Matupi Ah Ralhrang Bawi An Kap That – Chin ramkulh matupi khuampi ih ralhrang bawi Than Naing Win cu July 15 ah Matupi CDF in an kap that tin CDf Matupi cun mipi theithernak an nei.
CDF matupi cun “Matupi ralhrang hmunpi ih ralkap ttuan ralbawi Than Naing Win cu July 15 ah kannih CDF Matupi in kan kap that. Ralbawi Than Naing Win cu Matupi ralhrang hmunpi hrang thlingthlatu a si ih, CDM tuah duh pawl le CDf matupi thuhla zingzoi ringringtu a si.
“Ralbawi Than Naing Win ih thuhla simtheihmi ruangah CDM tuah dingin timtuahnak nei ralkap 7 thah an si ih, ralkap 4 khal thawngthlak an si. 2022 June 25 khalah ralbawi Than Naing Win cun Matupi khawpi ah nunau pakhat a rak that zo a si,” tin thu an suah.
Ralhrang Palik An Kap Aw – Mandalay ramthen Taungtar myone Zungsi Kyi palik sakhan ah palik nupa tongkam an el aw ih, palik dang an rak tel tikah an kap aw ih, palik pakhat a thi.
July 15, zanlam nazi 3:40 hrawngah Taungtar myone zungsi Kyi palik sakhan ih palik zuri Yan Naing Oo le a nupi tongkam an el aw ih, palik Yan Naing Oo cun a nupi cu meithal in a kap. Culai fangah palik nupa tongkam el aw then dingin thleng ciah palik Aung Khaing Win sawn cu palik Yan Naing Oo in a kap ngah ih, palik Aung Khaing Win sawn a thi.
Taungtar mibawmtu pawlkom cun “Palik bawibik sakhan ih a um lo caan a si ih,a kuthnuai pakhat in tuanvo a la sung. Nupa tongkam elawk ruangah thihnak thleng a si ih, palik thi Aung Khaing Win ih sungtel pawl lungawi lo cun Court ah thubai tuah an duh. Cumi ruangah palik Yan Naing Oo cu an kai zo,” tin a sim.
Ralhrang Thuthentu An Kap That – Ralhrang in rampi thuneinak an lak hnuah anmah dokalhtu ti ih an kaihmi pawl thuthennak petu pakhat Yangon Mingala Tuangyut ih thuthentu San Lin cu July 15, zan nazi 7 hrawngah kan kap that tin yangon mipi ralkap STA cun thu an suah.
STA thuphuangtu cun “Court in inn lamih a tlun zawngah kan rak kap. Thuthentu San Lin cu mawtaw sungah a thi cih ih, mawtaw mawngtu khal hriamhma a ngah. Kannih STA lam cu himdamten dung kan sip thei. July 15, zanlam nazi 4 hrawng khalah Hlaingtaya myone thuthennak zungpi bomb kan puah. HLaingtaya myone ih bomb kan puahmi ah thi an um maw timi cu felfai in kan thei hrih lo.
“Thuthentu San Lin cu ralhrang in an kaihmi pawl ralhrang duhdan in hremmak pe rerotu a si ih, mipi riahsetertu a si. Hmailam khalah ralhrang hrangih hnatuantu siseh mipi tuar ding zawngih cangvaitu pohpoh thianfainak kan nei vivo ding a si,” tin a sim.
Yangon mipi ralkap pawl cun Yangon ah nasa sinsin in an cangvaih ding thu kan dungah mipi theihternak an nei zo ih, mipi cu ralhrang umnak naivai ah um lo dingin an theihter. Yangon ahcun ralhrang Check Gate, palik sakhan, ralhrang thuthennak zung pawl bomb puah in an kap.
Nyipidaw Ah Ralhrang 15 An Thi – Nyipidaw ramri Tantuangkyi myone Suhsi khua kiangah Nyipidaw PDF cun ralhrang ralkap fehkhawm an kap ih, bomb an puahmi thawn ralhrang 15 an thi tin mipi theihernak an nei.
Naypidaw PDF thuphuangtu cun “July 14, zanlam nazi 5 hrawngah a si ih, ralhrang mipum 60 hrawng cu hmun 3 ah then aw in in ra pan. Kan umnak lam in ra pan hnuah hlaral in in kap cih. kannih lam khal kan tanhmun khuarnak in kan kap ih, ralhrang 4 an thi. Cumi hnuah hmundang ih ra ralhrang pawl cu bomb kan puah ih, a fuh tuk tikah ralhrang 11 an thi.
“Doawknak ah kannih Naypidaw PDF lamin miraltha pakhat ram le miphun hrang a nunnak a hlanih, kan sungtel pakhat khal a umnak kan thei hrih lo. Kan mihlo cu kan pehtlaih thei lo tlunah a umnak khal kan thei hrih lo. Neta cun doawknak hmun kan suahsan ih, ralhrang ralkap pawlin kan sakhan an urkang hnuah kiangkap khua mipi inn khal an urkang tel.
“Kan doawknak hmun cu Tantaungkyi myone sungtel a sinan, Naypidaw, Pago le karen ramkulh pawl pehawknak ramri laifang a si ih, Naypidaw ramsung lamah a si,” tin a sim.
Min Aung Hlaing Ih Inn Dang An Zuar Bet Tum – NUG cozah cun Yangon ih Min Aung Hlaing inn dang pakhat zuar bet an tum thu mipi theihternak an nei ih, a hlan inn pakhat an zuar dan vekin mi tampi lei theih dingin zuar an tum.
NUG cun Min Aung Hlaing ih inhlia inn cu $10 Million in an rak zuar hmaisa ih, $8 Million man an khawng zo. Innpi cu mi pakhat lawngih a zate lei thluh siloin $100 man tete ih lei theih in an zuar.
NUG cozah cun Yangon ih Min Aung Hlaing inn dang pakhat cu $10 Million thotho in zuar an tumih, neitu sinak man pakhat ah $100 tete khalin an zuar ding. innpi cu May 5, 2022 in an zuar thok tum.
NUG ih thusuah dan vek asile Min Aung Hlaing in ram mipi hnenih inn a lonmi Innhmun 60 hrawng a nei tin an sim ih, mipi hnenih a lonmi hlir an si ruangah a sangsang tein zuar sak vivo an tum.
Innpi an zuar man ih an ngahmi sumpai cu dohtlengnak hrang hman a si ding thu NUG cun mipi theihternak an nei. Innpi an zuar dan cu mipi lamin nehnak kan co veten Min Aung Hlaing ih inn pawl cu a takin an zuar dingih tamsawn in an khawng asile, tuih rak ciatu pawlin hlawknak tampi an tel ding.
Dothlengnak ah mipi lamin nehnak kan co lo ih, ralhrang in thuneihnak an kai vivo thei asile tuih Min Aung Hlaing inn leitu pawlin sumpai an ngah kirsal lo dingih, innpi an lei man cu dothlengnak hrang pe vekin a feh lanta ding. Min Aung Hlaing ih inn leitu tamsawn cun innpi duh ruangah siloin dothlengnak hrang sumpai in kan telmi a sisawn tin an sim.
Leave a Reply