Ralhrang 5 Nungdam In An Kai

Shan le Kaya ramri Myobe-in nisuahnak lam Hti Rih khua ih umhmun khuar ralhrang ralkap pawl cu May 12, zinglam ah kareni mipi ralkap komkhawm in an do ih, ralbawi pakhat telin ralhrang 5 kan kai ngah tin an sim.

A kiangih um pakhat cun “Zinglam nazi 4 hrawngin meithal puak awn kan thei zo. Zinglam nazi 6 hrawngah phekung lamin ralhrang cun doawknak hmun cu ralthuampi in an kap. Nazi 7 hrangah raldonak vanzam a thleng cih. Doawknak thuhla cipciar cu kan thei thluh hrih lo nan, ralhrang 5 nungdam in an kai timi cu felfai in kan thei.

“Ralhrang sakhan ah ralhrang ziangzat an um timi tla kan thei hrih lo. Hmundang in ralhrang mawtaw 5 an thleng cih ih, doawknak a sosan ruangah kiangkap khua mipi pawl cu hmunhim pan in kan tlan thluh. Khua mipi lakin mithi an um le um lo tla kan thei hrih lo a si,” tin a sim.

Hti Rih khua cu Shan le kareni ramri Moebe nisuahnak lamih um khua a si. Hti Rih khua in Moebe le Loikaw feh a theih tin an sim. Hti Rih khua ih umhmun khuar ralhrang pawl cun lamzin sukso mipi pawl duhtawk in sumpai an dil ih, an cek theu. Cuvek ruangah Kareni ralkap komkhawm in an do. Kaya ramkulh cu Ralhrang ralkap in rampi thuneihnak an lak hnuah tuini tiang theitawk in ralhrang do rerotu hmun pakhat a si.

May 7 khalah Kareni ralkap komkhawm KNDF le KA cun ralhrang mawtaw fehkhawm bomb an puah ih, ralhrang mawtaw 3 a siat, ralhrang mawaw siat 3 pawl cu kan urkang sak lawlaw tin mipi an theihter.

Pyu Saw Htee Sakhan An Kap – Sagaing ramthen Pale myone Ziphyokung khua ih ralhrang ralkap le Pyu Saw Htee pawl umhmun khuarnak hmunpi cu Bo naga hohami MRDA le an tuanpi PDF komkhawm cun May 10, zinglam nazi 11 hrawngah an do ih, ralhrang thi an tam tin May 12 ah thu an suah.

Bo Naga cun “Felfai zetin kan dodan ding kan ruahawk hnuah ralhrang le Pyu Saw Htee pawl umnak hmunpi kan do. Curuangah, ralhrang lam thi an tam ding. Zinglam nazi 11 in kan do aw thok ih, Zanlam nazi 2:45 hrawngah Mungzua in ralhrang raldonak Helicopter a ra thleng. Cucun,tlunsang in leihnuai lam in kap.

“Salinkyi lam khalin doawknak hmun lamah ralhrang mawtaw an ra cih ve. Kan lamih ra ralhrang ralkap mawtaw pawl cu lamlak ah bomb kan rak puah ih, ralhrang mawtaw 3 a siat in kan hmu. Zan nazi 6:50 hrawngah Mungzua in ralhrang raldonak Helicopter pakhat kan hnen lam panin a ra thlengsal. Zanlam nazi 7:30 hrawngah ralhrang Helicoper cu Mungzua lamah an kirsal ih,kannih khal dung kan sip. May 11, zan nazi 6 hrawngah Ziphyokung khua ih suak ralhrang ralkap mawtaw bomb kan puahsal. Tu ahcun ralhrang mawtaw siat lo pawl cu Pale an thleng zo a si,” tin a sim.