an ngah nawn lo tin khuami pawl cun an sim.
Matupi ih um pakhat cun “December 13 ah Mindat khawpi kiangih vaktawk ralhrang ralkap pawl cu CDF Mindat in an kap ih ,cumi runnak ah Mindat khawpi sungih um ralhrang pawl cun duhtawkin ralthuampi an kap ciamco. Ralhrang pawlih kahsuakmi ralthuampi cun Matupi lamih feh meisa ban an kap siat ngah ih, kannih Matupi khawpi sungih um pawl cu zarh 2 tluk meisa kan ngah nawn lo zo.
“Meisa kan ngah lo tikah meihol kan hmang ciamco. Asinan, meihol kan hman dah lo tikah dawr ah meihol a mal. Curuangah, meihol unsun cu lei kan cuh aw ciamco. Hramlak ah fehin thinglak ding khal kan boruak in a zir lo ruangah kan tih ih, kan feh ngam lo. Curuangah thenkhat cu inn kiangkap thingtan, thilri sia le neuhneuh hmangin rawlsuang khal an um. December thlacem lam lawngah meisa a ra men thei tin thuhla kan thei. Cucu, thuhla kan theihdan umsun a si hrih,” tin a sim.
Chin Ramkulh Ah Raltlan Ting 1 Tlun Um Zo – Ralhrang ralkap in rampi thuneihnak an lak hnuah Chin ramkulh sungah raltlan ting 1 tlun an um zo tin hminsin tuahtu ISP Myanmar cun an tarlang.
ISP Myanmar ih tarlang dan vek asile Myanmar ram buainak ah Chin ramkulh sungin raltlan 139550 an um zo ih ,cumi sungin raltlan 99550 pawl cu Chin ramkulh sungah raltlan in an um ih, mipum thawng 40 tlun cu Mizoram lamah raltlan in an um.
Chin ramkulh myone 9 sungah ralhrang thawn doawknak 600 tlun a um zo ih, Mindat peng sung lawngah ralhrang thawn doawknak 125 a um zo. Ram buai hnuah ralhrang in Chin ramkulh sungah tlunzuang raldonak vei 33 an hmang zo ih, Paletwa lawngah ralhrang in raldonak vanzam 27 an hmang zo.
Ralhrang in rampi thuneihnak an lak hnuah Chin ramkulh sungin inn ,biakinn le pawlkom inn 1175 a siat zo ih, Chin ramkulh Thantlang khawpi lawngah Inn 1000 tlun a kang zo tin hminsin tuahtu ISP Myanmar cun a tarlang.
Kalay Ah Ralhrang Bomb An Puah – Sagaing ramthen Kalaymyo thlanglam Hto-ma kiangih um ralhrang ralkap pawl cu December 23 ah bomb kan puah tin Kalay PDF cun thu an suah.
Kalay PDF cun “December 23, zanlam nazi 12 hrawngah kalaylam nisuahnak lam ihsin Kalaymyo thlanglam ih feh ralhrang ralkap mipum 70 hrawng cu Hto-ma khua kiangah kannih Kalay PDF cun kan kamciami bomb 3 hmangin kan rak puah. Bomb kan puahmi ah ralhrang 7 hrawng kan puah fuh tuk. Bomb kan puah hnuah ralhrang pawl cun minute 10 hrawng duhtawkin kiangkap an kap ciamco ih, cumi hnuah Kalay thiamthil zirnak hmunah an lut,” tin Kalay PDF cun thu an suah.
Kalay PDF cun December 21 khalah Hto-ma kiangih umhmun khuar ralhrang ralkap pawl bomb an rak puah zo ih, cumi tum ahcun ralhrang 2 an thi tin thu an rak suah.
PDF 3 An Thi – Makui ramthen Maing myone Kyan sik Kyi khua kiangah ralhrang pawl umnak zohfeltu PDF pawl cu ralhrang pawlin an rakkap ih a hmunah PDF 3 an thi tin Young Force Pakukko cun thu an suah.
Young Force Pakukko cun “Ralhrang pawl hmun 2 then aw in ral an tho ih mipi an him theinak dingah le bomb kan puah theinak dingah PDF 5 cun mawtaw pakhat toin zingzoinak an nei. Cucu, ralhrang pawlin an rak kulhih, an dunglam in kap. Mawtaw dunglam ih to PDF 3 an thiih, mawtaw hmailam ih to PDF 2 cu an tlansuak thei.
“Ralhrang pawl cun PDF 3 thi cu mawtaw in an phorhsuak hnuah an zuk ih ,an zuk theh hnuin mawtaw sungah an sansal. Cumi hnuah mawtaw thawn PDF pawl cu an urkang. Ralhrang do ih nunnak hlantu PDF 3 pawl cu upatnak kan pe a si,” tin mipi an theihter.
Ralhrang le Tlangpar Ralthuamkai 7 Tongaw Ding – Ralhrang ralkap le tlangpar ralthuamkai pawlkom 7 pawl cu December 27 in December 29 tiang ni 3 sung an be aw ding tin remnak tuahtumtu PPST palai Saw Kyaw Nyut in a sim.
Palai Saw Kyaw Nyut cun “Tongaw dingin vei tampi kan tawlrel ih , hmunram le a caan remcangbik kan tawlrel thei. Tuitum tonawknak ahcun anmah ralkap lamin kan rel ding an timi pawl kan reltlang ding. Cumi hrang kannih tlangpar ralthuamkai pawlkom 7 pawl khal a hlankhan in rak relnak kan nei cia. Ralhrang lamin ca in kuat dan vek asile 2008 daan hrampi rem dan ding le tlangpar miphun pawlih duhmi kan reltlang ding tiah in sim. Curuangah tongaw ding kan si,” tin RFA a simthei.
Tonawknak ahcun tlangpar ralthuamkai pawlkom pakhat ah hotu le palai pathum ciar an tel thei ding tin an sim. Ralhrang ralkap cun tlangpar ralthuamkai pawl thawn an tonawk ding thu an than hrih lo ih, anmah tlangpar ralthuamkai pawlkom 7 pawlin ralhrang thawn kan tong aw ding, ralhrang in tongaw dingin ca in kuat an timi a si.
Tuitum ih ralhrang tong tum tlangpar ralthuamkai pawlkom 7 pawl cu ralhrang thawn kap aw lo dingin NCA hminkhen ngan an si ih,ralhrang in ralthuam rinsan in rampi thuneihnak an lak hnu khalah ralhrang do loin daiten um ziarzi hlir an si.
Tlangpar ralthuamkai pawlkom 10 cun 2015 kum, October 15 ah ralhrang thawn kap aw lo dingin hminkhen an rak ngan ih,a relten remnak kan tuah ding tin lungkimnak an rak nei. Ralhrang thawn remawknak tuah tlangpar ralthuamkai pawlkom 10 pawl cu ABSDF, ALP, CNF, KNLA PC, KNU, DKBA, LDU, NMSP,PNLA, RCSS pawl an si.
Kapaw lo dingin remnak an tuah hnuah ralhrang cun 2021, February 1 ah ralthuam rinsan in rampi thuneihnak an la ih , cumi ruangah ABSDF , KNU le CNF pawl cun ralhrang thawn remawknak kan tuahmi NCA hminkhen kan bal ih, ralhrang uknak kan do ding tin thu an rak suah. Curuangah ralhrang in rampi thuneihnak an lak hnuah ABSDF , KNU le CNF pawl cun theitawkin ralhrang an do rero ih, ralhrang in rampi thuneihnak an lak hnuah veikhat hman ralhrang thawn an tongaw lo.
Tu ih ralhrang tongtu ding tlangpar ralthuamkai pawlkom 7 pawl cu ralhrang in rampi thuneihnak an lak hnuah vei 2 ciar ralhrang an rak tong aw. Ralhrang do duh loin ralhrang an be rero nan, ralhrang pawl cun tongkam menin a rak bum rero men ih tutiang an karlakah remawknak felfai le a takih tuahmi a um cuang lo.
Myanmar Politics thlirtu U Than SOe Naing cun “Tuih ralhrang tong tumtu tlangpar ralthuamkai pawlkom 7 pawl hi ralhrang thawn buainak zianghman nei lo hlir an si. Ralhrang in anmah remnak tuahpitu an si tikah hman tangkai thei an beisei hai ih,cumi ruangah ralhrang lamin an tong tum. Hivekih an tonawknak le thu an relnak cu mipi hrang zianghman danglamnak a um phah lo ding. Daan hrampi rem ding timi cu hlutdaw lawngah rem a theih ih,annih pawlkom pahnih tonawknak menih rem theih a silo,” tin a sim.
American Ih Vur Thli Ruangah Mi 12 An Thi – A tufang hi American state tinkim ah vur nasaten a tla ih,mi 12 tlun an thih zo ruangah mi tamzet harnak an tuar. Vur hi thli vekin a sur ih, vur tla ruangah lamzin sukso feh a harsa ih, a dai tuk an buai.
Vur thli a hran ruangah December 23 zan ihsin vanzan tampi an zam ding caan an thawn ih, American le Canada karlak ah vur thlir a tam hleice.
American ih um Chinmi pakhat cun “State pakhat le pakhat vur thlisia kan tuar dan a bangaw lo. Thenkhat State ahcun mi tampi hmunhim ah an tthawn phah ih, thenkhat state ahcun inn sungah hahdamten an um thei. Vur thlir hrang ruangah mithi khal an um. A dai tuk lawmmam ih, leng suah ngam ding khal a silo,” tin a sim.
Leave a Reply