Matupi Ah Ralhrang 5 An Thi – Chin ramkulh Matupi peng Limyo Chuang lilawn kiangih bomb hawl ralhrang ralkap le Matupi CDF pawl cu July 25 zingah an do aw ih, doawknak ah ralhrang 5 an thi tin CDF Matupi cun mipi an theihter.
Ralhrang mipum 11 hrawng cu bomb kammi hawl in vaksuak an si ih, zinglam nazi 11 hrawngah Matupi CDF in thupten an rak kap fukfi. Minute 10 sung duhtawk in an kap ciamco ih, ralhrang 5 an thi man tin mipi an simthei.
CDf matupi thuphuangtu cun “Mindat le Matupi karlak ah bomb thianfainak nei dingin ralhrang mipum 11 hrawng ke in an vaksuak. Ralhrang 11 le kannih CDf Matupi doaw kan si. Limyo Chuang lilawn kiangah kan rak kap ih, ralhrang 5 an thih tlunah ralhrang 4 hriamhma an ngah. Ralhrang thi 5 le ralhrang hriamhma ngah 4 an um timi cu Drone hmangin kan zohfelnak ah kan hmu. Minute 11 sung hrawng duhtawk in ralhrang pawl kan kah hnuah kan himnak hrang dung kan sipsal a si,” tin a sim.
Ralhrang In Chin Tlangval An Kap That – Ralhrang ralkap cun Hakha peng Hniarlawn khua an fehnak ah Chin tlangval Salai Mang Lian Sang an kap that ih, khua sungin mipi thilri an duhduh an la bet tin khuami pawl cun an sim.
Ralhrang ralkap pawl cun July 25 zinglam nazi 11 hrawngah Hakha peng Hniarlawn khua an pan ih, ralhrang pawl an ra timi an theih veten khua mipi pawl cu khua ah um ngam loin an tlan thluh. Salai Mang Lian Sang khal khua in a tlansuak zo nan, khua ih nauhak hrekkhat run dingin a kirsal ih, cumi ah ralhrang pawlin an rak kap that.
Ralhrang pawl cun Hniarlawn khua in mipi tangka, sui thiilri le an tilva vulhmi pawl an thah sak ih, inn hrekkhat khal an bauhsak. Ralhrang pawl cun duhtawk in Hniarlawn khua an suahsam hnuah an suahsan sal ih, Hakha lamah an kirsal. Cumi hnuah khuami pawl cu khua ah tlungin Salai Mang Lian Sang ih ruang an la ngah.
Kalay Ah Lah-wah-kah Hnatuan ih Inn Bomb An Puah – Sagaing ramthen Kalaymyo Lah-wah-kah zung ih hnatuan pakhat cu CDM a tuah lo tlunah hmatpungtin tuah tinten sumpai tamtuk a lak theu ruangah, ralrin peknak hrang a inn ah bomb an deng lut.
Kalay UG hotu cun “July 25 zinglam nazi 5 hrawngah an inn sungah bomb kan deng lut ih,kannih cu kan tlan cih. Bomb puak ah thi an um maw, hriamhma ngah ziagzat an um timi cu kan theifel hrih lo.
“Lah-wah-kah zungih hnatuan a si ih, CDM a tuah lo tlunah hmatpungtin tuah mipi khal sumpai tam tuktuk a rak dil. Sumpai a dilzat pe duh lo pawl cu hmatpungtin a tuahsak duh lo. Cumi ruangah ralring peknak hrang a inn ah bomb denglut kan si,” tin a sim.
Ralhrang Thuthen Dan Ah Daw Suh A Riahse – Ralhrang ralkap in rampi thuneihnak an lak hnuah anmah dokalhtu ti ih an kaihmi mi 4 pawl cu thihdan an pek hnuah an takin an thlaithat zo tin July 25 zingah cahnah thuthang hmangin mipi theihternak an nei.
Ralhrang ih thusuahmi cu Naypidaw thawnginn sungih an khummi Daw Aung San Suh Kyi khalin a rak thei ve ih, a riahsiat tuk tlunah hivek lawmmam in hremawk thei dan a um mawsi tin thusuhnak a nei phah.
Sihni pakhat cun “Pi Suh thubuai kan rel hlanah minute 30 sung amah Pisuh thawn thureltlangnak kan nei ih, cumi ahcun ralhrang in mi 4 an thlaithat timi a rak thei zo. A mithmai a se tukih a um a nuam lo. Hivek lawmmam ih hremawknak a um thei mawsi timi thusuhnak a nei ih, thudang ciamco cu a rel tel lo,” tin a sim.
Daw Aung San Suh Kyi khal ralhrang in rampi thuneihnak an lak hnuah an kaihmi a si ih, thubuai 6 hrang kum 11 sung thawngtla dingin hremnak an pek zo tlunah thubuai 13 cu Court ah rel peh rero lai a si hrih.
Ralhrang ralkap in mi 4 thih dan an pek hnuah an takin an thlaithat taktak tin thu an suahmi cu leitlun hmun tinkim ah Myanmar mipi pawl cun ralhrang cangvaih dan an ausuahpi ih, duhphorhnak an nei cio. Ramsung ramdang Embassy pawl khalin ralhrang ih thuthen dan an mawhthluk thu an tarlang cio ve.
An Thlaithatmi Ruang An Pe Duh Lo – Ralhrang ralkap ih thlaithatmi mi 4 lakih tel Phyu Ziya Taw ih nu cun a fate an thlaithat dan le thuhla umdan a theihmi pawl cu mipi hlawmnak a nei.
Phyu Ziya Taw ih nu Dr.Khin Win May cun “July 25 zinglam ah mipi dang bangin thuhla ka thei ve ih, thungai a si taktak pei maw timi theifiang dingin Insein thawnginn ka pan. Thawnginn ka thlen tikah thawnginn kiltu pawl ka sutih, thuthang ih umdan vek kha siko tin in rak simthei. Cutikah kei cun thuthang ahcun a famkim lo zetih, ziangtik ni ah nan thlaithat, khawitawk hmunah nan thlaithat timi in simthei maw tin ka sut.
“Ziangahtile kannih cu biakmi nei lo kan silo ih, biaknak nei kan si tikah bukdah biakdan vekin ka fapa ih ruang vuinak le thlahnak tla tuah ka duh. Asinan, thawnginn kiltu pawl cun cipciar in in sim duh lo. Cutikah tuanvo neitu upa pawl ka tong duh tin ka simthei hai. Cutikah tuanvo neitu pawl khalin thuthang kan suah bangin kan tuah zo tin in simthei.
“Keikhal in cuti asile a ni tla in simthei uhla tin ka sut betih, annih cun zarhte ni lole zarhpi ni pakhat khat sawn a si ding, cutin rak hminsin aw in ti men. Kei cun a ni diktak le a caan diktak in sim ding ka rak beisei tuk nan, in sim cuang lo. Cutikah a ruang in pe thei maw tin ka dil ih, annih cun pe thei lo, daan a silo in ti. Asile thlan ka tuahsak duh ih, a ruhro tal in pe thei maw tin ka dil betih, cukhal kan lo pe thei lo in ti thotho.
“Ka fa cu ruk a ruk ruangah le misual a si ruangah thlaithat a silo ih, rampi hrang a nunnak hlan a si tikah a hrang ka lungawi. A cangthei asile a ruh tal in pe haisehla ka duh tuk. Cutin a hrang thlan ka tuahsak thei ding. Kei cun khathluk ka dil zo nan, zianghman in pek duh lo ruangah fiahnak hrang thildang ka dil bet nawn lo. Ram mipi nan zaten him hram uh,” tin a sim.
Ralhrang thungrul Ding Thu An Ausuahpi – Ralhrang ralkap in thihdan an pekmi mi 4 pawl an thah thu ah dothlengnak pawlkom pawl cun ralhrang an thungrul ding thu mipi an theihter.
KNDF cun “Ralhrang ralkap cun Phyo Zira Taw, Jimmy , Aung Thura Zaw le Hla Myo Aung Pawl an thlaithat tin thu an suah. Hivek cu dankalh ih mithahnak a si ih, kannih KNDF cun ralhrang thuthen dan kan dokalh lawlaw. Kannih KNDF cun dothlengnak caan ah ralhrang ralkap , palik, dalan le ralhrang lamtang pawl kaihmi kan nei nan, that loin thaten kan ret. Asinan, ralhrang ralkap cun doawknak hmun silo ah duhtawk in mipi an that ih, kannih KNDF cun kan thungrul rori ding a si,” tin thu an suah.
PDF Zoland cun “Ralhrang ralkap in mi 4 an thlaithat timi an thuthang ah an suah ih,kannih PDF Zoland cu kan mangbang tuk rori. An tantami sungte pawl khal kan tuarpi tuk. Ralhrang in an tuah taktak asile ngaithiam theih an silo ih, sual rapthlak tuk an tuah. Ralhrang ralkap cun thuneihnak duh men ah duhtawk in mipi an that rero. Curuangah,kannih cu Federal Democracy rampi din rori dingin thu kan tiam nonsal a si,” tin thu an suah.
Mindat CDF cun “Mipi hrang rapthlak tukih rak cangvai rero zo ralhrang ralkap cun 2021, February 1 ah ralthuam rinsan in rampi thuneihnak an rak la. Mipi cun ralhrang thuneihnak an duh lo ih, lamzawh duhphorhnak an nei. July 23 ah ralhrang ralkap cun thihdan an pekmi Phyo Zira Taw, Jimmy , Aung Thura Zaw le Hla Myo Aung Pawl an that ih, kannih CDf Mindat khal riahse thinheng in kan um.
“Hivek cu tuah lo hramhram dingin ramleng cun theitawk an dil nan, cukhal ralhrang pawl cun an ngaihsak lo. Hivek ih ralhrang ralkap pawl cangvaih dan ruangah dothlengnak ralkap pawlin kan tuar tuk ih, ralhrang uknak cemral ko do dingin kan zuam sinsin ding tiah Kannih CDF Mindat cun thu kan suah duh a si,” tin an tarlang.
Black Wolf, Tayawaddy PDF, Pale PDF, Yangon PDF, Mon PDF le NUG PDF pawl khalin ralhrang pawl an thungrul ding thu casuah in mipi theihternak an nei ih, zokhal ralhrang umnak hmun kiangkap ah um lo dingin le hrialthiam dingin mipi an theihter.
C.Ronaldo Man United Ah A Kir – A club Man United in tui season Champions League an lek thei lo ding ruangah club thar hawl rero C.Ronaldo cun club thar a hmuh thei hrih lo ruangah July 25 ahcun Man United ah a kirsal hrih.
Man United Coach thar Eric Ten Hag cun C.Ronaldo a rak hngak ih biak hngal a duh. C.Ronaldo in Man United suahsan rori a tum nan, Man United coach cun a thinlung thleng danglam sak a tum ve. Be aw ding lai an si ih, thuhla felfai zianghman a um hrih lo.
Season liam zo ah Man United cu Premier league top 6 dinhmun lawng an rak luah thei ih, tui season ah Champions league an lek thei lo ding. Premier League top 4 tiang lawngin Champions League lek ding an si.
C.Ronaldo cu Champions league hminsin phunphun nei a si ih, season khat sung Champions league a lek thei lo asile a bulpak hminsin neihmi pawl midang in an man thei, a danglam thluh thei. Cumi ruangah C.Ronaldo cun Champions league lek thei team rori ah luh a duh.
Asinan, tutiang ahcun C.Ronaldo in Champions league lek thei ah team thar a hmu thei hrih lo ih, Man United ah a kirsal hrih. Man United cun C.Ronaldo tel loin timtuahnak puai an rak lek rero zo ih, C.Ronaldo umdan dingah thu felfai an suah thei hrih lo.
Leave a Reply