Ralhrang Bawi In Palik A Kap

Myanmar ram a buai hnuah ralhrang pawl khal an karlak ah buainak neuhneuh a tam zetih, ralhrang pawl anmah le mah kap aw tivek khal a thleng tam zo.

Sagaing ramthen HteChaing khua ih hmunram kil palik Kyaw Kyaw Oo khal June 8 ah ralhrang bawi Htet Lwin Aung in a kap ih, palik Kyaw Kyaw Oo cu sizung luhpi hngal a si.

June 8, zan nazi 9 hrawngah Htee Chaing ih ralkap bawi Htet Lwin Aung le hmunram kil palik Kyaw Kyaw Oo tei pahnih cu tongkam an el aw ciamco ih,ralkap bawi cun palik cu khukbil in ngaithiam a dilter. Palik in ralkap bawi ih thupek a thlun lo ruangah ralkap bawi cun palik Kyaw Kyaw Oo cu meithal in a kap ih, palik a rak tlan man ruangah a hna kiangkap lawngah a kap ngah. Tu ah palik cu sizung ah tuamhlawm rero a si ih, ralkap bawi khal hremnak pek a si cuang lo.

Thuhla felfai theitu cun “Ralbawi cu hremnak pe loin hmundang ah an tthawn fel zo. Ralbawi cun palik cu thi rori dingin vei 3 a kap ih, palik a rak tlan man nan, hriamhma naa tuk a ngah, sizung ah tuamhlawm rero lai a si hrih a si,” tin media a simthei.

Yangon ramthen Hleku myone Nan-Htih khua khalah USDP party sungtel Win Zaw Oo cu ralhrang bawi Thet Zaw Htun le Min Thein in an kai ih, hridai in an kit hnuah an hrem ciamco.

Khuami pakhat cun “Nannih USDP party pawl khal party rinsan in mipi nan buaiter rero men, ziangsi nan duhsan tin an kawk ih, hremnak an pe. A thok ahcun khawlal le upa pawlin ralhrang hnenah zangfah an dil nan,an thlah duh cuang lo. Duhtawk in an hrem hnu lawngah an thlahsal. Hivek ruangah USDP party pawl khal an lungawi lo tukih, tlunlam ah thlen an tum,” tin a sim.