Party Sinak Diltu 8 An Um – Ralhrang ralkap in rampi hrilawknak tuah an tummi hrang ramsung party zaten Party sinak thar nan dilsal ding ti’n thu an suahnak a rei zo nan, tutiang ah Party 8 lawngin ralhrang hnenah party sinak an dil lai.
USDP party in ralhrang hnenah party sinak an rak dil hmaisa bik ih, cumi hnuah Federal Democratic Party, UDP, MPDF, PNO ,DFLP, NDP (Kachin ), le PBST pawlin ralhrang hnenah party sinak an dil ve.
Tuitum ah ralhrang hnenih party sinak thar diltu pawl cu 2020 rampi hrilawk tumah NLD pawl an dik lo, vote zoh sal uh,lole thuneihnak la men uh ti’n ralhrang hnenih heknak rak tuahtu pawl an si. USDP party hi ralhrang party ti ih relmi an si ih, a dang party pawl cu party teneu thuneihnak duh, lal duh men ih dinmi party an si. NLD cozah san le a hlan cozah san hrilawknak ah an rak tel hneuhno theu nan, nehnak an co dah lo ih tuitum ah ralhrang in hrilawknak an tuah thei asile party malte lawng an tel dingih thuneihnak kan co ve pangah ti’n ralhrang hnenah party sinal dil.
2020 rampi hrilawknak dan vek asile Myanmar ram sungah party 92 an um ih, cumi lakin party 8 lawngin ralhrang hnenah Party sinak an dil. USDP lo hmuah cu party tenau te an si ih, rampi huapih party din thei cu USDP party lawng an si hrih.
Ralhrang ralkap cun March 28 tiang party sinak nan dil lo asile party kan lo thahsak ding ti’n thu an rak suah. Party dang thenkhat khal hrilawknak ah kan tel lo asikhalle party nunternak hrang party sinak dil sehla a tha pei maw ti’n meeting nei rero lai khal an um.
Chin Party CNLD Chairman Pu Ngai Sak khalin “Miphun pakhat dinhmun in party nei lo ih um hnak cun party sinak cu nungter tento thei sehla a tha ding. Hrilawknak kan tel le tel lo cu thuhran, hrilawknak ah kan tel lo asikhalle party nunter hi a thupi tuk. Chin Party CNLD a thih pang cun Chin miphun in miphun huap party kan nei nawnlo ding a si,” tin a hmuhdan a rak sim ve zo.
Ralhrang ralkap cun tuikum sungah hrilawknak ka tuah ding ti’n thu an rak than rero zo nan, tuisun nitiang cu ralhrang in hrilawknak thu an relsal hrih lo. Min Aung Hlaing cun rampi dinhmun a him hrih lo, remnak ding cu a hla tuk lai ti’n a sim ih ralhrang in hrilawknak an tuah lohli hmel lo titu khal an um. Ralhrang cun 2023, February 1 hnuin thla 6 dang lawng thuneihnak caan an nei ih, thla 6 a cem hnuah ziangtin feh vivo an tum timi cu leitlun ih thlirmi khal a si.
Thla 6 a kim hnu lawngah ralhrang in hrilawknak buaipi an tum fang sipei maw? thla 6 a kim hnuah ralhrang in caan saupi hrang thuneihnak lak bet an tum sipei maw timi thu pahnih cu thla 6 kim hnuih ralhrang tuah theimi lamzin umsun in a lang. Ziangahtile, ralhrang in kum 2 daih rampi thuneihnak an lakmi cu a kim fel zo ih cumi hnuah thla 6 dang caan an la bet sawn. Cucu 2008 daan hrampi vekin kan feh tiah an sim. Ralhrang in hrilawknak an tuah asikhalle hrilawknak hmangin thuneihnak lak bet vivo an tum. Cumi ruangah mipi ralkap le NUG cun ralhrang tuahtummi hrilawknak an duh lo lawlaw.
Leave a Reply