Ralhrang 6 An Kai, Ralthuam Tampi An Laksak – Karen ramkulh KNU hmunram 6 sungih ralthuam le eiin phur ralhrang ralkap pawl cu KNU ralkap KNLA miraltha rual pawlin an rak kai ih, an ralthuam khal an laksak.
KNLA sungin Cobra pawlkom cun “Ramri lan ralhrang ralkap pawl kan rak kai ngah. Ralbawi Yezin Aung ih hohami ralhrang 6 pawl cu September 9, zinglam nazi 10 hrawngah Myawaddy le Wawlay lamzin ah kan rak kai ngah. Ralthuam kan laksakmi pawl cu MA3 zun2, MA1 zunkhat, MA2 zunkhat, MA4 zunkhat, MA5 zunkhat, Cerek bawm 17,kutden bomb 2,khauhsuai dip 12 le thildang neuhneuh pawl an si. Kan kaih ngahmi ralhrang ralkap pawl cu leitlun ralkap dan vekin kan rettha a si,” tin thu an suah.
Ralhrang ralkap pawl cu Myawaddy myone Wawlay hmunram sungih um ralhrang dang pawl hrang eiin le ralthuam phurhsaktu an si ih, an tumram an thlen man hlanah Cobra miraltha pawlin an rak kai ngah ih, an ralthuam le eiin phurhmi zaten an laksak thluh.
Ralhrang Pawl Social Ih An Thiltum An Hlawhsam – Ralhrang ralkap cun kanmai lam thuhla duh vekin kan tarlang thei lo an ti ih, Facebook le Youtube thleng an tum nan, an hlawhsam lellel ih, zianghman tuahsuakmi an nei thei hrih lo.
Ralhrang ralkap in rampi thuneihnak an lak hnuah Facebook le Youtube cun ziangkim ah ralhrang ralkap pawl an phit thluh ih, ralhrang ralkap in Facebook le Youtube ah zianghman an thlah thei lo. Curuangah ralhrang ralkap cun Myanmar ah Facebook hman theih lo dingin phih an tumih, Youtube aiawh khal tuah an tum.
Cumi thu ah ralhrang palai Myo Myint Maung cun “Tu ah kan san rero fang a si ih, zianghman thu felfai a um thei hrih lo. Youtube le Facebook in kan thuh thlahmi pawl an hlon ringring ruangah lamzin thar kan hawl ve a tul. Curuangah tawlrel phah kan si,” tin a sim.
Ralhrang ralkap cun Myanmar ah Facebook hman theih nawn lo dingin phit an tum nan, tuini tiang an phit thei hrih lo ih, Youtube aiawh ah Mtube tuah an tum nan, tutiang an tuahsuak thei hrih lo. Kan dungah ralhrang cun MRTV App an rak tuah nan, nihnih fangah Google in an hlonsak cih.
Yangon ih mithiam pakhat cun “Ralhrang pawl tuahtummi cu an hlawhtlin ka zum lo. Asinan, N.Korea vekin Facebook hmang pohpoh kan lo kai ding tin thu an suah a si ahcun mipi hrang a him lo zet ding. Tuhrih ahcun cuvek thusuak a um hrih lo. Cuvekin thu an suah a si lo ahcun Facebook khal an phit thei lo dingih, Youtube aiawh khal an tuah thei lo ding. Ziangahtile,dothlengnak mino pawlin kan hek asile niziat khal daih loin an se thluh mai ding a si,” tin a sim.
US Palai 8 In Taiwan An Tlawng – China in nasaten ralrinnak a pe rero nan, US cun China ih ralrinnak pekmi cu zianghmanah an ruat lo ih, US palai 8 pawl Taiwan ah an tlawng men.
August thlasung ah US palai cun vei 5 rori Taiwan an rak tlawng zo ih,tuitum September thla thar ah US palai 8 cun Taiwan an tlawngsal. US palai pawl cun Taiwan president le ram hruaitu pawl an kawm ih, Taiwan in dotu an nei pang asile US in ralthuam an san thei ding thu le ralthuam thu ah bomnak phunphun an pek thei ding thu an sim.
Taiwan hi zalennak ngah fel dingin zuam rero an si ih, China cun kan ramsung in ziangtik hmanah nan suak lo ding tin an rak hro ve. Hivek dinhmun ah US cun nasaten Taiwan an dinpi ih, an tlawng rero men.
Tutiang China lam a takih an cangvaihlonak ah thu tampi a um ve. US in raldo dingin Taiwan an nor reromi China lamin an theithiam titu an rak um ve. Khatlam ah China hi Ocotober thla ah president thar hrilaw ding an si ih, president tuan rero lai Xi Jinping cun a ttum thumnak hrang kum 5 dang president tuan peh a tum. Hrilawknak an tuah hnuah China lam an cangaih dan danglam thei ah ruah a si.
Leave a Reply