Kaya miphun humhimtu KNDF cun June thla zarh hnihnak sungih ralhrang thawn an doawknak thuhla cipciar cu mipi theihternak an nei ih,ralhrang biakinn an urkang thu khal an tarlang.
KNDF cun “June thla zarh hnihnak ah kannih Kaya miphun humhimtu KNDF, kan tuanpi KA le PDF pawl cun Kaya ramkulh sungin Loikaw, Demoso le Pruso pawl ah ralhrang ralkap kan do. June 12 ih doawknak ah ralhrang 10 tlun an thi ih, ralthuam hrekkhat kan laksak thei. June 14 doawknak ah ralhrang pawl cun mipi inn 4 an urkang ih,mipi thilri duhtawk in an laksak. Biakinn khal ralthuampi in an kap.
“June 15 doawknak ah ralhrang pawl cu Biakinn sungah umhmun an khuar ih an suah zawngah biakinn le a kiangkap ih inn pawl an urkang. Doawknak ahcun ralhrang 4 an thi. June thla thokin ralhrang pawl thawn kan do aw thok zo ih, June thla zarh hnihnak tiang kan do aw peh. June thla zarh hnihnak ih ralhrang thawn kan doawknak ah ralhrang 22 an thi ih,kannih Kareni ralkap komkhawm lam cu kan him a si,” tin thu an suah.
Ralhrang Bawi Senthum An Kap That – Pago ramthen Kyauk Tada myone Pinwe kung palik sakhan ih ralhrang bawi senthum cu June 15, sun nazi 1 hrawngah Pago PDF pawlin an kap that.
Khuami pakhat cun “Sun nazi 1 hrawngah a si ih, lamzin gate kil ralhrang bawi an kap that. Mipi pawl dik lo zetin tangka a dil tin a thuhla a suak ih, a umnak hmunah vei 5 an kap. A hmun rori ah a thi cih a si,” tin a sim.
Pago PDF cun “Ralhrang bawi Htun Htun Naing cu June 15 ni ah kan ret tha lawlaw. Gate ih a umlai ah kan kap that. Dik lo zetin mipi tangka a dil ih, ralhrang hnuaiah puarthau zetin hna a tuan. Kan retthat hnu cun zamrang ten dung kan sip ih, kannih lam kan him a si,” tin thu an suah.
Rahrang In Phun 10 Aung Cazin An Suah Ding – Ralhrang ralkap cun a liam cia fimzir kum hrang phun 10 camibuai phitu pawl ih result cu June 17 zingah an suah ding thu mipi theihternak an nei.
Ralhrang ralkap cun 2021 kum sungah ramsung tlawngta pawl cu November thla in tlawng an rak kai thokter ih, 2022 March thla ah phun 10 camibuai an tuahter cih. Tlawngta pawl cu a tlangpi thu in thla 9 sung cazirter an sinan, ralhrang pawl cun thla 4 sung lawng ca an zirter ih camibuai an rak tuahter. Cucu, tu ah result an suak thlang ding tin an than.
Ralhrang ralkap cun “June 17, zinglam nazi 6 in phun 10 result a suak ding. Phun 10 camibuai an phitnak tlawngah zoh theih thluh a si dingih Website khalah a zoh theih ding. Internet thatlonak hmun ahcun MRTV hmangin zoh a theih ding. Hmunpi ih zoh ding pawl cu covid 19 daan kan thlun cio pei uh. Thuhla fiang lo cu suh theih ringring a si,” tin thu an suah.
Israel In A Mipi Pawl Turkey Ram Suahsan A Fial – Iran in Turkey ram sungih um Israel miphun pawl kaih vivo a tum timi thuhla a suah tikah Israel cun Turkey ram sungih um a mipi pawl cu zamrang ten Turkey ram suahsan dingin a theihter hai.
Israel cun “Tu hrih ahcun kan miphun pawl cu Turkey ah tlawng lo dingin kan dil duh. Poimawh tuk a um lo a si ahcun Israel mipi hrang Turkey feh ding a him hrih lo. Cun, Turkey ram ih um cia pawl khal zamram ten Israel ram ah tlung lohli uh.
“Cawlh hmangih Turkey ram feh Israel mipawl cu Iran misual pawl in kai dingin an hawl rero. Thlan hleice an nei lo ih, Israel mi pohpoh cu thah lole rukhlo an tum. Cun, Iran kan simtheih duhmi cu Israel mipi tibuaitu le hnaihnoktu pohpoh hrem loin nan luat lo dingih, khawitawk nan um khalle nan luat lo ding a si,” tin Israel ramsung zung cun thu an suah.
Iran cun kan dung May thla ih an ralbawi a thih thu ah Israel an puh ih, phuba kan la rori ding tin thu an suah. Iran in an puhnak thuhla thawn pehpar aw in Israel cun zianghman an rel lo. Iran le Israel cu ui le me vekin hua aw le ral aw an si ih, an zohthup aw ringring.
Turkey ram cu Israel mipi pawl khual tlawnnak hmunpi pakhat a si ih, ram pahnih remawknak an neih ruangah khat le khat tlawng aw thei an si. A hlan ahcun Israel le Turkey khal an rak hua aw dah nan, tu ahcun remawknak felfei an nei zo ih, khat le khat zalen zetin tlawng aw thei an si.
Leave a Reply