Ralhrang 9 An Kap That Aw – Yangon ramthen Thanhlin myone Sitpinkun khua ih kilhimnak hnatuan ralhrang ralkap pawl cu August 31, zan nazi 10:45 hrawngah anmah le mah an kap aw ciamco ih, ralhrang 9 an thi tin ralhrang sung thuthup a suak ih, Thaihlin Channel le RFA khalin thu an suah.
Ralhrang pawl cu Duty hnatuan dan dingah tongkam el aw an si ih, ralhrang pahnih lungrual cun an rualpi ralhrang 9 an kap that ih, ralthuam famkim thawn an tlan cih. Ralhrang tlan pahnih cu kaih an si hrih lo ih, ralhrang lamin theitawk in an hawl rero lai.
Ralhrang pakhat cun “Duty ding ralhrang pawl anmah le mah an buai ih, an kap aw ciamco. A hmunah ralhrang 9 an thi ih, ralhrang pakhat le nauhak pakhat hriamhma an ngah. Ralhrang pahnih cu ralthuam famkim thawn an tlan ih, kaih an si hrih lo. Tipar ih lawng, lamzin ih mawtaw khal an cek ciamco. Ziangahtile,midang ralhrang 9 kap thattu ralhrang pahnih cu an tlansuak man hrih lo dingah an ruat,” tin a sim.
Thanhlin ih um pakhat cun “Thanhlin lilawn Tinyinta khua thlen hlan ihsin mawtaw sungah zohman um an siang lo ih, in tumter thluh. Lamzin ah a tlar’n in fehter ih mask khal bun in siang lo. Cutin lamzin sukso pawl cu pakhat hnu pakhat in cek vivo a si,” tin a sim.
Thuhla theifiangtu pakhat cun “A taktak ahcun ralhrang 7 an thi ih, midang pahnih cu ralhrang innsang nunau veve an si. An zaten 9 an thi. Ralhrang pakhat le nauhak pakhat hriamhma an ngah. Curuangah a thi zaten ralhrang 9 an ti khalle a dik thotho, ziangahtile, nunau 2 khal ralhrang lamtang an si. Buainak a suak tikah duhduh in an kap aw ciamco ih, anmah thentu nunau khal an kap that ngah. Ralhrang thi pawl cu Bokyi Myo Han, Aung lay, Lin Lin Htwe, Naing Kyi, Myo Min Khant, San Win , nupinu kum 50 mi le naunau kum 20 pawl an si,” tin a sim.
CDM Palik Hnenah Ting 70 An Pe – Makui ramthen Saw Myone palik sakhan in CDM tuah palik Ngyin Min cu ralthuam famkim thawn CDM a tuah ruangah mipi ralkap lamin laksawng hrang ting 70 an rak hlan ve.
Palik Ngyin Min cun CDm a tuah ding zawngah bomb 4, cerek 300, G3 zunkhat, cerek bawm 2 pawl a tlanpi ih, CDm The Youth Force hnenah a hlan. Ramsung mipi ralkap pawlkom pawl cun ralhrang le palik lakin ralthuam famkim thawn CDM tuah an um asile laksawng hrang tangka fai an pek ding zat an rak kam cia ih, tu khalah palik Ngyin Min cu ralthuam famkim thawn CDm tuah a si ruangah laksawng hrang ting 70 an hlan.
The Youth Force hotu cun “Ralhrang ralkap le palik pawl CDM tuah dingin kan sawm duh. Zokhal CDM tuah duh hrang sangka kan onsak ringring. Ralthuam famkim thawn CDm tuah pawl cu laksawng ah sumfai pek an si dingih, ralthuam an tlanpimi ih zir in laksawng kan pe theu a si,” tin a sim.
A tufang ramsung ah meithal zunkhat an lei ding asile a malbik ting 50 a tul tin an sim ih, meithal ih zir in zunkhat ting 100 man khal a um. Cutlukin ralthuam man a tam ih, ralthuam famkim thawn CDm tuah pawl cu laksawng pek an phu tuk rori tin mipi lam khalin an sim.
Chin ramkulh Paletwa peng Tanthaung ralhrang hmunih hnatuan ralhrang pakhat khal CDF daai hnenah CDm a tuah ve ih, CDF daai cun hmunhim ah an kuat zo thu casuah in mipi theithernak an nei ve. CDF Daai hneni pe aw ralkap pakhat cun “Thi ding rori’n hmainortu ralkap ah in ret ih, cumi pom thei lo ruangah CDM tuah ka si,” tin CDF daai a simthei.
India Ah Biakinn An Suasam – India ram Punjabm State Taran District ah misual pawlin biakinn an suasam ih, Pastor mawtaw khal an urkang.
India palik cun “Hmaituam 4 in Biakinn an luhcilh ih, biakinn kiltu meithal in an tin hnuah a kut an ttawn ih, biakinn sungih thilri a siatsak ciamco hnuah Pastor ih mawtaw an urkang. Misual pawl cangvaih lai cu CCTV ah a lang thluh ih, misual pawl kai dingin theitawk kan zuam rero lai, kan kai lohli thei ko ding,” tin thu an suah.
Punjbam CM cun ‘Hivek thil a thlen cu a poi tuk lawlaw. Kan state sungah biaknak ruangih buainak , khat le khat hremawknak le harsatnak pekawk tivek cu ziangtik hmanah rem kan ti dah lo ding. Tuitum ih biakinn tisiattu pawl khal kan zingzoi dingih kaih an si tikah an phutawk hremnak kan pe rori ding a si,” tin a sim.
Hivek ruangah Punjab State sungih Khristian pawl cun lamzawh duhphorhnak an nei ih, biakinn siatsuahtu pawl cu an phutawk hremnak pe dingin,kai ngah tengteng dingin palik le cozah hruaitu pawl an nor.
Punjab ih biakinn siatsuah a si hlanah Sikh biaknak lamih hotu pakhat Akal cun “Khristian Misionay pawl hi an tha lo, Sikh le Hindu pawl an duh lo cingin Khristian ah luhter an tum ih, mi tampi an hruaisual zo. Curuangah hivek cu india cozahpi in a kham a tul,” tin Facebook ah live a thlah ih, thu a sim. Cumi hnuah Punjab ih Khristin biakinn siatsuah a si.
China In Taiwan Nun An Sim – China le Taiwan ram buainak ah China cun Taiwan thu an sim ih, US hnenin ziangtluk ralthuam tha khal nan dong asikhalle kannih China cu ziangtik hmanah Taiwan doneh thei dingmi kan silo tin an simthei.
China le Taiwan buainak ah US cun nasaten Taiwan an dinpi ih, ralthuam tampi an leiter zo tlunah ralthuam thatha khal leiter bet an tum. Khatlam ah a lakih ralthuam pekmi khal an nei. China lamin ziangtluk in kham khal sehla US cun Taiwan an bawm peh ringring ih, tu khalah ralthuam thasawn leiter an tum.
Hivek ruangah China lam an rak tongsuak ih, US hnenin ziangtluk ralthuam tha lei khal uhla ziangtik hmanah China nan neh thei dah lo ding tin China cun Taiwan an simthei.
Asinan, tuini tiang cu China lam ralthuam hmangin an cangvai hrih lo ih, tongkam lawng an khaksuak rero hrih. Doawknak a um tikah doawknak ih tel ram ziangkhal sipuazi ah a tlanuam zutzo ih, cucu China lamin an theifeng tuk tiah ralthuam an hmang ngam taktak lo si ding titu an tam.
Leave a Reply