Ralhrang ralkap in dothlengnak ruangih an kaihmi mi 4 an thlaithat thu ah ramleng ramdang pawl cun nasaten ralhrang an mawhthluk ih, tu ahcun ralhrang in amah mawthluktu ramdang pawl an let ve.
Ralhrang in ralthuam rinsan in rampi thuneihnak an lakmi cu ram mipi in pom loin lamzawh duhphorhnak neih a si ih, ralhrang pawlin lamzawh duhphorhnak nei ram mipi pawl ralthuam hmangin an thekdarh tikah mipi khalin ralthuam an kai ve. Cutikah khat le khat doawknak a sosang.
Khat le khat doawknak ah ralhrang cun an kaihmi pawl cu hremnak phunphun an pe ih, thihdan, damsung thawngtla dingin le kum tampi sung thawngtla dingin timi pawl an si. Ralhrang in thihdan an pekmi mipum 60 tlun lakin mi 4 pawl cu July 23 ah a takin an thlaithat ih, an cangvaih dan ruangah ralhrang pawl cu ramsung ramleng in nasaten mawhthluk an si.
Mawhthluk an si thu ah ralhrang ralkap cun “Rampi a daihnak ding, daan a kelih kan fehpi timi langternak le mipi humnak hrang ralthuam hmangih cangvai kan kaihmi mi 4 pawl cu Court in thihdan a pek bangin kannih khalin daan thawn kaih aw rori in kan thlaithatmi an si.
“Leitlun ramdang thawn khat le khat kan pehtlaihawknak ah ramsung ih neihmi daan le thuneinak cu kan cohlan dingmi a si. Ramsung ih buainak ah ramdang kan hrolh aw ding a silo. Ramkhat le ramkhat tihzahawknak thawn thurel ding kan si.
“Tuvekin in mawthluk tikah ttanlam nei in nan tong timi a fiangih, cuhnakin fiangsawn cu dankalh pawlkom, ralthuam hmangih cangvai tapung pawl nan ttanpi, nan dinpi ih thazang nan pe tinak a si,” tin thu an suah.
KNU, KNPP, CNF, CRPH, ABSDF, NUG le NLD Pawlin Lungrual In Thu An Suah – Ralhrang ralkap in thihdan an pekmi mi 4 pawl an thlaithat hnuah tlangpar ralthuamkai lakin KNU, KNPP, CNA, ABSDF, CRPH , NUG le NLD pawl cun lungrual in ca an suah.
Komkhawm pawl ih casuahmi cu hitin a si, “Ralhrang ralkap in an kaihmi mi 4 pawl an thlaithat thu cu ramsung thuthang hmangin mipi theihter an nei ih, thlaithat theinak daan an neih lo ruangah dankalh ih mithat an si.
“Ralhrang ralkap cun 2021, February 9 khalah duhphorhnak tuah lakih um mi pakhat an rak kap that ih, cumi hnuin tuini tiang zalennak duh mipi pawl cu duhtawk in an that ciamco men. San thuanthu ihsin tuini tiang ralhrang ralkap pawl cun dankalh in mi an that rero zo.
“Tu ahcun ralhrang pawl kan be dingih remawknak a um ko ding ti ih zumtu ,beiseinak neitu pawl khalin ralhrang ih cangvaih dan fiang thlang ding nan si ih, ralhrang ralkap uknak cu lungrualten a hramin phong ko kan zaten dotlang ding kan si.
“Remdaihnak hrang tongkam ih biak theih lo ralhrang pawl a takin hremnak an ton theinak ding khal theitawk kan zuamtlang ding. Dothlengnak ih tumtahbikmi cu ralhrang uknak a hramin phong ko do ih, Federal Democracy uknak din ding cu a si. Curuangah, tuitum cu Federal Democracy uknak dutu zaten a tawp tiang kan do ding caan khal a si.
Kannih, NUG, CRPH, KNU, KNPP, CNF, ABSDF le NLD pawl cun mipi thawn lungrual zetih fehtlang in ralhrang ralkap uknak cu dungsip loin a phunphun in kan do vivo ding timi khal kan lo theihter duh. Ralkap dinhmun in, palai dinhmun in, uknak dinhmun le a theih dandan in ralhrang uknak dotlang ding kan si,” tin thu an suah.
Mipi Thenkhat In Thlaithatmi Tei Inn An Deng – Ralhrang ralkap in mi 4 an thlaithat thu ah Myanmar mipi tamsawn cu thinheng riahse in an um nan, ralhrang lamthang thenkhat pawl cu July 27 zingah thlaithatmi lakin Jimmy le Phyu Ziya Thaw tei inn ah an feh ih, lungto in an inn an va deng ciamco.
Rak hmutu cun “Light Truck mawtaw pakhat sungah mipum 20 hrawng an to ih, Phyu Ziya Taw tei inn cu lungto in an deng ciamco. Tongkam sia phunphun in an au betih, zohman dawntu an nei lo. Cumi hnuah Jimmy tei inn lamah an feh betih, Jimmy tei inn khal lungto in an deng.
“An lakin thenkhat cu fung le nam an kengih, an au phah vivo. Hmundang ihsin ra an si ih, fialtu an nei in a lang. Hitin kan zoh dan vek asile Pyu Saw Htee ding an bangih, an cangvaih lai cu anmah in video an lak hnuah ralhrang thuthang lamah ralhrang thutlukmi dinpi vekin an thlah ciamco.
“Umdan cu Pyu Saw Htee tlunah 5000 kyats ih sawmmi khal an siko ding. Mipi in kan tuar tuk laiah hivekin tongkamsia an hmang thei ih, ralhrang ih thlaithatmi lakin mi 2 inn lungto in an deng. Tawkfang nawn cun an mawtaw sungah an lutih, hmundang ah an fehhlo thluh,” tin a sim.
Ralhrang Sakhan An Kap – Kaya ramkulh Demoso myone Daw-ngan Kha khua ih umhmun khuar ralhrang ralkap pawl cu Demoso PDF in July 26, zanlam nazi 3:20 ah an kap ih, ralhrang 3 an thi tin mipi an theihter.
Demoso PDF cun “Tuitum cu ralhrang ralkap in mi 4 an thlaithatmi thungrulnak hrang ralhrang sakhan do kan si. Ralhrang in democracy hrang zuamtu an kaih hnuah an thlaithat men cu ziang daan khalin a duh lo. kannih cu Democracy hrang thuneihnak atcilhtu ralhrang pawl kap kan si.
“Ralhang ih cangvaih dan le mipi an thah dan pawl cu ziangtik hmanah kan ngaithiam dah lo ding. Ralhrang ih cangvaih dan ruangah ralhrang sakhan kan kap ih, a hmunah ralhrang 3 an thi. Ralhrang hriamhma ngah tampi an um ih, kannih cu himdamten dung kan sipsal a si,” tin thu an suah.
Club 5 In C.Ronaldo An Hnong – A lek rero lainak a club Man United in Champions league an lek thei lo ding ruangah club thar hawl rero C.Ronaldo cun club thar a hawl hmu thei hrih lo ih, amah duhtu ih an rel netabikmi Atletico madrid khalin C.Ronaldo an duh lo thu mipi an theihter ve.
C.Ronald in Man United a suahsan duh thu a palai a sim hnuah a palai cun club phunphun a biak kualsak vivo ih, Barcelona, Chelsea, Bayern Munich le PSG pawl cun an club ih lek dingin kum upa zo hlawh tam C.Ronaldo an duh nawn lo thu a palai an rak simthei.
Neta bik ahcun C.Ronaldo le Spain club Atletico Madrid in thawmvang an nei ciamco nan, Atlietico Madrid lam khalin C.Ronaldo lei an tum lo thu an sim ve.
Atletico madrid President cun “Kannih Atletico Madrid In C.Ronaldo lei kan duh tivek thu a suah dan khal ka thei lo. Ziangtikhawng zawng khalin Atletico Madrid ih C.Ronaldo a lek ding cu a cangthei lo a si,” tin a sim.
C.Ronaldo ih club hlun Real madrid le Atletico madrid club pahnih cu Spain khawpi Madrid club veve an si tikah ral aw tuk, hua aw tuk an si ih, Atletico Madrid mipi khalin C.Ronaldo an rak hua tuk zo. Cuvek ruangah Atletico madrid president khalin an hnenih C.Ronaldo lek ding cu a cangthei lo ding tin a sim ve.
Tu ah C.Ronaldo cu Man United a kir hrih ih, man United coach le club hruaitu pawl thawn an umdan ding siseh a thuhla relfelnak an nei ding tin thunetabik a suak.
Leave a Reply