Ralhrang In An Sinak Diktak ASEAN An Sim

Ralhrang In An Sinak Diktak ASEAN An Sim – Myanmar ram buainak thuhla ah ASEAN ramdang palai pawl cu October 27 ah manhlap zetin meeting an nei ih, meeting an tuah theh hnuah ASEAN ramdang palai pawl cun ralhrang thawn remnak an tuahmi 5 pitlin dingin ralhrang an nor bet hrih ding thu an suah.

Cuveten ralhrang khalin thu an rak suah ve ih,tuitum ASEAN ramdang palai meeting thusuak zaten meeting ih an tel ve lo ruangah an pitlin thei lo ding thu , an tuahsuak dah lo ding thu an sinak diktak an pholang. Ralhrang cun meeting ah kan tel lo ih,ASEAN sungtel ram 10 lakin ram 9 lawng an tel, curuangah an meeting thusuak khal kan tlunpi thei lo tin ca an suah.

Myanmar Politics thiam Than SOe cun “Tu ah ASEAN ramdang palai pawl cun manhlap zetin meeting an nei ih, ralhrang thawn remnak an tuahmi 5 an dinpi hrih. Cumi hmangin ralhrang nor an tum. Asinan, ralhrang pawlin ASEAN an rak tih lo zetin a langih, ASEAN thawn remnak tuahmi 5 an tuah dah lo ding thu ca an suah men. Cutikah ASEAN lam ziangtin an cangvai peh ding timi cu November thla ASEAN meeting ah a fiang zet ding. Ralhrang lamah ASEAN meeting ah anmah tel rori an tumih, cumi hmangin ASEAN an nor thiam ve,ASEAN lamin ziangtin an let ding timi cu hngahhlap umzet a si,” tin a sim.

ASEAN le ralhrang cun Myanmar ram buainak thawn pehparaw in remnak 5 an rak tuah ih, cupawl cu dankalh cangvaihnak bansan dingin, remnak hawl dingin, buainak ih tel zate tongaw dingin, bomnak pekmi hnaihnok lo dingin ,ASEAN palai Myanmar ah feh dingin le a duhmi pawl tong dingin timi pawl an si.

Ralhrang cun “October 27 ah ASEAN sungtel ramdang palai pawl meeting an nei ih, Myanmar aiawh dingah Politics ih tel lo pakhat an sawm nan, ASEAN dankalh a si ruangah kan thlah lo. ASEAN daan ah sungtel zaten bangran in covo a um ih, ram pakhat ram sungah buainak tokbuai lo ding timi khal a um. Cucu, kannih Myanmar in kan thlun ih thleidang zetin Myanmar in zoh cu kan pom thei lo lawlaw.

“Meeting ahcun palai 9 lawng a ntel ih, palai zate lungkimmi a silo ruangah ASEAN daan vekin an thurelmi ziangkhal Myanmar cun kan thlun lo ding. Kannih cun Myanmar ram a that theinak ding le Democracy a ngah theinak dingah theitawk kan zuam rero nan, NUG le an kuthnuai PDF pawlin an siahsuah rero men. ASEAN thawn remnak kan tuahmi 5 khal pitlin dingin kan zuam rero ih nan duhduh danin in nor rero hlah uh. Hivekin in nor rero asile siatnak a thlen sawn ding a si,” tin thu an suah.

Ralhrang thusuak zoh tikah anmah tel lo meeting thusuak cu thlun an tum lo. Min Aung Hlaing tel tumih remnak an tuahmi 5 cu pitlin ka tum rero lai tin an sim. Asinan,October 27 ih ASEAN ramdang palai ah ralhrang an tel lo tikah meeting thusuak ziangkhal kan tuah lo ding tin thu an suahmi a si.

Ralhrang In Kalay PDF Pahnih An That – Sagaing ramthen Kalay peng sungih mipi humhimtu Kalay PDF sungtel pahnih cu ralhrang in an kaih hnuah an that tin Kalay PDF cun mipi theihternak an nei.

Kalay PDF tatyin 6-nak tuanvo neitu pakhat cun “Thuhla kan thei tlai zetih tui hnu lawngah mipi kan lo theihter. October 10 ah Tahan Niciataih ih duty ralhrang pawl cun Kalay PDF sungtel pahnih an kai. Pakhat sawn cu a zanah an that ih, an phum cih. A dang pakhat sawn cu laktlak nawn loin an hrem ciamco hnuah an that. Ralhrang in an kaihmi hnuah an thahmi pahnih cu Lal Biak Tluang le Lal Chan Him an si,” tin a sim.

Ralhrang Ruangah Zankhawm An Kham – Chin ramkulh Matupi ahcun ralhrang tih ruangah zan an khawm ngam nawn lo ding thu pawlkom cun thu an suah. Ralhrang lamin an nor natsat tuk ruangah Matupi ih Kawhhran pawlkom pawl cu October 28 ah tonkhawmawknak ah an nei ih, cumi ah zankhawm nawn lo dingin thu an suah.

Meeting ih tel pakhat cun “Tuisun meeting ih kan relmi cu sun lawmgah kan khawm ding. Biakinn lawmgah khawm ding kan si ih, khawm tiak veten biakinn sangka pawl khar thluhin kan tin cih ding. Zan ahcun khawm nawn lo dingin kan rel ih, inn lamah zan ahcun khawm lo dingin kan retcat. Hivek cu ralhrang lamin nasaten an hringhro ih nan nor ruangah biaknak pawlkom khalin hitin thu kan suah phah.

“Biaknak lam an kham cu si ciah lo. Zohman an zum ngam nawn lo ruangah hivekin thu an suah sawn si ding tin kan ruat. Biakinn ih feh khal mi an zum nawn lo. Khristian lawng siloin anmah bukdah lam khal an kham. Ziangvek biaknak khal an hringhro a sibik. Umkhawm hrimhrim an tih ih, an hua. Curuangah zansuah ngah lo thu tiang an suah a si,” tin a sim.

Matupi ih um pakhat cun “Matupi ah ralhrang pawl an thleng thar ih, ralhrang pawl cu khua sungah duhtawkin an um. Mipi umlonak inn an bauhsak ih, mipi thilri an fir. Nikhat ah vei hnih mikhual cazin an cek caan khal a um. Cumi ahcun inn ih rak umkhawm le mi tam deuh um an duh lo ih, biakkhawmnak cu phuahhlam ah hmang hlah uh tin in hro. Cuvek ruangah biaknak pawlkom meeting nei an si,” tin a sim.

Meimit Cangvaihnak An Nei – Ralhrang uknak duhlotu le dokalhtu Myanmar mipi cun October 28 zan ah meimit cangvaihnak an nei ih, meimit hmangin ralhrang uknak an do.

A hlankhan in meimit cangvaihnak neih a si ding thu an than tikah ralhrang pawlin an duh lo zetih a phunphun in mipi an hro. Meimit cangaihnak ih tel pohpoh kan lo kai , thawng kan lo thla ding titiang in an hro. Asinan, a caan a thlen tikah mipi cu lungrual zetin meimit cangvaihnak an nei.

Yangon ih um pakhat cun “October 28, zan nazi 8:30 in minute 10 sung meimit ding ti a si ih, Yangon ahcun kan thimtlang khawm. Yangon veng dangdang ih um pawl kan suhawk tikah mipi lungrual zetin kan cangvai ih, ralhrang thuhnuai ah kan um timi kan langter.

“Ralhrang cun mei nan mit asile meter box kan lo laksak ding, kan lo kai ding, thubuai kan lo tuahsak ding tivekin an au ciamco nan, mipi cu lungrual zetin mei kan mit thotho. Yangon lawng siloin Mandalay lam khal mei an mit tlang tiah kan thei. Ramdang hmun dangdang khalah meimit cangvaihnak ah an tel cio a si,” tin a sim.

Ralhrang in rampi thuneihnak an lak hnuah mipi cun ralhrang uknak kan duh lo timi langter in a phunphun canvaihnak an nei rero zo. Tutiang ahcun lungrual ih mipi canvaihnak pawl an hlawhtling ih,ralhrang lamin an kham thei dah lo.

Mino pakhat cun “Mei kan mit ruangah ralhrang an thih phah lo nan, ralhrang thupek hnuaiah kan um lo, mipi kan lungrual, ralhrang thu kan thlun lo timi langternak a si. Hivek cu anmah ralhrang pawl khalin an duh lo zetih an tuarna thei tuk a si,” tin a sim.

HLasakthiam PoPo An Thlah – Ralhrang ralkap in rampi dokalh tin an rak kaihmi hlasakthiam Popo cu October 28 zan ah thawnginn in thlah zalen a si tin a sungte pawl cun an sim.

HLasakthiam Popo cu ralhrang in rampi thuneihnak an lakmi cohlang loin lamzawh duhphorhnak ah rak tel rerotu a si tlunah a sinak a larnak hmang tangkai in ralhrang uknak theitawk ih rak do rerotu a si. Ralhrang a do rero ruangah ralhrang cun hlasakthiam Popo cu 2021, April 15 ah an rak kai. Rampi dokalh timi pukmah 505 hmangin thusuai an tuahsak ih, 2021 December 30 ah ralhrang cun kum 3 sung thawngtla dingin Popo hremnak an rak pe.

Ralhrang in kum 1 le hrek tlun thawnginn sungih an khum hnuah October 28 zan ah Popo cu Insein thawnginn sungin suah zalen a si ih, an inn tiang thawngtla kiltu pawlin a thlah tiah amah naivai pawl cun an sim.

Pyu Saw Htee An That Aw – Mandalay ramthen Pyikyi Takon myone Takon dai lamzin ah mi pakhat thi cia in sar a si ih, a thuhla an zingzoi tikah Pyu Saw Htee a rak si.

Ruang buaipitu cun “Bike ih suak pakhat cu bike ih to midang pahnih in an kap that. Thuhla kan zingzoi tikah mithi le a kap thattu pawl khal Pyu Saw Htee sungtel an si thluh. An karlak ah buainak an nei ih, cumi lungawi lo ruangah an that. Meithal in vei 4 an kap ih, a hmunah a thi cih.

“Anmah ralhrang lamtang cun PDF cangvaihnak vekin thu an rak suah. Asinan, PDF cangvaihnak a silo ih,anmah Pyu Saw Htee sunglam buainak ruangah that aw an si. A hnuah ralhrang pawl an thlengih kiangkap mipi pawl an hro ciamco. PDF pawl cangvaihnak rori ah suah an tum. Asinan, anmah Pyu Saw Htee pawl sunglam buainak a si,” tin a sim.

Pyu Saw Htee timi cu ralhrang lamtang pawlkom pakhat an si ih, ralthuamkai in ralhrang tuanpi an um tlunah dalan vekih ralhrang tuanpi khal an um.

Sagaing ramthen Kanbilu myone Kyuanhla le Tanse ahcun pungki hohami Pyu Saw htee pawl cun khua sungih mipa cakvak pawl cu Pyu Saw Htee lut dingin an sawm ih ,lut duh lo cu khua in dawisuah an tum.

Khuami pakhat cun “Pungki le a kuthnuai mipum 30 hrawng khua sungah an lutih, Pyu Saw Htee lut dingin mipi an sawm. Mipi thlemnak ah Pituhsit tikhalin an ko ih, nan lut lo asile khua kan lo urkang sak ding, kan lo dawi tin an hro. Hivek cu Kyanhla myone le Tanse lamah an tam. Pyu Htee lamah paih lo cingih luhtermi khal tampi an nei.

“Ralhrang pawl cun an lamtang Pungki pawl an hmang tangkai thiam zetih Pituhsit le Pyu Saw Htee dintu ah an fial rero. Khua hrekkhat ahcun sumpai le thilri in mipi an lem ih, Pyu Saw Htee ah an lutter. Curuangah Pungki an si khalle ralhrang lamtang an si cun hremnak pek hngal ding an si ih, PDF lam cangai dingin kan duh a si,” tin a sim.

Khua Urkangtu Ralhrang 30 An That – Makui ramthen Htelin myone sungah duhtawk in mipi inn urkangtu ralhrang ralkap pawl cu mipi ralkap komkhawm in an kap ih, ralhrang 30 an thi tin thu an suah.

Doawknak hohatu Yaw pDF cun “Zinglam nazi 7 hrawngah a si ih,khua urkang ih suak ralhrang pawl cu kannih mipi ralkap komkhawm pawlin hmun 3 ah then aw in kan rak kap. Naiten ralhrang pawl kan rak kap ih, ralhrang 30 hnak in mal lo an thi. Kannih lamin YDF pakhat a hlo ih, culo midang cu kan him. Nazi 1 sung tluk kan kap aw ih, doawknak ah ralthuampi kan hmang. Kan dung tuvek caan doawknak ah ralhrang ralkap cun kan sungtel miraltha 14 an rak that ih, cumi thungrulnak hrang tuitum ah ralhrang thianfai kan si.

“Ralhrang pawl cu ka sung thla ihsin Htelin myone sungah duhtawk in cangvai, mipi inn urkang ih, mipi thilri siatsuah rerotu pawl an si. Tuitu ah kannih YDF, CDF KKG , PDF Htelin le ADF pawl tangtlang in ralhrang kan domi a si,” tin thu an suah.

Elon Musk In Twitter A Lei – Leitlun Milian bik Elon Musk cun Twitter a leifel tin an tarlang celcel ih,amah Elon Must khalin twitter thuhla tarlangnak a nei rero ve.

Elon Musk cun twitter zuk lem hmang tangkai in vate ka thlah zalen zo tin thu an suah ih, Twitter CEO Para Agrawal khalin Twitter CEO a sinak a rak bansan ve. Twitter Chairman Tarlor khalin Twitter Chairman a sinak a rak hlon ve zo. Amah Elon Musk khalin Twitter ih a sinak zawnah The Head Of Twitter” tin a thleng ve.

Tui kum thok ihsin Elon Musk cun twiiter lei dingin lungkimnak a rak tuahpi zo nan, fake account thuhla ah thufel lo a um tin Elon Musk cun Twitter alei duh sal lo. Cutikah Twitter lam cun remawknak kan neih zo bangin na lei tengteng a tul an ti ih, thubuai an rak tuahsak cih.

Cumi thla tawkfang hnuah Twitter lam ih hotu pawl an sinak an hlon celcel ih, Amah Elon Musk khalin Twitter hotu a sinak a hmang thok ve. Elon Musk cun $44billion in Twiiter a lei tin an tarlang.