Putin In Min Aung Hlaing Thu A Tiam

Putin In Min Aung Hlaing Thu A Tiam -Ralhrang hotu Min Aung Hlaing cun hmaiton in Russia president Putin a be thei thlangih, an biakawknak ah Putin cun Myanmar an tuanpi vivo ding thu in a rak tiam.

Putin cun Min Aung Hlaing hnenah “Upatnak ka lo tong thei ih, kan lungawi tuk. Kannih Russia cu Myanmar ih rintlakmi nan tuanpi kan si. Ram pahnih kan tuantlangnak ah hmailam kan pan tuk zo. Tui dinhmun ah sipuazi lamih kan tuantlangnak cuti ciamco a si hrih lo nan, theitawk kan suahtlang vivo ding.

“Tui dinhmun ah Myanmar rampi Prime Minister dinhmun sinak in kan sawmnak na ngai poimawh ih Russia na ra thlen thei ruangah kan lungawi. Nangthawn kan tongaw thei cu kan lungawi ngaingai a si,” tin a simthei.

Min Aung Hlaing cun “Keikhal Russia President thawn kan tongawk thei ruangah ka lungawi tuk timi ka rel hmaisa duh. Tu ah na rel zo bangin ram pahnih kan tuantlangnak kum 15 sung kan lut thlangih thuanthu thar a tling tin ka ruat. KUm 15 sungah dinhmun bangaw lo zet a um theu ding nan, kum 10 liam zo ihsin Russia le Myanmar pehtlaihnak a tha tuk zo tin ka hmu.

“Nangmah ruangah Russia khal a thangso ih, Kum 30 liam zo ah harsatnak phunphun nan tong nan, nangmai kaihruainak zarah Russia ram khal leiltun bik dinhmun nan si thei zo. Mi kaihruai na thiamnak khal kan lo lawm duh ih, ka lo lungawipi ngaingai. Leitlun hruaitu pakhat na si vekin leitlun buainak ah dik zetih ro na relmi khal kan hmu a si,” Min Aung Hlaing cun Putin a lawm.

Putin Le Xi Jinping An Tongaw Ding – A tufang Russia ram ih tlawng China palai hnenah Russia president Putin cun September 15 le 16 ih tuah dingmi Shanghai Cooperation Organization meeting ah China president Xi Jinping thawn kan tongaw ding tin Putin cun China palai a simthei.

Russia president Putin le China president Zi Jinping tei pahnih cu 2022 kum thok khalah an rak tongaw zo ih, ram pahnih tuantlang dan dingah remawknak tampi an rak nei. Tu ah China cun Russia suak Gas le Yinan an lei rero ih, ram pahnih tuantlangnak a hnget deuhdeuh.

Hivek dinhmun ah Russia president Putin le China President Xi Jinping tei pahnih tongaw sal ding an si ih, ram pahnih tuantlang dan ding rel peh vivo an tum. Europe ram le US in Russia an hrem rero laiah Russia cun lamtang a rak hawl rero ve ih, tu ahcun China cu Russia tuanpimi ram picang pakhat an si ve.