Sagaing ramthen Tamu khawpi , Sawbua veng ah India rammi pahnih cu July 5, sun nazi 1 hrawngah ralhrang tuanpi Pyu saw Htee pawlin an kap that.
Pyu Saw Htee pawl ih kah thatmi India rammi pahnih cu Mohan ( kum 28 ) le M.Lyarnar ( kum 35 ) an si. Pyu Saw Htee pawlin ziangruangah India rammi pahnih an that timi a san theih a si hrih lo ih, ralhrang lam khalin a san an phuang hrih ve lo.
Tamu ih um pakhat cun “Thuhla kan theih dan vek asile sumpai an thleng tin an sim. Pakhat sawn cu tungzing mawng a si. Tamu le Mohre ah thilri an phur theu. Thuhla a darh veten India ralkap pawl cun Mohre ah nasaten Myanmar rammi pawl an cek ciamco ih, theitawk in an tlan ciamco.
“Ram buainak ruangah CDM hrekkhat pawl cu India ramsung Mohre lamah thilzuar in an um. Cumi pawl tibuai duh ah Pyu Saw Htee pawlin India rammi pahnih an kap that hrim khal a si thei. Hivek a si hnu ahcun ramri sukso a ol nawn lo ding. Khatlam ahcun mithi pahnih ih sumpai khal Pyu Saw Htee pawlin an la ko ding. Thuhla fel a suak mai ding.
India cozah hi ralhrang tuanpi an si ih, ralhrang thawn an karlak boruak se lo dingin Tamu ih India rammi pahnih an thih thu ah ralhrang pawl cu thuphan an per rori dingah ruah a si ih, India rammi thattu ah PDF pawl an puh ko ding. Asinan, Pyu Saw Htee pawl ih thahmi timi cu zokhalin kan thei thluh zo. Pyu Saw Htee pawl cu ralhrang tuanpi an si,” tin a sim.
Tio Tiva ih Fen An Hmu Hrih Lo – India le Chin ramri Tio tiva ih fen salai Run Lian Cung ( kum 15 ) cu ni 4 hnu khalah a ruang an hmu hrih lo.
Salai Run Lian Cung cu Chin ramkulh Hakha khawpi ih um a si ih, Mizoram lamah caw tawlin a feh. July 2 ah Tio thlengin Tio tiva ah dai a bual ih,cutin a fen cih. A fen timi a rualpi pawl in an hmuh tikah runsuak dingin theitawk an zuam rero nan, an runsuak thei lo.
Ruang hawltu pakhat cun “A rualpi pawlin an runsuak thei lo tikah thuhla kan simdarh vivo ih, mizoram lam siseh kannih Thantlang lam khalin a ruang kan hawl peh rero. Fur caan a si tikah tidai a tam tukih ruang hawl a ol lo. July 5 tiang ahcun a ruang kan hmu thei hrih lo a si,” tin a sim.
Bomb Puah Sual Ruangah Thi – Chin ramkulh Thantlang peng sung hmun pakhat ah CDF Thantlang sungtel Salai Bawi Za Ceu cu bomb puah sual ruangah a nunnak a cem.
Bomb cangsualnak ah CDF Thantlang sungtel pahnih an um nan, pakhat sawn Salai Bawi Za Ceu a thi ih, midang pakhat sawn cu hriamhma naa tuk a ngah ruangah theitawk in tuamhlawm rero lai a si.
Mipi ralkap pawl cu ram buai hnuah mahten ralthuam hman dan zir le mahten ralthuam tuah an si tikah an cangsual pang theu. An tlunlam upa cu KIA, KNU, AA, CNA tivek tlangpar ralthuamkai hnenah zirnak felfai nei an sinan, caan reipi zir loin a takih an hman hngal a tul ruangah nunnak hloh phah an um hnuaihni zo.
PDF 11 An Thi ih Ralhrang 40 An Thi– Sagaing ramthen Wetlet myone sungih doawknak ah PDF lam 11 an thi ih, ralhrang ralkap lam 40 hrawng an thi tin Wetlet PDF cun July 5 zan mipi theihternak nei in thu an suah.
Ralhrang ralkap cun July 2 ah Wetlet myone Wetle khua an rak pan ih, PDF pawl thawn an do aw thok. Nikhatnak an doawk ttumah ralhrang 2 an thi ih, hriamhma ngah ralhrang 3 an um. Cumi ruangah ralhrang pawl duhtawk in kiangkap an kap ciamco ih, mipi tuar ding duh lo ah PDF pawl a langten dung an sipsal.
Ralhrang pawl cu Wetle khua in Likungly khua an pan ih, zan nazi 12 hrawngah Minzua an thleng. Minzua ih mipi inn hrekkhat an urkang ih, duhtawk in mipi thilri an cen.
Minzua ih um ralhrang pawl cu July 3 zinglam nazi 6 hawngah Wetlet PDF pawlin an va kapsal ih, sun nazi 12 tiang an kap aw. An doawknak ah ralhrang pawl ralthuam an rak nei tha tukih, PDF lam dung an sipsal nan ralhrang pawlin PDF hrekkhat an kap that ngah.
PDF pawl sawmkhawm aw in ralhrang ralkap va do an sinan, ni 2 sung an doawknak ah PDF lam 11 an thi ih, ralhrang in mipi thahmi an neih ruangah PDF thi thawn kom cun mipi lam 20 hrawng thi kan um tin Wetlet PDF thuphuangtu cun a sim.
Minzua ih doawknak ahcun mipi ralkap lamin Tiger king, Mattaya PDF, GZ Special Task Force, LPDF le Burmes Dragon Force pawl an tel ih, an zaten Minzua ih doawknak thuhla cu mipi theihternak an nei ciar.
Karen Ah Ralhrang 410 Tlun An Thi – Karen ralkap KNU hmunram Kawtulay sungih thla 1 sung doawknak ah ralhrang 410 an thi tin Central KNU cun July 5 ah thu an suah.
Kawtulay ahcun ralhrang ralkap le BGF pawl an tangtlang ih KNU ralkap KNLA,KNDO le PDF pawl tangtlang in an do. June thlasung lawngah vei 365 an do aw ih,Cumi ah ralhrang 410 an thih tlunah ralhrang hriamhma ngah 335 an um. KNU lamin june thlasung ih doawknak ah miraltha 17 an thi ih, miraltha 28 in hriamhma an ngah tin KNU cun an thusuah ahcun an tarlang.
June thlacem ihsin KNU hmunram 6-nak sungah sakhan cuh aw in doawknak a sosang ciamco ih, ralhrang ralkap thi an tam tikah ralhrang cun raldonak vanzam tiang an hmang rero zo. June 27 in 30 tiang ralhrang ralkap cun raldonak vanzam in KNU pawl vei 94 an kap. Tutiang KNU le ralhrang pawl cu sakhan cuh aw in an do aw peh rero lai hrih a si.
Ralhrang in SNLD An Cek Fel – Ralhrang ralkap kuthnuai ih hrilawknak tuanvo neitu thar UEC cun 2023 rampi hrilawknak hrang rampi party pawl cekfelnak kan nei ding tin thu an suah hnuah NLD party le SNDF party cek hmaisabik an si ding thu mipi an rak thanter.
NLD cun ralhrang ih cek kan duh lo ih, hrilawknak khalah kan tel lo ding tin thu an rak suah. A thok ahcun Shan party picang SNDD khalin ralhrang cek kan duh lo an tinan, an party him vivonak hrang ralhrang an cekter zo thu an suah.
SNLD party thuphuangtu Sai Kyaw Nyut cun “Thu pipa ciamco cu a silo nan, kan party bal a si lonak dingah kan cekter ve men. Ziangahtile, Shan ramkulh dintha dingin le Shan ramkulh thansohnak ding hrang ke kan kar vivo a tul ih, kan party a um hrih a tul. Cumi ruangah cekter kan si,” tin a sim.
Ralhrang hnuai ih UEC cun “June 30 ihsin SNLD party ceknak kan nei ih, July 3 tiang caan kan hmang. Shan khawpi Tuangkyi ih an hmunpi kan cek ih, tlaksamnak mallai an nei tilo cu thudang ciamco daan pahbalmi an nei lo. Tui dinhmun ah party 85 pawl kan cekfel thluh zo ih, NLD party telin party 6 lawng cek ding kan nei thlang a si,” tin thu an suah ve.
Manipur Leimin Ah Ruang 42 An Phorh Zo – India ram, Manipur State Tupul ramthen sungin tlangleng zin tuahnak min ah ruang 42 an phorhsuak zo ih, mihlo tampi an um lai tin runsuah hnatuantu pawlin an sim.
Ruahcen ruangah June 29 ah lei a rak min ih, leimin cu tlangleng zin hnatuan ralkap le hlawh aw pawl a rak nen. Leiminnak hmun cu India ralkap ,palik le mipi tangkhawm cun theitawk in an haisuak rero ih, ni 6 sungah ruang 42 an phorhsuak zo.
Ruang an phorhsuakmi ah mi 27 pawl cu ralkap an si ih, mi 15 pawl cu hlawh aw mipi an si. Tu ah mi 20 hrawng an hlo lai in an sim ih, ruah a sur peh ruangah duh vekin leimin ih silh thatmi pawl ruang an phorhsuak thluh thei hrih lo.
Leimin ih nenmi ralkap 7 lawng nungdam in runsuah ngah an si ih, an zaten sizung ah tuamhlawm rero lai an si. Midang hlo pawl cu a theih dandan in an hawl peh rero ih, ruang an hmuh thluh hlanhlo hawl an tum. A tufang India ramsung hmun tamzet ah ruahcen ruangih tilian le leimin tuar tampi an um.
Leave a Reply