Ralhrang ralkap hotu Min Aung Hlaing cu thupten Russia ram Moscow khawpi a rak feh ih, tuini July 12 ah Moscow a thleng fel zo tin Russia ralbawi cun Russia thuthang pawl a simthei hai ih BBC khalin an tarlang.
Ralhrang hotu Min Aung Hlaing cun Russia a umsung ah Russia ralbawi hrekkhat a hmu dingih, Cumi hnuah Nuclear buaipitu Rosatom Company ih hotu pawl khal a tong ding. Neta bik ahcun Moscow ih an din tharmi Myanmar Cultural Center onpuai a hmang peh ding tin Russia ralbawi cun Russia thuthang pawl a simthei.
Min Aung Hlaing in Russia cozah hnuai ih Nuclear ralthuam tuahtu pawl a ton ding ruangah ralhrang khalin Russia bomnak in Nuclear neih an tum ve sipei maw timi cu leitlun mipi thusuhnak pakhat a tling.
US cun Myanmar mipi kan lo dinpi ringring dingih, nasaten ralhrang pawl kan nor rero ding tin thu an rak suah zo ih, US lamin thu an suah hnu ni 2 liam ahcun ralhrang hotu Min Aung Hlaing khal a rualpitha Russia khawpi Moscow a thleng cih ve.
US le Russia cu ziangkim ah do aw an si ih, Russia cun leitlun ah lamtang hawlin US ih zohsiatmi ram pawl cu an lamtang dingin an rak leem, an tuanpi rero ve.
UKraine President In An Ram Palai 5 A Bangter – Ukraine president Zelenskyi cun India, Germany, Czech , Norway le Hungary ram pawlih an ram palai pawl cu an hna in a bangter thluh.
President thusuah ahcun palai 5 pawl banter an si ih, ziangruangah an hna in banter an si timi cu an telh lo. Cumi tlunah bantermi 5 pawl cu Ukraine cozah hnadang pek an sipei maw tikhal an simtel lo.
Russia in Ukraine an do hnuah Ukraine president Zelensky cun ramdang ih Ukraine ram palai pawl cu an umnak ciar ah Ukraine ram hrang bomnak theitawk ih hawl dingin a cah cio hai. Himi ah India, Germany , Czech , Norway le Hungary ram pawl cu Ukraine bawm tuk lemlo an si ih, hivek ruangah Ukraine palai 5 pawl ban an tong phah sipei maw titu khal an um.
Tu ah Russia cun Ukraine a do peh rero lai ih, Ukraine cun ramdang bomnak tel lo cun Russia an do thei lo thu an rak sim zo ih, ramdang pawl cu ralthuam le sumpai in anmah bawm dingah an sawm rero. Thla 5 sung doaw an si thlang tikah Ukraine mipi khalin bomnak phunphun an rak tul ve.
Leave a Reply