Myanmar le Thailand ramri ih um Rakhine ralkap AA ih sakhan pakhat cu July 4, sun ah ralhrang ralkap in vanzam in bomb an thlak ih, AA sungtel hrekkhat an thi tin AA cun thu an suah.
AA cun “July 4, sun nazi 12:25 hrawngah Myanmar le Thailand ramri ih um Rakhine ralkap AA ih sakhan pakhat cu ralhrang ralkap raldonak vanzam pahnih in bomb in thlakih ,sakhan kiangkap ih um AA miraltha hrekkhat an thi ih, hriamhma ngah khal an um.
“Ralhrang ralkap in kan sakhan ih bomb an thlak ruangah kan sakhan sungin sizung, sikhan le thil thiltinak cetzung pawl an siat. Kan sakhan bomb in thlak hnuah Ralhrang ralkap raldonak vanzam pahnih cu Thailand hmunram ah an lut cih a si,” tin AA cun thu an suah.
AA thuphuangtu Khai Thukha cun “Thil umdan kan zoh tikah ralhrang in tumtah nei zetin kan sakhan pakhat bomb an thlak in a lang. Ziangahtile, a tu ih KNU le ralhrang pawl doawknak hmun cu kan sakhan thawn a hla aw tuk. Curuangah, ralhrang pawlin kan sakhan cu tum nei zetin bomb an thlak in a lang.
“Ralhrang in kan sakhan bomb an thlak ruangah kan miraltha 6 an thi. Ziangruangah ralhrang in kan sakhan bomb an thlak timi a san thei dingin zingzoinak kan nei rero lai. Tuhrih tiang ahcun hibak rel thei kan nei hrih lo a si,” tin a sim.
CNDF In Ralhrang 66 An That – Chin ramkulh Falam peng sung le Kalay peng sungih thla 2 sung ralhrang an donak thuhla cu July 4 zan ah CNDF in mipi theihternak an nei ih, may thla le June thla sungih thla 2 sung ralhrang an donak ah ralhrang 66 an thi tin an tarlang.
Thla 2 sung ralhrang an donak ah CNDF lamin miraltha pakhat cun ram le miphun hrang a nunnak a hlanih, CNDF miraltha dang pakhat cu bomb palpuak ngah ruangah a nunnak a cem. Thla 2 sungah CNDF lamin miraltha pahnih an fehliam ve. Thla 2 sung doawknak ah CNDF lamin mi 4 in hriamhma an ngah.
Ralhrang pawl cun May thla sungah Falam peng Ramthlo khua in mipi inn 10, Tlangzar khua in mipi inn 17 , Parte khua in mipi inn 6 le Zawnglei khua in mipi inn 5 tin an rak urkang sak tin CNDF cun thu an suah.
Inn Khat Pakhat Pituhsit An Ko – Tanintharyi ramthen Mezalikung khawpi ah veng uktu Than Soe cun a veng sungih mipi pawl cu inn khatah mi pakhat pituhsit lut dingin a theihter hai.
Khuami pakhat cun “Venglal cun pituhsit kan din ding tin inn khat hnu inn khat an lutih, hminkhen in nganter. An relmi cu kahawknak a um tikah kan tel a tul ih, a tul asile veng khal kan kil ding tin in sim. Mino lawng cazin an la lo ih, kum 50 tlun khal hminkhen an nganter. Hivek ruangah veng sungah lungawi lo an tam ngaingai.
“Venglal le a thluntu pawl cun tlunlam thupek ruangah a si tin an rel. Hmatpungtin tiang mi an zohsak ih, hrekkhat cu an theih lo sungin hmin cazin an rak telhmi khal a um. Hivek cu kan veng lawngah a si hrih ih, veng dang le khua dang an peh vivo ding in anmah lam cun an sim. Kan lugnawi lo lawlaw a si,” tin a sim.
Pituhsit timi mipi ralkap cu ralhrang ralkap pawl ih dinmi an si ih, anmah dinpi dingin le pawlkom dang lakin khua kilhim dingah an din. Myanmar rampi huap cun theih ding an mal zetih, Shan ramkulh, Tanintharyi ramthen le Ayeyarwaddy lamah pituhsit tivek an um lai.
Ralhrang Tuanpi BGF 7 An Thi – Karen ralkap KNU hmunram 5-nak sungih doawknak ah ralhrang tuanpi BGF 7 an thi tin KNU cun mipi an theihter.
Ralhrang ralkap bawm dingin ramri kil BGF pawl cu ralthuam thawn an pok ih, lamlak ah KNU ralkap KNLA pawl cun BGF pawl ih tomi mawtaw an rak kap. Mawtaw ahcun BGF lam 7 an to ih, an zaten a thi thluh.
KNLA pawl cun BGF pawl ih tomi mawtaw sungin meithal le ralthuam dang an lak hnuah BGF pawlih mawtaw khal an urkang siat thu mipi an theihter. BGF timi cu karen ralthuamkai pakhat an sinan, ralhrang thawn tuantlang dingin lungkimnak an neih hnuah ramri kil in ralhrang hnuai ih hnatuan an si. Ralhrang thawn tuantlang an si tikah an phunpi KNU khal an do phah rero theu.
Chuang Oo Ah Ralhrang 5 An Thi – Sagaing ramthen Chuang Oo myone ah ke ih fehkhawm ralhrang ralkap pawl cu Chuang PDF pawlin July 4, zinglam nazi 5 hrangah bomb puah in an rak do ih, ralhrang 5 an thi tin thu an suah.
Chuang Oo myone nat-yi khua ih umhmun khuar ralhrang ralkap pawl cu ke in khua dang an pan ih, Chuang Oo PDF pawl cun lamzin in an rak bawh cia. An bomb kamnak hmunih ralhrang pawl an thlen zawngah bomb an puah ih, meithal in an kap ciamco bet.
Chuang Oo PDF thuphuangtu cun “Tuini tiang ralhrang pawl kan do peh theinak san cu mipi lamih dinpi le tanpinak ruangah a si. Mipi bomnak um lo sehla tutiang kan ding thei lo ding. Mipi lamin in dinpi nawn lo ih, in bawm nawn lo ding asile kannih khal kan bang mai ding.
“Tutiang ahcun mipi lamin thaten in somdawl ih, theitawkin in dinpi. Hivek ruangah kannih khal mipi hrang ralhrang ralkap pawl kan do rero. Hmailam khalah mipi pawl in dinpi peh vivo dingin kan sawm duh hai a si,” tin a sim.
Kaya Ah Ralhrang Tlawng An Hlawhsam – Ralhrang ralkap in rampi huapin tlawng an dinmi ah Kaya ahcun zatek sungin 90% pawl cu mipi tlawngah an kai ih,ralhrang tlawngih kai cu siar tham lo an si tin Kaya mipi uktu cun an sim.
Ralhrang tlawngih tlawngkai an mal tuk tikah Kaya mipi uktu cun tlawngkai duh pawl hrang zamrang zetin timtuahnak an nei ih, nulepa pawl thawn tangrual in mipi tlawng an din. Tlawng an dinmi ahcun Federal Democracy uknak thawn mil aw in ca an zirh ih, thuanthu le umtlannak tivek zirhnak khal an rem thluh tum.
Tuikum ihsin thokin anmai tong thawn ca an zir thu khal an sim ih, ram buainak a that tik khalah an zirnak fehpi vivo an tum thu an tarlang.
Mipum ting 3 hrawng umnak Kaya ramkulh khalah nasaten ralhrang uknak an do ih, ralhrang le mipi ralkap doawknak ruangah raltlan ting 2 tlun tlung thei hrih loin an um. Raltlan nauhak pawl khal an dinhmun ih zir in ca an zirthei dan tawlrel sak an si tin Kaya mipi uktu cun thu an suah.
Russia Le Ukraine In Khawpi An Cuh Aw – Russia in Ukraine an donak thla 5 sung an lut thlangih, ram pahnih doawknak ah remnak um thei hrih loin an do aw peh rero lai.
June thlacem hrawng ahcun Russia ralkap in Ukraine khawpi bik Kyiv le a kiangkap an kap ciamco nan, tufang cu Russia ralkap in Ukraine khawpi dang kap buai nawn loin Ukraine nisuahnak lamih an cuhawk reromi Lysychansk khawpi ah nasa ten an do aw.
Tuih dinhmun ah ram pahnih cun an kutih Lysychansk khawpi a um thu an rel veve. Ukraine lam cun kan kutah Lysychansk khawpi a umlai ih, kannih Ukraine ralkap pawlin kan suahsan fel hrih lo tin an sim. Cutilai in Russia lam cun Lysychansk khawpi khal kan kutsung ah a um zo tin an sim ve. Hivek a si ruangah ram pahnih cun Donbas ramthen sungih Lysychansk khawpi an cuh aw rero lai in a lang nan, Ukraine lam dinhmun a tha lo.
Russia cun thla 5 sung Ukraine an do hnuah Central Ukraine lamin Mariapol khawpi an rak la hmaisa bik ih, cumi hnuah Ukraine nisuahnak lamin Severodonetsk khawpi an la bet zo. Tukhalah Ukraine nisuahnak lamah doaw peh rero an si.
Leave a Reply