Ralhrang In ASEAN Zangfah An Dil

Kalay Fang Cinmi Pawl Ah Pangang An Tla – Sagaing ramthen thlanglam Natchuang lamzin tluanih fang cinmi pawl le Letpanchuang lamzin tluan lamih fang cinmi pawlah pangang an tla ih, vai pawl an eng thluh tin mit hmutu pawl cun an sim.

Fang an cinmi pawlah pangang an tla ih, fang an siat phah tikah sumpai nei deuh pawl cun pangang sii an kap ih, pangang sii nei pawl cun tithei ciamco nei loin an zohmen. Kalaymyo lawngah siloin Sagaing ramthen sung hmundang khalah fang cinmi lakah pangang tla an um ve ih, Chin ramkulh le Mizoram ramri pawlih fang cinmi pawl khalah pangang an tla ve tin an sim.

Lo hnatuan cun “kan ram thilri man kaituk ruangah mi tampi cu lo hnatuan thei lo an tam. Thenkhat cu neihsun tein lo hnatuan khal kan si. Dawm man a khung tukih duh vekin dawm khal kan theh thei lo. Tu ah fang kungah pangang an tla ciamco ih, Pangang sii kah ciamco a tul lala. Hivek zin in patha tuk cu kan tam lemlo ding. Ram buai thawn , thlaicinmi le fang cinmi pawl tha lo thawn kan boruak a se tuk a si,” tin a sim.

Ralhrang In ASEAN Zangfah An Dil – Ralhrang ralkap cun Myanmar ih tlawng Cambodia ramdang palai pakhat Dr.Kung Phoak hnenah ASEAN in NUG be lo dingin zangfah an rak dil ih, Cambodia palai khalin ralhrang dilmi pitlinsak dingin a rak tiam tiah anmah ralhrang cun thu an suah.

A tufang ASEAN pawlkompi chairman hi Cambodia an si ih, Chairman sinak in thil tampi an tithei nan, pawlkom sungtel tamsawn duhdan vekin thil a feh ringring. Tu ah Cambodia lam cun ralhrang hnenah thutiam hman sehla ASEAN pawlkom tamsawn in NUG biak le ton an duhsawn cun a tamsawn duhdan in fehpi ding a si.

Ralhrang ramdang vuanci Wana Maung Lwin cun Cambodia ramdang palai hnenah ASEAN hmin in NUG be lo dingah zagnfah a rak dilmi a si ih, Cambodia palai khalin cuvek thleng loin theitawk an zuam ding thu in a tak tiam.

Asinan, ASEAN sungtel lakah ralhrang lawnglawng biak duh nawn lo, NUG khal be thlang dingin duhtu an tam vivo ih, November thla ASEAN meeting ahcun ralhrang lawng siloin NUG khal be thlang dingah Malaysia lam cun thubur an tum. Malaysia cun anmahten NUG palai khal an be rero zo ih, ASEAN hmin in NUG biak a that thu an aupi rero zo.

Hivek a si tikah ralhrang pawl an thin a phang in a langih, Cambodia hnenah ASEAN hmin in NUG be lo dingah zangfah an rak dil phah. Asinan, Cambidia duhdan lawngin ASEAN pawlkompi fehpi a theih lo ih, November thla ih meeting an neih tikah thuthar a suak thei dingah ruah a si.