Chin Ralkap komkhawm In Ralhrang 60 An That – Chin ralkap CNA cun Falam le Hakha karlak ih ralhrang an donak thuhla siseh Matupi peng sungih ralhrang an donak thuhla khal telin July 19 zan ah mipi theihternak an nei.
CNA cun “Kannih Chin ralkap cun July 16 tiang ralhrang kan donak thuhla pawl a hnuailam bangtuk a si ih, kanmah lawng siloin Chin mipi ralkap dang pawl thawn tuantlang in ralhrang do kan si.
“July 7 ah CNA, CDF Matupi le CDF Zotung pawl thawn Matupi peng Amlaik khua ah ralhrang ralkap kan do ih, ralhrang 2 an thih tlunah ralhrang hriamhma ngah 6 an um. July 6 khalah CDF matupi le ralhrang pawl Rengkhen le Amlaik khua kiangah vei hnih an do aw ih, doawknak ah ralhrang 5 an thi tin CDF matupi lamin thu an rak suah zo.
“July 13 ah Hakha ih ralhrang palik sakhan le ralhrang Check Gate ih um ralhrang pawl cu kannih mipi ralkap komkhawm in kan kap ih, ralhrang thi an um rori nan, a zat lawngte kan fiah thei lo.
“July 8 in July 16 tiang kannih CNA, CNDF, CDF Thantlang le CDF hakha pawlin Falam le Hakha karlak ah ralhrang ralkap vei 8 kan do ih, doawknak ah ralhrang 60 hnakin mal lo an thi ih, ralhrang hriamhma ngah 17 hrawng an um.
“Kan doawknak hmun cu Kalay in Hakha lamzin tluan Thlanrawn khua, Taal khua, Tlangzar khua, Dokthek khua le Chuncung khua kiangkap pawl ah an si. Ralhrang pawl cu kalay in mawtaw 27 thawn an suak ih, mipum 200 hrawng an si ding. Cupawl cu lamzin tluanah theitawk kan rak do ih, doawknak ah kannih mipi ralkap komkhawm lamin miraltha pahnih kan can ve.
“Ralhrang ralkap pawl cun Valung khua in mipi pakhat an that ih, Taal khua in inn 29, Tlangzar khua in inn 6 le Chuncung khua in inn 15 tipawl khal an urkang a si,” tin CNA cun thu an suah.
Mizoram Ah Myanmar Mi Rittheihsi Phur An Kai Bet – India ram Mizoram State Aizawl khawpi fehnak lamzin Khawzawl Check gate ah Aizawl ih lut ding mawtaw pakhat cu tuanvo neitu pawlin July 19 ah an rak cek ih, a sungah rittheihsi India tangka in ting 126 man an kai.
Rittheihsi an kaihmi cu bingrang 252.64 gram ih rit a si ih, India tangka in ting 126 tlun man a si. Rittheihsi phurtu mi pahnih khal palik pawlin an kai cih ih, Sagaing ramthen Tamu Myone Khamphat kanan khuami Michael Tawk Lian Mung le Mizoram Champhai District Zothawthar ih um lalchhandama tei pahnih an si.
A tufang Mizoram State sungah Chin ramkulh lamin rittheihsi a lut nasa tukih, Mizoram palik tlunah Mizoram mipi pawl khal an mangbang thlang. Hivek ruangah duhdawk zangfah lainatnak thawn an tuamhlawm , an zohkhen, an khilhawi reromi raltlan pawl dinhmun khal ngaihtuah um deuhdeuh an si.
Ralhrang An Kap That Aw – Tanintharyi ramthen Dawei myone Mahluai ralhrang check Gate ah ralhrang pawl anmah le mah an kap aw ih, ralhrang palik pakhat a thi tin PDF Tanintharyi cun thu an suah.
Ralhrang pawl cu lamzin Check gate ih mipi tangka an dilmi pawl tthen aw dingin tongkam an el aw ciamco ih, cumi ruangah khat le khat kap aw an si.
Tanintharyi PDF cun “Lamzin Check Gate ahcun ralhrang pawlin mawtaw pakhat ah tangka thawng 5 hrawng an dil theu. Lamzin feh mawtaw tintian tangka an dil hnuah zanlam ahcun tangka an hmuhkhawmmi an then aw theu. Tangka then aw dingih an umkhawm laiah tongkam el aw an si ih, meithal phorhsuak in an kap aw. Cumi ahcun palik bawi pakhat a thi ih, tuini July 20 ah an vuiliam ding a si,” tin mipi theihternak an nei.
Ralhrang Bawi Kum 10 Hremnak An Pe – Yangon Hmawbi ih ralhrang vanzam sakhan hmunih bomb puak ruangah ralhrang bawi pakhat cu kum 10 sung thawngtla dingin hremnak pek a si.
2022, February 18, zan nazi 11 hrawngah Yangon Hmawbi ih ralhrang vanzam sakhan ah mipi ralkap lamin bomb an kam thei ih, hlaral kilkhawinak in bomb an hmetpuak. Cumi ah ralhrang vanzam pahnih a siat phah ih, cumi thuhla thawn pehpar aw in sakhan ih ralhrang tamzet kaih an si ih, ralhrang bawi khal kaihmi ah a tel.
Kaihmi pawl cu ralhrang pawlin nasaten thusuhnak an neih hnuah an lakin bawibik an kaihmi cu kum 10 sung thawngtla dingin hremnak an pe fel zo tin ralhrang thuthang cun an tarlang.
2022, July 28 khalah Hmawbi ralhrang vanzam sakhan ah bomb kamsal a si ih, bomb cu puak man loin an hmu man. Cumi ruangah ralhrang 30 lenglo an kai ih, kaihmi lakin tamsawn an suah zo nan, ralhrang 5 pawl cu an suah hrih lo ih, hremnak an pe rori ko ding tin ralhrang sunglam thuthup a suak bet.
Ralkap pakhat cun “Neta ih bomb kammi thawn pehpar aw in ralhrang 30 tlun kaih an si ih, an lakin hrekkhat an thlahsal zo. Mi 5 pawl cu an thlah hrih lo ih, mipi lamtang an siko ding tin an zum. Ziangahtile, mi 5 kaih an si hnu cun vanzam sakhan ih ralhrang thuthup a suak bet hrih lo. Curuangah hremnak an pek rori zum a si,” tin a sim.
Hivekin ralhrang vanzam sakhan bomb puah a si theu ruangah ralhrang vanzam sakhan ih ralbawi pawl le ralhrang nupi pawl cu meithal hman dan zirh an si hnuah ralhrang vanzam sakhan kiltu ah an tel theu tin kiangkap mipi cun an sim.
Kachin Ah Doawknak A Sosang – Kachin ramkulh Phakan le Waimaw lamah Kachin ralkap KIA le ralhrang ralkap pawl doawknak a sosang ih, ralhrang lamin raldonak vanzam tiang an hmang rero tin KIA thuphuangtu ralbawi Nawbu cun a sim.
KIA thuphuang ralbawi Nawbu cun “Doawknak a sosan tikah ralhrang pawlin raldonak vanzam tiang an hmang. Waimaw lam khalah ralthuampi thawn in kap rero. A tufang ralhrang pawlin kan hmunram nasaten in nor ih, doawknak a sosang. Ka sakhan te pakhat khal mipum tampi le ralthuam phunphun thawn in do tikah kan ralkap kIA pahnih an thih phah ih, sakhan khal an la. Ralhrang le pituhsit pawl tangtlang an si,” tin RFA a simthei.
Khuami pakhat cun “Phakhan myone sung khalah KIA le ralhrang doawknak a sosang. Sagaing lam khalin ralhrang an lut betih, ralhrang lamah pituhsit le Shanni pawl an tang ve. A tufang cu kachin ramkulh sung hmun tinkim ah doawknak a um. KIA in Sagaing ih PDF pawl an bom theu tikah ralhrang in KIA pawl an nor hrim a sithei. Khuami pawl cu hmunhim ah kan tlan hrih a si,” tin a sim.
Putin Iran A Tlawng – Russia president Putin cu July 19 ah Iran ram ah a tlawngih, Iran ram hruaitu upa Ali Khamenei thawn an kawm aw.
Russia in Ukraine an do hnuah thlanglam ram pawl cun a phunphun in Russia an hremih, Russia le thlangram pawl pehtlaihawknak a tha nawn lo. Cutikah Russia cun anmah tuanpi paihtu ding an ngaihsak ve ih, India, China le Iran ram pawl thawn an be aw rero zo. Kan dung khalah Russia ram hruaitu hrekkhat le Iran lam tuanvo neitu pawl an rak tong aw zo.
Putin cun Iran ram hruaitu lulam Khamenei a ton hnuah Iran president Raisi khal ton a tum betih, Iran president Raisi le Putin cun Nuclear thuhla rel an tum. Putin in Iran ram a tlawnlai ah Egypt president Tayyip khal Iran ah a rak tlawng ve. Iran le Russia ram cun thlanglam ram pawl ih do reromi Syria president an dinpi thu khal an sim.
Russia cun Ukraine an do hnuah thlanglam ram pawlin ziangkim ah an tuanpi paih silo, anmah tuanpitu ding le an lamtang ding nasaten an hawl ih, anmah thawn tuantlang thei ding pawl cu nasaten tuanpi an tum rero ve.
Leave a Reply