Ralhrang An Kap That Aw

Hakha Le Thantlang Karlak Zawh An Kham – Ralhrang ralkap cun Hakha le Thantlang karlak ih timit lilawn tuah an tum ruangah a tufang Hakha in timit lilawn lamah ralhrang pawl an feh rero zo ih, tui dinhmun ah Hakha le Thantlang karlak lamzin zawh a him lo tin kiangkap ih umpawl cun an sim.

Kiangkap ih um pakhat cun “Ralhrang pawlin timit lilawn tuah an tum tikah an finkhawm aw rero zo. Hivek a si tikah mipi ralkap lam khal timtuahnak an nei rero ve ih,tuini July 30 zinglam nazi 11 hrawng khalah meithal puak awn kan thei rero zo. Cumi ruangah mipi ralkap lam khalin Thantlang le Hakha karlak feh hrih lo dingin mipi lam in theihter zo a si,” tin a sim.

Timit lilawn cu 2021 October 21 ah mipi ralkap lamin ralhrang pawl eiin le ralthuam phur thei hlah haiseh tin bomb in an rak puahsiat ih, tuitum ah ralhrang pawlin tuahsal an tummi a si.

Ralhrang An Kap That Aw – Rakhine ramkulh Kyauk Phyu myomah palik sakhan ah palik karlak buainak a suakih, meithal phorhsuak ih an kahawk tikah palik pakhat a thi.

Kyauk Phyu ramri kil palik bawi le palik sakhanhmu tei pahnih cu hmundang ih tthawn ding an si ruangah an kuthnuai pawl an komkhawm ih thlahawknak puai an tuah. Thlahawknak ahcun zu an inkhawm ih, thlahawknak rawl an kiltlang. Cumi an theh hnuah an umnak hmun ciarah an tlung.

An tlunlam ah ramri kil palik bawi Kyaw Htee cun a kuthnuai palik dang pakhat Soe Lin Aung cu thu a pek ih, tik a fial kual. Cutikah Soe Lin Aung cun Palik bawi Kyaw Htee a tongkhum ve ih, khat le khat tongkam an el aw. Cuvek a thlen hnuah palik Soe Lin Aung cun meithal a phorh ih, amah kawktu palik Kyaw Htee cu palik sakhan kot rori ah a kap that.

Palik zung sungih hnatuan pakhat cun “Palik bawi pahnih hmundang ih tthawn ding an si ruangah thlahawknak an tuah. Rawl an eikhawm theh ah ramri kil dingin an feh ih, palik Kyaw Htee cun palik Soe Lin Aung a kawk. Cumi ruangah palik Soe Lin AUng cun palik Kyaw Htee cu palik sakhan kot rori ah a kap ih, a thi cih. July 29, zan nazi 10 hrawngih thilthleng a si,” tin a sim.

Palik Soe Lin Aung cu palik Kyaw Htee a kah that veten a tlansuak hngal ih, amah an kaih thei lo ruangah a sungte pawl cu palik pawlin sakhan ah an hruai ih, thusuhnak an nei.

Palik sakhan kiangih um pakhat cun “Meithal puak awn vei 5 hrawng kan thei ih, Khat le khat an kap aw maw,mi pakhat sawn in a kap rero timi cu felfai in kan thei lo. Thlahawknak an tuah ttheh hnuah buai an si ih, an thlahmi palik bawi pahnih khal thusuh an si ve. Palik tlansuak cu ralthuam thawn an tlan ngah ih, CDM a tuah cih ko ding,” tin a sim.

Palik naivai pakhat cun “Ramri kil palik bawi Kyaw Htee cu hmundang in ra thleng pekte a si ve ih, a sual ngaingai. A kuthnuai palik lakin palik Soe Lin Aung le palik dang pakhat an buai ih, cumi ruangah palik bawi Kyaw Htee cun Palik Soe Lin Aung cu kut a thlakih a rak vel zo. Cumi ruangah palik Soe Lin Aung cu ramri kil palik bawi Kyaw Htee parah a lungawi lo cia. A lungawi lo cia thawn tuitum ah Palik bawi Kyaw Htee in Soe Lin Aung a kawksal tikah palik Soe Lin Aung cu amah kawktu palik bawi Kyaw Htee parah a thinheng tuk thlangih a kah that hnuah, a tlanhlo cih a si,” tin a sim ve.

Khawlal Kiltu Pyu Saw Htee An Kap That – Mandalay ramthen Min gyan myone Sanpia khua ih khawlal kiltu Pyu Saw Htee pakhat cu July 29,zanlam ah NaHtokyi PDF pawlin an kap that.

Sanpia khawlal khal ralhrang ih ruatmi a si ih, ralhrang thawn an tuantlang ruangah PDF lamin khawlal rettha dingin an pan nan, khawlal an hmuh lo ruangah khawlal kiltu Pyu Saw Htee sawn an kap that.

Nahtokyi PDF thuphuangtu cun “Khawlal cu ralhrang retmi a si ruangah kiltu 3 a nei. Khawlal kiltu pahnih cu retthat an si zo ih, tuitum ah khawlal kiltu pakhat umsun khal kan rettha lawlaw. Amah khawlal bik rettha dingin feh kan si nan, khawlal kan hmuh lo ruangah khawlal kiltu kan rettha.

“Pyu Saw Htee kan thianfainak ahcun meithal zunhnih le ralthuam dang neuhneuh khal kan laksak thei. Meithal kan laksakmi kan zohfel tikah ralhrang pawlin Pyu Saw Htee pawl an pekmi meithal a si in kan thei ih, pah-tah-sah timi hminsin dangten an nei ve a si,” tin a sim.

Phukpi In Ralhrang 9 An Kap That – Sagaing ramthen Salinkyi myone Yikha’ khua le DuHtauh khua urkangtu ralhrang ralkap pawl cu Pipinkan phungki tlawngah umhmun an khuar ih, mipi ralkap lamin phukpi in an kah tikah ralhrang 9 an thi tin thu an suah.

Sepecial Attacks Force cun “July 29 ah Salinkyi myone sungin khua pahnih ih inn pawl urkangtu ralhrang ralkap pawl cu Pipinkann phungki tlawng sungah an um ih, kannih mipi ralkap komkhawm cun ralthuampi le phukpi in kan kap ciamco. Kil tinkim in kan kap ih, leihnuai zohfeltu pawl simdan vek asile ralhrang 9 an thi a si,” tin thu an suah.

MWA hotu cun “Kanmah lawng kan silo, kan tuanpi pawl thawn hmun tampi in ralhrang kan kulh ih,ralthuampi thawn kan kap ciamco. Mipi inn an urkang ih, dutawk in mipi thilri an lak tikah hivek cu an ton rero an phu. Ralhrang hnuaiah kan kun men lo dingih, hmailam khalah ralhrang pawl kan do vivo ding. Mipi ummen an cokbuai cun anmah ralhrang pawl khal an tuar ve thlang a si,” tin a sim.

Raldo Zir Tlung Pyu Saw Htee Pawl Lamlak Ah An Thi – Sagaing ramthen Saing khua ih palik raldonak zir hmunin tlung ralhrang palik le Pyu Saw Htee pawl cu July 30 zinglam nazi 9:15 hrawngah Mungzua le Mandalay karlak ah mipi ralkap komkhawm in bomb an rak puah ih, ralhrang le Pyu Saw Htee 10 an thi tin mipi ralkap komkham cun thu an suah.

Mipi ralkap komkhawm pawl cu MNRF, 5Star, Guerillas Commando le PRF pawl an si. Raldo zir theh tlung ralhrang palik le Pyu Saw Htee pawl cu hmun 2 in bomb an rak puah.

Mipi ralkap komkhawm cun “Hmaisa sawn ah bomb 10 in kan rak puah ih, Pyu Saw htee 4 an thi. Cumi ah ralhrang mawtaw siat le ciangkuang lo khal an um. Ralhrang feh peh cu hmailam ih rak bawhtu kan rualpi pawlin bomb 4 in an rak puah betih, ralhrang 6 an thi. Ralhrang palik le Pyu Saw Htee pawl cu Sagaing ih palik raldo zirnak hmunah raldo zir theh an si ih, Mungzua lamah tlung ding an si.

“Mipi tuar ding zawngih an cangvaih man hlanah kannih mipi ralkap komkhawm cun lamzin in kan rak bawh ih, bomb kan rak puah. Hmunkhat lawngih bomb puah cun a fuh lo pangah tin hmun 2 in bomb kan rak puah ih, ralhrang palik le Pyu Saw Htee 10 an thi a si,” tin mipi an simthei.

Wawlay Ah Ni 4 Peh In An Do Aw Thlang – Karen ramkulh Myawaddy myone Wawlay hmunram sungah ralhrang ralkap le KNLA pawl ni 4 peh in an do aw thlangih, raltlan tlung duak pawl khal Thailand lamah an tlan thluhsal. Ralhrang ralkap le KNLA pawl cu July 27 in July 30 tiang an do aw zo.

Raltlan pakhat cun “Wawlay ah raltlan umnak ding an sak nan, kan tlung ngam hrih lo. Kan dung sakhan cuh aw ih an doawknak ttumin Thailand lamah kan rak tlan. Kan tlun thei hrih lo ruangah Thailand ahcun innsang in kan um ih, kan hlawh aw theu. Thailand ih raltlan hmunin mi tamzet cu Thailand ralkap pawlin Karen lamah an kuat pekte nan, doawknak a umsal tikah Thailand lamah an tlan thluhsal. Hrekkhat cu ramri ih beu an um bangin hrekkhat cu phungki tlawngih beu khal an um,” tin BBC a simthei.

Raltlan bawmtu pakhat cun “Ni 4 sung an doawk thlang tikah raltlan an pungsal. Doawknak a um tikah mipi hrang khua ih um a him lo. Ziangahtile ralthuampi ih tlakthatmi an um theu tlunah ralhrang lakah zohman an um lo a sibik. Doawknak thuhla cu anmah mipi ralkap lamin an than leh dingah kan ruat. Doawknak ih thi le hriamhma ngah tivek cu kan thei ve lo,” tin a sim.

Hmaiton In Biden Le Xi An Pe Aw Ding – US president Biden le China president Xi cu July 28 ah Video call in an rak be aw ih, an biakawknak ah remawknak an nei thei lo nan, hmaiton ih tongaw dingin an lungkim.

Biden in US president a tuan hnuah China president Xi Jinping thawn veikhat hman hmaiton in an tongaw hrih lo ih, video call cun vei 5 an be aw zo. July 28 ahcun Biden le Xi Jinping cu nazi 2:17 sung an be aw.

Video call ih an biakawknak ahcun Taiwan thuhla thupi zetin an rel aw ih, zokhal dungsip an tum lo. China cun meisa thawn nan lek asile kang a suak rori ding tin US an simthei ih, US cun China hnenah Taiwan parih kan pomdan cu a kel hrih a si tin an sim ve.

Biden le Xi cu hmaiton ih tongaw dingin lungkimnak an nei nan, ziangtik ni ah timi a ni le hmun tivek relfel an nei thei hrih lo. Tongkam ih biakawknak ah remnak an nei thei lo ih, hmaiton khalin remnak an tuah thei zum a si lemlo. Ziangahtile, China cun Taiwan cu kan ramsung ih um, kan thuneihnak hnuai ih um an si tin an pomhnget ih, a hranten Taiwan umter an tum lo. US cun Tawan ram zalennak ding rori an rak buaipi ve. Cumi ruangah ram pahnih hro aw rero an si.