PDF Zoland In ZRA An Dawisuak

PDF Zoland In ZRA An Dawisuak – Chin ramkulh Tedim peng sungah ZRA cun mipi thilri an laksakih, dothlengnak hrang phurhmi ralthuam khal an rak long. Curuangah, PDF Zoland cun ZRA pawl cu an va kulh ih khua in an dawisuak thu mipi an theihter.

PDF Zoland cun “October 14 ah dothlegnak hrangih ralthuam phurtu mino pahnih cu Laitui lilawn ah ZRA lamin an rak kai ih, an velh hnuah ralthuam an laksak. ZRA pawl cu Saizang ah an riak. October 15 ahcun ZRA pawlin khuami pawl an dekcok ruangah kannih PDF Zoland pawl cu Saizang khua ah kan feh. Khua sungih buainak thlen kan duh lo ruangah ZRA pawl cu khua ih suak dingin thu kan pe.

“ZRA pawl cun mipi thilri an laksakmi pawl cu an pe duh lo ih,an bike khal la man loin ke in an tlansuak. October 16 ah ZRA pawl cu ralhrang rinsan in lungto mawtaw pakhat an to ih, hramlak ah an tlan. ZRA pawl cu mipi thilri an laksami pe sal dingin kan theihter ih, mipi lam khal ZRA cangvaihnak hminsin nei pohpoh cu kan hnenah in pe dingin kanlo dil ve. Kan hmunram sungah dankalh cangvaihnak cu kan do vivo ding.

“ZRA ih bike pawl cu kan hnenah a um ih, ZRA pawlin an bike ngahsal an duh asile mipi thil an rukmi pawl thawn Mansuang lilawn ah kan thlengaw thei ding. ZRA lamin an thil rukmi pawl mipi hnenah an pe duh cuang lo asile ralhrang tuanpi an si timi kan nemhnget dingih kan tuah dingmi kan tuah ve thlang ding a si,” tin thu an suah.

CDF In Ralhrang Helicopter Kap Ngah – Chin ramkulh Kanpetlet ah CDF kanpetlet cun ralhrang Helicopter pahnih zamlai an kap ih , an kap fuh ngah tin mipi an theihter.

Ralhrang pawl cun October 15 ah Kanpetlet ah ralhrang an ret betih, ralhrang an ret betmi pawl cu Helicopter in an thiar. Ralhrang pawl phurtu Helicopter pahnih cu Kanpetlet CDF pawlin meithal in an rak kap ih, Helicopter an kap ngah rori tin thu an suah.

CDF Kanpetlet cun ralhrang Helicopter ih pangka pakhat an kap siat ngah tin an sim ih, Helicopter an kiat siatmi ah ralhrang thi le ralhrang hriamhma ngahzat tivek cu an theihfel hrih lo thu CDF Kanpetlet cun an sim.

Kanpetlet CDF thuphuangtu cun “Ralhrang pawl cun October 15 in Kanpetlet ah ralhrang an retkhawm zo ih, Helicopter in an thiar. October 16 khalah ralhrang pawl cun Helicopter in ralhrang pawl an thiar pehih, Kanpetlet ah an ret bet. Zinglam ah ralhrang Helicopter a ttum hmaisa ih,thaten kan rak zoh. A fehnak hmun kan hminsin ih neta a ratsal caanah kan rak kap. Tlangpar a si tikah sangpin a zam lo. A hlan khalah niamten a zam theu. Kan kap dah lo ih, ka kap ding an ruat ban lo si ding. Ralhrang Helicopter ih thla pakhat le datsi bawm kan kap ngah. Asinan, Helicopter cu a tla lo ih, a zam peh thei. A sungih ralhrang tuar dan cu kan thei hrih lo a si,” tin a sim.

Fimzirzung Hotu An Kap That – Chin ramkulh Matupi khua ih fimzirzung hotu U Tin Lui’ cu October 16, zan nazi 8 hrawngah a umnak inn ah an kap that.

U Tin Lui’ cu ralhrang in rampi thuneihnak an lak hnuah ralhrang hnuaiah hnatuan peh vivo a si ih, a inn ihsin hnatuan a peh. October 16 ahcun a umnak a inn sung rori ah an kap that. Tuhrih tiang ziang pawlkom in U Tin Lui’ an kap that timi theih a si hrih lo.

Matupi ih um pakhat cun “Kannih cu a thih hnu lawngah an kap that timi kan theifang. A kap thattu pawlkom pawl cu an tlan hngal ih, mipi in kan thei man lo a si,” tin a sim.

Hakha Mitat Zung A Kang – Chin ramkulh Hakha khawpi Hakhathar vengih District mitat zung cu October 15 zingah a kangih a kiangih um mitat mawtaw pahnih khal a kang siat tin an sim.

Mitat zung kang cu zinglam ah a si ih, mipi in an zoh ngam lo tikah ziangtin an mit tikhal an thei lo. A lang dan vek asile mitat zung cu tlakrawh ih sak a si tikah a inn cu a kangse tuk loin a langih a hnuai ih an retmi mawtaw pahnih lawngte hman a tlak nawn hmel lo.

Hakha ih um pakhat cun “A tufang cu kannih Hakha ah puak awn kan thei deuh ringrig. Cuvek caan ah mitat zung a kang betih mipi cu kan um a nuam lo zet. Mitat zung kang ruangah mawtaw pahnih a kangsiat. Ziangtin a kang, ziangtin an mit timi cu zinglam a si tikah kan pan ngam lo ih kan thei lo a si,” tin a sim.

Min Aung Hlaing In Ralhrang Pawl A Hro – Ralhrang ralkap hotu Min Aung Hlaing ih fehnak le khualtlawnnak thuhla mipi lakih a darh ringring ruangah Min Aung Hlaing a thinheng tuk thlangih a kuthuai pawl naa tukih hrem dingin a hro.

Pin Oo Lwin ah Min Aung Hlaing a feh timi cu ralhrang lamin an thup tum rero nan mipi lakah a darh. Min Aung Hlaing le a sungte pawl tlangleng in Shan ramkulh ah an feh ding timi khal an feh man hlanah thuhla a rak darh ih, Min Aung Hlaing le a sungte pawl cu tutiang Shan an feh ngam hrih lo.

Curuangah Min Aung HLaing cu Pin Oo Lwin in Shan lamah a lan duh lo ih Mawlamaing lamah Helicopter in a feh. Thuhla a darh bangin Min Aung Hlaing cu Pin Oo Lwin ah a rak feh taktak ih, ralhrang zirnak nei pawl amah rori’n a va hril. Tu khalah Mawlamaing ah mah rori in ralhrang zirnak nei pawl a hril bet ding.

Mawlamaing khalah Min Aung HLaing ih fehnak cu ralhrang pawlin an kil thepthep tin a rak hmutu pawl cun an sim. Mawlamaing ahcun Min Aung HLaing in a kuthnuai pawl thupthup darhter nawn lo dingin a hro ih, thuthup darhtertu cu theih a si tikah naa tukih hrem dingin thu a pe hai.

Thuhla theitu cun “Pin Oo Lwin ih Min Aung Hlaing a feh thu cu mipi hnenah a rak darh hmaisa ih, cumi hnuah ralhrang pawl cun anmai thuthang MRTV ah an phuang ve. An duhmi cu Pin Oo Lwin a umlai ih thuhla a darhmi a si ih, anmah ralhrang cun Pin Oo Lwin ih Min Aung Hlaing a um nawn lo hnu lawngah thuhla a suah.

“Cumi hnuah Min Aung Hlaing cun a sungte pawl a hruai tumih Special tlangleng thawn Shan feh an tum. Cumi khal mipi lakah a rak darh manih an tlangleng to tummi zuk tiang a darh. Curuangah Shan ramkulh an feh tummi cu an thulh hrih lo ih, ziangtikah an feh ding tikhal a rel duh nawn lo. Mawlamyaing khal tum lopi in ra a si ih, hmunkip ah ralhrang kiltu an ret. A fehnak thuhla a darh ringring ruangah a thinheng tuk thlang a si,” tin a sim.