Ralhrang In Anmai Sakhan An Urkang Ih An Tlan

Ralhrang In Anmai Sakhan An Urkang Ih An Tlan – Myanmar ram a buai hnuih doawknak ah mipi ralkap pawlin ralhrang sakhan an urkang sak tilole ralhrang pawlin mipi ralkap sakhan an urkang timi cu thilthleng kan theih tampi pawl an si ih, tu ahcun mak danglam zetin ralhrang pawlin anmai sakhan an urkang ih an tlan thluh.

Makui ramthen Pauk myone Tayet ralhrang sakhan cu anmah ralhrang pawlin an urkang thluh ih, September 28 zingah an sakhan urkangmi suahsan in ralhrang pawl hmundang ah an tlan thluh.

Puak PDF cun “Ralhrang pawl cu September 26 ah Puak myone an thlengih an fehnak lamzin tluanih mipi inn pawl an urkang phah. September 27 ahcun ralhrang pawl Tayetkan sakh an thlengih zan an riak. September 28 sun ah ralhrang pawlin an sakhan an suahsan timi kan thei ih, kannih mipi ralkap pawl cun ralhrang sakhan umnak hmun kan pan.

“Ralhrang sakhan umnak hmun kan thleng cu mak danglam zetin anmah ralhrang pawlin an sakhan an rak urkang thluh ih, sakhan ih um ralhrang palik le ralkap pawl khal an rak tlansuak thluh zo. Do rero tul loin ralhrang in anmai sakhan an urkang tikah thu lungawi umza ngaingai a si.

“Hmun tinkim ah nasaten ralhrang ka do ih, ralhrang palik pawlin khuate lamih an sakhan an suahsan hnuah khawpi ih palik sakhan an kom tivek cu thuhla theih ding a um phah ko. Asinan, tuitum cu an sakhan suahsan men loin anmah ralhrang pawlin an urkang thluh. Ralhrang pawl an tlansuah zawngah khuami 20 hrawng an kai ih, ralphaw ah an hmang. Lamzin khalah anmah lawng an feh ngam nawn lo a si,” tin Pauk PDF cun mipi theihternak an nei.

AA Kutah Ralhrang 150 Tlun An Um – Rakhine ralkap AA cun a tufang an kutah ralhrang 150 tlun a um thu September 28 ni ah mipi theihternak an nei ih, ralhrang in anmah ralhrang khummi pawl bomb an thlak ngah thu pawl khal an tarlang.

AA cun “A tufang Rakhine ramkulh le Paletwa myone sungah kannih AA le ralhrang doawknak a sosang tukih, doawknak ah ralhang thi an tam tuk. Ralhrang tampi cu ralhrang ah um paih nawn loin kan hnenah an pe aw rero ih, hmundang khalah ralhrang pe aw an um ringring.

“Kan hnenih pe aw ralhrang le kan kaihmi ralhrang kom cun 150 tlun a si ih, thenkhat kan hnenih an umlai tlunah thenkhat cu hmunhim ih kan kuat zomi khal an um. September 23 zan ah ralhrang ralkap cun Maungtaw myone ih kan umnak hmun cu vanzam in bomb in thlak ciamco. Cumi ruangah AA in mi kan khumnak innpi pahnih cu ralhrang pawlin bomb an thlak ngah ih, ralhrang kan khummi lakin thi le hriamhma ngah an um.

“Ralhrang hriamhma ngah pawl cu kannih AA in theitawkin kan tuamhlawm rero nan, kan sivai neihmi in a tlin lo ruangah thisal khal an um. Thenkhat cu an besiat tuk ruangah an tuannak ralhrang hmun kan theihter ih, ra hruai dingin kan simthei. Asinan, ralhrang pawl cun kan hnenih ralhrang hriamhma ngah pawl an hruai duh lo ih, an ngaihsak lo.

“Ni 5 a luan tikah ralhrang hriamhma ngah lakin pakhat a thi bet zo. Ralhrang in an kuthnuai ih hnatuan pawl cu an damlai, an cakvak lai lawngah an duh ih,hriamhma an ngah hnu cun an hai nawn lo. Hivek cu ralkap pakhat ih daan an nei lo ih, an kuthnuai pawl zianghman ah an siar lo. Curuangah ralhrang hriamhma ngah pawl cu kan neihmi sivai hmangin theitawk kan tuamhlawm rero hrih. Ralhrang pawl ih sinak cu a rapthlak in a mak tuk lawmmam ih an kuthnuai ah hnatuan rero duh hlah uh. Ralhrang sinak suahsan uhla a rangthei bikin mipi lam ttang sawn uh,” tin AA cun thu an suah.

Thailand Ah Myanmar Mi 95 An Kai – Thailand ram hmun 3 ah Myanmar mi 95 kaih an si ih, an zaten thupten Thailand ram sungih lut an si tlunah Malaysia feh lan tum an si tin Thailand palik cun thu an suah.

Myanmar mi 95 pawl cu hmun 3 ah kaih an si. Myanmar mi 39 hmunkhat ah a dang Myanmar mi 43 hmunkhat tin le a dang Myanmar mi 13 tin Thailand palik pawl cun an kai.

Kaihmi pawl thu an suh tikah mi pakhat in puaisa hnenah thai baht thawng 60 an pe tin an rel. Myanmar mi pawl phurtu Thailand mawtaw mawng pahnih khal Thailand palik pawlin an kai tel. Kaihmi mawtaw mawng siseh Myanmar mipawl khal Thailand palik pawl cun thupte ramsung lut thubuai an tuahsak ih,an khum thluh hai tin an thusuah ahcun an tarlang.

Iran Buainak Ah Mi 76 An Thi Thlang – Iran ih mipi buainak a reh thei hrih lo ih, mipi le Iran ralkap buainak ah mipi 76 an thi zo.

September 13 ni ah Iran palik pawl cun fala Amini ( kum 22 ) cu Iran nunau ceiawk dan ding vekin na cei aw lo, kan luarkai tuk tin Iran palik pawlin an kai ih, palik khumnak hmunah fala thi. Cumi ruangah Iran mipi an lungawi thei lo ih, lamzawh duhphorhnak an nei.

Lamzawh duhphorhnak nei Iran mipipawl cu Iran ralkap pawlin cerek ngai in an kap ih, mi 76 an thih phah zo. Mipi thawn buainak ah Iran palik le ralkap lam khalin mi 41 a thi zo tin Iran cozah cun thu an rak suah ve. Tu ahcuh mipi le ralkap lam remawknak zianghman an nei thei hrih lo ih,buainak a um peh ruangah mithi le hriamhma ngah an tam vivo dingah ruah a si.