Innsang Ro Zuar In Ralthuam An Lei – Makui ramthen Myaing myone PDF hotu cun tuitum dothlegnak hrang ralhrang ralkap an do reromi ah ralthuam an tulsam tukih, an innsang neihmi thilri tiang zuarin ralthuam lei an tum thu a relsuak.
Myaing myone PDF hotu cun “Ralhrang pawl cu kum 70 lenglo ding zo an si ruangah ralthuam le mipum zawngin kan bang thei lo. Ralthuam an nei tha tuk ih, kannih cu mahte tuahcop menin ralhrang do rero kan si. Ralthuam ngah dingin theitawk kan suah ih, kan suithi le kan neihmi thilri kan zuar ih ting 10 hrawng kan ngah nan, ralthuam lei a theih lo.
“Cutikah kan sungte pawl kan ron ih, pupa ro kan neihmi ka lo le hmunram pawl kan zuar hnuah ting 20 hrawng kan ngah nan, ralthuam man ting 100 hrawng a thlen tikah kan duhmi ralthuam kan lei thei cuang lo. Ka nulepa cu lo hnatuan an si bangin caw halkhat an nei ih, cumi caw halkhat khal ralthuam leinak hrang kan zuar zo. Caw pakhat ah ting 15 in halkhat kan zuar ih, ting 30 kan ngah. Ka nulepa cun ram dinhmun an thei tukih, buainak an tuah lo. Nan hrang a si ahcun kan taksa parih thuamhnaw khal kan zuar men ding in ti men.
“Cutlukin nulepa in in dinpi tikah kan phur ih, thazang kan ngah tuk. Asinan, tu ahcun ralhrang pawlin mipi an bat thlang. PDF an um ruangah tin’ khua an nawkkang. Cutikah khua mipi pawlin ralhrang pawl khua an urkang caan ah PDF pawlin an kham thei lo mawsi timi thusuhnak a tamih, cuvek kan theih tikah kan riahse ngaingai.
“Kannih ramsung mipi ralkap zaten komkhawm cun One Million cu kan kim ve ding. Mipi ralkap zaten lakin hmun 4 ah hmunkhat te lawng ralthuam in pe thluh thei sehla cuti cing hmangin kan duhmi Democracy hrang ralhrang kan doneh rori ding tin’ kan ruat. Curuangah kannih Myaing myone PDF pawl cun NUG ih pek dingmi ralthuam beisei in theitawk kan suah hrih.
“Dothlengnak hi kanmah bulpak pakhat lawng tuah kan silo ih, kanmai pawlkom hrang lawng tuah khal kan silo. Dothlengnak ih nehnak kan co tikah ralhrang salin kan luat dingih, ralhrang uknak in kan luat ding. Kan duh tukmi Federal Democracy uknak kan ngah ding,cutikah mipi kanmahten kan uk aw thei ding. Dothlengnak ah a phunphun in tel a theih ih, kannih khal lo theih lo ruangah ralthuamkai kan si. Kan zaten dothlengnak theh lohli ding kan duh thluh ruangah mipi kan zaten dohtlengnak ah ka tlinnak zawnin tel cio uhsi,” tin a sim.
Ralhrang Pawl Remnak Tuahpi Theih An Silo Titu US Palai – Ralhrang ralkap in rampi thuneihnak an lak tikah mipi lamin ruahnak phunphun a suak. Thenkhat in ralhrang pawl cu ralthuam thawn do rori an tul,colo cun remnak tuahpi an theih lo an ti ih, thenkhat cun ralthuam thawn doawk tikah thihnak a thleng menih, doawknak in a tawp a thleng thei lo. Curuangah remnak tuah sawn ding kan si an ti ve.
Ruahdan bangaw lo mipi lakin ralthuamkai an um bangin, ralhrang pawl rak be rerotu pawlkom khal an um ve. US palai hlun Scot Marciel khal ralhrang thu ah a tongsuak ve ih, annih cun ralhrang pawl cu remnak tuahpi theih an silo tin’ a sim.
Scot marciel cun “Hmaisabik ih kan rel digmi cu Daw Aung San Suh Kyi a si. Suh Kyi cu ralthuam hmangih cangvaihnak duh lotu a si ih,thurum thawh cangvaihnak tel lo dothlengnak duhtu a si. Curuangah Myanmar mipi khalin thahrum thawhnak tel loin ralhrang uknak an rak do hmaisa ve. CDM an tuah ih, daiziar in lamzawh duhphorhnak an nei.
“Asinan, ralhrang pawlin daiziar ih lamzawh duhphorhnak neitu pawl ralthuam hmangih an thekdarh tikah mipi hrang hril ding dang a um nawn lo ih, mipi khalin ralthuam an kai ve. Riahsiat thlakzet pakhat cu ralhrang hotu pawl kan zoh tikah a biakten biak ih remnak tuahpi theih ding hmuihmel an keng lo. Curuangah tuih um dan thei pakhat cu ramleng pawlkom zaten le ramsung mip zatein ralhrang phit thluh sehla, ralhrang pawl lamzin tawp ko tuah thluh sehla cumi lawngah an tha an thlah ding.
“Ramleng in ralhrang an hrem, an pom lo. Ramsung ah CDm cangvaihnak le ralthuam hmangin ralhrang donak pawl cu ralhrang pawl phurrit peknak thabik a siko tin ka pom. Hiti bakin ralhrang dodan dang ciamco a um cuang lo. Cumi zaten lungrual zetin tuah thluh thei ding cu thupi bik a siko.
“Myanmar ram sung khalah nan thu a rual thei lo ih, buainak phunphun, pawlkom phunphun nan um. Cutikah hivek pawl kilkhawi thluh theitu cu kanmah lawng kan si tin ralhrang pawl an ruat aw. Kanmah lawngin buainak ralthuam hmangin kan uk thei timi an thinlung putin buainak a luarter. Ralkap silo ih ruahnak an pom duh lo ih, ralkap thuneihnak a ttumsuk ding an duh lo lawlaw.
“Asinan, tuih hmailam nan pan zetmi cu mipi zatein Federal Democracy uknak nan duhmi a si ih, ralhrang pawlin kawl miphun lawng hotu an si ding timi an ruahnak cu mipi lamin an pom nawn lo. Tlangpar miphun pawl ih sinak le tulsami pawl khal hmunrawn ih um pawlin an theithiam vivo thlang. Tuih Myanmar mipi pawl zuam dingmi cu ralhrang uknak hlon ding le tlunlam kaitu um loin Federal Democracy uknak din ding cu a si,” tin a sim.
US palai Scot Marciel cun ralhrang donak ah ramleng ih hremnak, pom lonak, CDM tuah le ralthuamkai ih do bak thildang tha a um lo a timi cu ramleng cun lungrual zetin ralhrang an hrem thluh thei lo ih, China, Russia le India pawlin ralhrang an dinpi. Ramsung ah CDM tuah lo an tamsawn ih, ralthuam hman ding nei lo mipi ralkap tampi an um. Hivek pawl famkim thluh sehla ralhrang pawl lamzin a tawp rori dingah ruah a si.
Min Aung Hlaing In UN Palai Thu A Tiam – UN Myanmar palai Noeleen Heyzer in ralhrang hotu Min Aung Hlaing a ton hnuah ralhrang hotu Min Aung Hlaing hnenin thutiam a don thu UN cun August 18 ah ca an suah.
UN Myanmar Palai cun Min Aung Hlaing hnenah ram buainak ruangih kaihmi pawl thlah zalen thluh dingin, mipi lakah ralthuam hmang lo dingin ,ram buainak relfel dingin le bomnak pek tikah hnaihnok dingin tivek a dil ih, Min Aung Hlaing cun Daw Aung San Suh Kyi na tong thei leh ko ding tin UN Myanmar palai a rak tiam.
Tuitum cu UN Myanmar palai Noelen Heyzer in Un Myanmar palai a si hnuah avei khatnak hrang Myanmar a tlawnnak a si ih, ralhrang hotu Min Aung Hlaing a ton ruangah relsiat a hlawh ngaingai. Ralhrang hotu Min Aung Hlaing in UN Myanmar palai hnenah Daw Suh Kyi na tong thei leh ding tin thu a rak tiammi cu anmah UN lamih thusuah a si.
Leitlun le Myanmar mipi cun ralhrang thusuak hrimhrim an zum lo ih, ralhrang hotu Min Aung Hlaing tongtu Un Myanmar palai Noeleen Heyzer khal a hna in bang dingah an phut.
Leave a Reply