PDF Lem 8 An Kai

PDF Leem 8 An Kai – Sagaig ramthen Myoung myoe sungih mino pakhat thattu PDF lem pawl cu Myoung PDF in kan kai ngah zo tin mipi an theihter.

PDF Lem pawlkom ahcun mi 8 an um ih, phungki fawm hruh pakhat in a hoha hai. PDF lem pawl cun mipi sumpai an dil ih, rittheihsi duhtawk in an buaipi. PDF kan si tin an cangvai ih anmah sumpai pe thei lo cu an that. Cumi ruangah PDF taktak pawl cun an umnak an zingzoi ih an pawlkom sungtel zaten an kai thluh thei.

PDF komkhawm CDSOM hotu cun “An hotu bik phungki fawm a hruh ih PDF vekin an cangvai. Mino pahnih an kai ih, sumpai an neih lo tikah pakhat an that. Mino pakhat sawn cu a tlansuak ngah. An umnak hmun felfai zetih kan theih hnuah kan kulh ih tlan lo dingin kan auh. A lakin mi 7 cu October 19 ah kan kai ngah ih, a dang pakhat cu october 20 ah kan kai bet zo. An ralthuam zun 25 khal kan laksak thluh a si,” tin a sim.

Ralthuam Thawn Ralhrang A Pe Aw – Makui ramthen Gangaw myone Kankyi khua ih palik pakhat cu ralthuam thawn CDM a tuah ih, Gangaw PDF cun laksawng ah ting 50 an rak pe ve. CDM tuah palik cun G3 meithal zunkhat le cerek 89 a kengih PDF hnenah a hlan.

Gangaw PDF thuphuangtu cun “A tufang kan ram buainak ah CDM tuah palik le ralhrang an um peh ringring. Curuangah dothlengnak kan tuah reromi hi bansan men ding kan silo, a tawp tiang fehpi ding kan si. Ralhrang sunglam ah buainak nasaten an nei ih, lenglam ah an suakter duh lo men.

“CDm tuah duh tampi an um ih, an suah theinak dingah theitawk kan zuampi rero ve. Ralthuam thawn CDM tuah cu laksawng ah sumfai kan pe dingih,ralthuam keng thei lo CDM khal lungawi soparten kan cohlang thotho. Mulemal nei lo ralhrang hnuai ih um hnakin CDM tuah a him sawn a si,” tin a sim.

Ralhrang In Mungzua Mino Hotu An Hrem Bet – Ralhrang ralkap in rampi thuneihnak a lak peknak ah Mungzua mino pawl rak hoha ih lamzawh duhphorhnak ah rak kaihruaitu Wai Moe Naing cu ralhrang in October 20 ah thubuai 2 hmangin kum 4 sung thawngtla dingah hremnak an pe bet.

Thubuai pakhat cu rampi dokalh pukmah 505 a si ih, thubuai dang pakhat cu kiangkap hnaihnok pukmah 25 a si. A hlanah ralhrang cun thubuai dang hmangin Mungzua mino hotu Wai Moe Naing cu kum 10 sung thawngtla dingin hremnak an rak pe zo ih, tuitum an hremnak thawn ralhrang in Wai Moe Naing an hremnak zaten kum 14 a kim.

Mungzua miho hruaitu Wai Moe Naing cu 2021 April 15 ni ah ralhrang in mawtaw in an pah ih, an rak kai. Tu ah kum 14 sung thawngtla dingin hremnak an pe zo nan, thubuai dang relfel hrih lomi a um ih, ralhrang in Wai Moe Naing hremnak pek vivo bet an tum tin sihni pawl cun an sim.

Ralhrang 9 An Puah That – Sagaing ramthen Yinmarpin myone Yinpaung khua in suak ralhrang ralkap pawl cu October 20 zingah mipi ralkap pawlin bomb an rak puah ih, ralhrang 9 an thi tin mipi an theihter.

Yinmarpin PDF cun “Ralhrang pawlin Helicopter in Yinpaung khua ah ralhrang an ret. Ralhrang pawl cu Yinpaung khua in hmundang feh ding an si ih, khua an suahsan zawngah bomb kan rak puah. Ralhrang pawl bomb kan puahmi ahcun ralhrang 9 an thi ih hriamhma ngah an tam.

“Ralhrang pawl cu khua tin ah feh in hmunram thianfainak nei tum an si. Khua dang an thlen man hlanah bomb kan rak puah. Kanmah lawng siloin PDF tangtlang in ralhrang pawl bomb kan rak puah ih, bomb kan puah hnuah kan kap ciamco bet. Theitawkin ralhrang do vivo kan tum a si,” tin mipi an theihter.

Ralhrang Thlingthlatu Bawi An Kai – Karen ramkulh hmunram 5-nak sungah miphur vekin lemcang ralhrang thlingthlatu bawi Soe Myint an timi cu October 20 ah mipi ralkap komkhawm pawlin an kai ngah. Ralhrang thlingthlatu pawl cu khualtlawng phurtu vekin mawtaw thawn vakkual a si ih, Pistol le kutden bomb a rak kol.

PDF hotu cun “Thuhla kan theih ruangah kai ngah thei kan si. Khualtlawng phur vekin a cangai ih, ralhrang hrang thilthlatu a rak si. A hmin cu Soe Myint tiah an ko ih, Bu dinhmun a ngah zo. A ralthuam kenmi le a mawtaw khal kan laksak thluh.

“Kan kaih hnu ahcun a tih tuk ah a khur rero ih, ngaithiam in dil rero. Asinan, ralhrang hrang hnatuan a si tikah tlunlam ah kan kuat dingih, leitlun ralkap daan vekin ret a si ding. A sungte naivai zaten ralhrang an si thluh ih fimkhur a tul ngaingai a si,” tin a sim.

AA In Nunau Sualpitu An Hrem – Rakhine ralkap AA cun an sungtel lakin nunau sualpitu pahnih cu vei 30 an vau ih, kum 20 sung thawngtla dingin hremnak an pe bet.

AA sungtel pahnih cun Rakhine rakulh Buti tuang myone Cawngtaung khua ih kum 30 nupinu pakhat ,pasal nei lai cu ralthuam rinsan in an rak sualpi. Cucu, in an theih tikah AA sungtel an si ruangah an dim cuang lo ih, daan vekin hremnak an pe thotho. AA in an ralkap pahnih hremnak a pek thu cu October 20 ni ah mipi theihternak an nei.

UN In Myanmar Raltlan Kuat Tlung Lo Dingin Dil – Ralhrang in rampi thuneihnak an lak hnuah Myanmar mipi tamzet cu ramleng ah an tlan. Ramleng tlan lakah CDM tuah tampi khal an um ve.

Kan dungah Malaysia cun an ram sungih Myanmar mi an kaihmi pawl Myanmar ih an kuat tikah CDM tuah 6 an tel. Cucu, UN in tha an tilo tukih Malaysia lawng siloin Myanmar mipawl umnak India, Thailand le ramdang pawl cu an ram sungih Myanmar raltlan pawl Myanmar ah kuat kirsal lo dingin a simthei hai.

India in Mizoram ih Myanmar raltlan pawl kuat tlung an rak duh ve ih, Thailand khalin an ram sung tiangah Myanmar palik pawl milai dingin an rak fehter. Hivek a si tikah Myanmar raltlan pawl an him lo zet. Myanmar ih kuatmi pawl cu an dinhmun theih bet an si nawn lo tikah UN cun Myanmar ramri pawl cu Myanmar raltlan pawl Myanmar ah kuat nawn lo dingin a dilmi a si.