Ralhrang Beer An Siatsak

Sagaing ramthen Tamu le Kalaymyo karlak lamzinpi ah Tamu PDF pawl cun ralhrang Myanmar beer phurtu mawtaw cu June 20 ah an rak dingter ih, a beer phurhmi zaten an siatsak thluh.

Mawtawpi cun ralhrang beer bawm 98 a phur ih, Tamu PDF in ralhrang Beer zaten an siatsak thluh tin mipi an theihter.

Tamu PDF cun kalaymyo le Tamu karlak lamzinpi cu an zohthup ringring ih, ralhrang thilri hrimhrim zuah an tum lo.

Tamu PDF cun “Ralhrang uknak kan do timi ah ralhrang sumpai lakluhnak le ralhrang thilri khal a tel thluh. Curuangah ralhrang thilri phurhsak lo dingin mipi kan simthei rero zo. Tu ahcun a takin kan tuah thlang a si,” tin mipi an theihter.

Yangon In Tlung Ralhrang Bawi An Kap That – Yangon In Mandalay ramthen Maha Aungmi myone ih tlung ralhrang bawi Myo Htwe cu lamlak ah kan kap that tin Mandalay PDF cun thu an suah.

Mandalay PDF cun “Yangon in a ra tlung ding timi kan theih cia ruangah lamzin in kan rak bawh. June 21 zinglam nazi 7 hrawngah kan rak kap ih, a hmun rori ah a thi cih. Meithal in vei 5 kan kap fuh tikah luatnak ding a um lo. Kannih cu himdam ten sung kan sip cih a si,” tin mipi an theihter.

Taninthar ramthen Tayet Chaung khalah ralhrang dinpitu Pyu Saw Htee sungtel pakhat an kap that in Tayet Chuang PDF in thu an suah ve.

Khuami pakhat cun “Khawlal hlun a si ih, ralhrang in rampi thuneihna an lak hnuah ralhrang dinpitu a si. Neta ahcun ralhrang pawlin ralthuam tiang an pe ih, khawsung ah duhtawk in hro a suang.

“June 20, zan nazi 7 hrawngah inn sungih a umlai an kap that. A nupi khal hriam a ngah. Amah ruangah khua mipi kaihmi an um zo bangin khua ah um ngam lo ih tlan khal tampi an um. Tu ahcun a thi ti kan thei ih, khatlam ah kan diriam tuk a si,” tin a sim.

Ralhrang An Thih Tikah An Sinak An Tarlang Ngam Lo – Ralhrang ralkap in rampi thuneihnak an lak hnuah ralhrang ralkap le palik thi tivek pawl cu ralbawi an sinak tivek tarlang loin thupten an vuiliam men theu ih, ralhrang sungte pawl an lungkim lo.

Ayeyarwaddy ramthen ကျုံပျော်မြို့ khalah ralhrang palik bawi a thi ih, ralhrang pawl cun a sinak ziangkim an thup tlunah khua mipi theih loten a thupthiar in an vuiliam ih, khuami pawl an mangbang.

Khuami pakhat cun “Palik Zin Min Maung a thi ti cu khuami pawl in kan thei theh ko. June 18 ah a thi ih, June 19 ah ralhrang pawlin an vuiliam cih. Mithi thuhla an ngannak ah palik a si tihman an telh lo ih, rinloparal natnak in a thi tin an ngan men.

“Kan khua kiangah kahawknak a um ih, cumi ah a thi siko ding tin mipi cun rinhlelhnak kan nei. A sungte pawl cun ni 3 sung sizung ah kan tuamhlawm nan, a thi tin an sim. Asinan, a thinak ca ah zianghman an ngan silo khuami pawl cu kan mangbang thluh siko. A vui khal a thupthiar in an vuiliam ih, mangbang thlak tak cu a si,” tin a sim.

Mandalay ramthen Kyauk Pan Taung myone khalah ralhrang pawlin PDF kai dingin an hualnak ah anmah ralhrang pawl an kap aw ngah ih, ralhrang bawi pakhat a thi. Cukhal ralhrang pawl cun a sinak ziangkim thup thluh in an vui.

Ralbawi Aung Myo Thu cu zanlam nazi 3 hrawngah an vui ih, a sinak zianghman an ngan lo. A ruang vuinak khalah mibawmtu pawlkom pawl an sawm ih, cutin thlanmual ah lolam zetin an vuiliamter tin kiangkap venghnen pawl cun an sim.

Ralhrang pawl cun raldonak ih thi siseh ralhrang damlo ih thi pawl khal thuthanngca ah riahsiatnak ca thlahter nawn lo dingin, riahsiat thu pholang nawn lo dingin ralhrang sungte pawl an theihter thluh in ralhrang sungte pawlin an rel ve.