Ralhrang Hnuaiah Phun 10 Phitu An Mal

Ralhrang Hnuaiah Phun 10 Phitu An Mal – Ralhrang ralkap cun tuikum khalah an kuthnuai ih tlawngkai pawl camibuai tuahter an tum leh ih , phun 1-0 pawl cu March 8 in 18 tiang camibuai phi dnig an si.

Tutiang phun 10 camibuai phi dingin hminpe phun 10 tlawngta ting 1 le thawng 80 fang lawng an um ti’n tuanvo neitu pawlin an sim ih, nikum hnakin an malsawn. Nikum 2022 ahcun ralhrang hnuaiah phun 10 camibuai phittu tlawngta ting 2 le thawng 80 hrawng an rak um.

Ralhrang in rampi thuneihnak an lak hlan ahcun Myanmar rampi huapin phun 10 camibuai phitu ting 7 in ting 9 tiang an rak um theu. Ralhrang in rampi thuneihnak an lak hnu ahcun tlawngkai khal an mal ih phun 10 camibuai phitu khal theihtheih zetin an mal.

Tlawng sayamah pakhat cun “Tlawngta nauhak thenkhat cu ram buainak a fel hnu lawngah tlawng ka kaisal leh ding titu khal an um. Nikum ah tlawngkai nan, tuikum ah kai peh nawn lo tivek khal an tam. Thenkhat cu sumpai neih lo ruangah le hnatuan tul ruangah tlawngkai lo khal an um. Tuikum hi phun ca zirmi a hlun hrang netabik kum ding a si ruangah phun 10 rak kai zo pawl cu phi thei haisehla ka duhsak. Tuitum theh cun zirnak thar a si thlang,” ti’n a sim.

Ralhrang cun tuikum hrang phun 10 camibuai phitu ding zokhal February thla sungah card a rak tuahsak thluh zo ih, cumi ruangah phun 10 camibuai phitu ding zat cazin a theihtheih zo.

Ralhrang in ralthuam rinsan in rampi thuneihnak an lak tikah uknak ziangkim khal anmah in an kaiter awter ih fimzirnak lam tiang tuanvo an la awter. Curuangah dothlengnak tuahtu pawl cun ralhrang hnenah tlawngkai lo dingin theitawk an rak suah ih , NUG cozah hnuaiah tlawngkai le phun 10 phitu tampi an rak um ve.

Thawngtla tlansuak 9 Lakin 3 Kaisal – Mandalay ramthen Yamintin thawnginn lampan thawngtla 9 pawl cu March 1, zanlam nazi 4 hrawngah an tomi thawnginn mawtaw sungin an tlansuak ti’n thuhla theitu pawl cun an sim.

Thawngtla pawl cun thawnginn mawtaw sungih an tolai ah anmah kiltu palik pawlih meithal an longih palik pawl kap phah in an tlansuak. Thawngtla 21 pawl cu thawnginn in Court ah fehpi an si ih, an tlunlam ah thawngtla 21 lakin thawngtla 9 cun palik pawlih meithal an longih an tlan.

Thuhla theitu cun “Thawntla 9 in anmah kiltu palik pawlih meithal an lon hnuah an tlan. Palik pawl thawn an kap aw phah nan, an 9 in an tlansuak thluh thei. Tlansuak lakah kum 50 sung thawngtla dingin hremnak pek zomi khal a tel. Palik bawi pakhat a lu kuai khopin hriamhma a ngah ih,Palik dang pakhat khal an kap ngah ih sizung ah an tuamhlawm rero lai. Tu ahcun thawngtla tlansuak pawl theitawkin an hawl rero lai,” ti’n a sim.

Mandalay palik cun “Thawngtla 9 an tlansuak timi cu a dik. An tlan hnu veten theitawkin hawl hngal an si ih a hnu reilo ah thawngtla tlansuak 9 lakin 3 pawl cu Guipin khua kiangah kan kai ngahsal. Thawngtla pakhat cu kan kap that ngah ih a dang thawngtla pahnih cu nungdam in kan kai ngah. Thawngtla dang tlansuak pawl khal kan hawl peh rero lai a si,” tin mipi theithernak an nei.

Ralhrang In Kachin Pastor Thubuai An Tuahsak – Ralhrang ralkap cun an kaihmi Kachin baptist pawlkom thuronpetu Dr. Hkalam Samson cu rampi dokalh timi le dankalh pawlkom pehtlaih timi hmangin thubuai pahnih an tuahsak.

Sihni cun “Tu ahcun thubuai an tuahsak zo ruangah thubuai thawn pehpar aw in thusuhawk a si thlang ding. Tu khalah thubuai tuahsak bet an tumih cumi khal neta ah rel vivo a si ding,” ti’n a sim.

Dr.Hkalam Samson hi a hlanah Kachin Baptist pawlkom sungtuan a rak si ringring ih, tu ahcun thuronpetu dinhmun a si zo. Kachin ramkulh sungih raltlan pawl bomnak an don theinak dingah theitawkin tawlreltu a si.

2022, December 4 ah Pastor dang thawn Thailand feh an tumih Mandalay Airport ah amah lawng ralhrang pawlin an rak kaih hnuah an khum. Reizet an khum hnuah tu ahcun thubuai pahnih an tuahsak zo. Kachin Bapttist pawlkom sungtuan a rak silai ah US president Donald Trum rak tongtu a si ih, Myanmar ram buainak a rak hek.

Cumi ihsin thokin ralhrang cun an ngaih lo ih kaih an tum rero zo nan fumfe zetin kaih theinak an neih lo tikah an rak kai thei lo. Tuitum ahcun dankalh pawlkom le rampi dokalh ti zawngin an kai ih thubuai an tuahsak.