Mon ramkulh Yi myone Kabia Kyi khua ih ralhrang ralkap lamtang Pyu Saw Htee hotu U Htar Wai cu May 13, zan nazi 6 hrawngah Yibilu pawlkom an inn sungah an va kap that.
Yibuli hotu cun “U Htar Wai cu a hlan ihsin khawlal a si ih, ralhrang kuthnuai ah theitawk in ralhrang a dinpi. Khua sungah duhtawk in hro a suangih,mipi cun kan hnenah a thuhla an thlen. Khawlal a si tlunah ralhrang dinpitu Pyu Saw Htee hotu khal a si.
“Mipi lam dilnak vekin May 13, zan nazi 6 hrawngah a inn ah kan feh ih, kan va kap that. A hmun rori ah a thi cih. Pyu Saw Htee hotu U Htar Wai in kuthnuai 8 a nei. Ralhrang rinsan in a kuthnuai pawl thawn tangka thapnak an tuah ih, ralhrang pawlin an kil theu.
“Ziangahtile, hlawknak an ngahmi sungin ralhrang pawl tangka an pe ih, an tlon. Hivekin mipi zawn a ruat lo, a hamthatnak lawng a ruatih, mipi a hnaihnok ruangah mipi heknak vekin kan ret tha lawlaw. A inn ah meithal zunkhat kan hmu ih,cukhal kan laksak cih a si,” tin a sim.
KNU le Ralhrang An Do Aw Peh – Karen ramkulh Tantuang kyi myone Liktu myone mailuan khua kiangah ralhrang ralkap le KNU ralkap KNLA pawl may 13, zinglam ah an do aw ih, doawknak ah ralhrang 2 an thi tin KNU cun an sim.
KNLA ralbawi cun “May 13, zinglam nazi 6:30 hrawngah do aw kan si. Nazi 8 hrawng cun doawknak thawmvang a reh. Zing nazi 10 hrawngah kan kap aw sal ih, sun nazi 1 tiang doawknak a sosang. Doawknak ah ralhrang 2 an thi fel ih, ralhrang 4 hrawng hriam an gnah in kan hmu. Doawknak ih thi ralhrang le hriam ngah ralhrang pawl cu zanlam nazi 4 hrawngah ralhrang pawlin mawtaw dangin an phursuak.
“May 11 ah Mailuan kiangih ralhrang sakhan kan rak kap zo. Cumi ruangah ralhrang pawl cun may 12 , zan nazi 9 hrawngah Mailuan kiangkap ih mipi umnak khua cu ralthuampi in an kap ciamco. May 13 ah ralhrang mawtaw 3 an thleng betih, doawknak cu a sosang sinsin dingin a lang.
“Ralhrang pawlih kahsuahmi ralthuampi cun inn pakhat a tlak siat ih, mipi lam hriam ngahzat felfai in kan thei hrih lo. Kiangkap khua mipi pawl cu ralhrang in an thilri an phurter ih, ralphaw ah an hmang. Ralhrang in ralphaw ih an hmanmi mipi lakin mi 3 cu an tlansuak ngah ih an him. Kan boruak a sosang ih, mipi cu fimkhur ten um dingin kan cah duh a si,” tin a sim.
Leave a Reply