Ralhrang In Central Bank Ah Ralbawi 6 An Ret

Mindat Ah Phone Line A Siat – Chin ramkulh Mindat peng sungah phone line pawl a siat ih, phone line siat tinten thupten cangvai theu ralhrang pawl ruangah Mindat mipi cu ralringten um dingin theihter an si.

Makui ramthen Kyauk Htuh in Mindat ih feh ralhrang pawl cu Mindat khawpi an lut zo ih, Mindat khawpi in kiangkap khuate pawl cu ralthuampi in an kap theu. July 21 in Mindat peng sungah phone line pawl a siat ih, ralhrang vanzam zam khal mipi cun an hmu cih.

Mindat CDF cun “Mindat peng sungah phone line pawl a siat ih, ziangtik tiang a siat ding timi cu kan thei ban lo. Curuangah, mipi cu fimkhurten um dingin kan lo theihter duh. Ziangahtile, phone line siat caan ah ralhrang pawl an cangvai theu ih, khuate lam an nuai ciamco pang thei. Curuangah mipi cu fimkhurten um dingin kan lo theihter duh a si,” tin mipi an simthei.

Champhai Ah Rittheihsi Ting 127 Man An Kai – India ram Mizoram State Champhai Khankhawn check Gate ah rittheihsi tamzet kaih a si ih, India tangka in ting 127 man a si.

Tuanvo neitu pawlin Zokhawthar lamih lut mawtaw pawl cu Khankawn ah an rak cekih, mawtaw pakhat sungin Bluetooth Speaker sungah bingrang tampi an hmu. Bingrang an hmuhmi cu a rihzawng 255gram a si ih, India tangka in ting 127 a thleng. Bingrang phurtu le neitu pawl cu an kaih man hlanah an tlan man ih, hawl rero lai an si.

A tufang Chin ramkulh lamin Mizoram Chaiphai lamah rittheihsi a lut nasa ih, lamzin cektu pawlin an kai rero. Champhai ah nasaten rittheih thil siseh Myanmar lamih thilri lut hrimhrim cek thluh a si thlang tikah rittheihsi phur kaihmi an tam sinsin.

Rittheihsi hmangih sumdawng Chinmi pawl cu Chin raltlan pawl zawn ruatin rittheihsi hmangih sum an dawnnak bansan dingin Chin mipi , Chin raltlan le Chin ralkap pawlin theihternak an neih tlunah an sumdawnnak bansan dingin an dil rero nan, tutiang cu rittheihsi hmangih sumdawng kaihmi an um ringring lai.

Ralhrang In Central Bank Ah Ralbawi 6 An Ret – Ralhrang ralkap in rampi thuneihnak an lak hnuah ziangkim thunun thluh an tumnak fehpi vivo in July thla ahcun Central Bank ah ralhrang bawi 6 an ret.

Ralhrang cun ralhrang bawi 6 cu Central Bank ah hnatuan dingin an retmi a si ih, thla khat ah ting 4 le ting 3 karlak an hlawh ding tin mipi an theihter. Hivek a si ruangah Central Bank khal ralhrang hnuaiah a um fel timi a fiang deuhdeuh.

Ralhrang ralkap cun rampi thuneihnak an lak pekah an thulung lo Central bank ih hnatuan hrekkhat an rak kai ih, hremnak an pekmi khal a um. Cuvek hnuah Central bank thunun thluh tumin ralbawi 6 rori Central bank ah sinak sang hnatuan dingin an ret bet.

Central Bank timi cu rampi cozah dinglai pawlin rampi sumpai, thilri man duhduh in a kai lonak dingah kilkhawitu ding bik an si ih, ralhrang pawl cun rampi sumpai le thilri man khal duhduh in cokbuai an tum vivo in a lang.

Tlawnginn Kulh Cimah Mi 5 An Thi – Mon ramkulh Mawlamyine khawpi Shwetaung veng lamzinpi ih Ah-htah-kah 5 tlawnginn kulhnak cu July 22, zinglam ah a cim ih, a kiangih um mi 5 an thi tin buaipitu pawl cun an sim.

Tlawnginn kulhnak kiang tluan ahcun lakphak dawr, kuva dawr le thildang neuhneuh dawr an um ih, tlawnginn kulhnak cim in a peh ngah tikah mithi le hriamhma ngah an um phah. Tlawnginn kulhnak cim cu ruahsur nasat tuk ruangah leinem ih cim in an rel.

Buaipitu pakhat cun “Tlawnginn kulh an tuahnak a rei tuk zo ih, ruahsur caan a rei tikah leinem in a cim. Tlawnginn kulh kiangih dawr tuah lakin tlan man lo an umih, tlawnginn kulh cim cun a nen ngah hai. Cumi mi 5 an thi ih, nunau 3 le mipa 2 an si. A tamsawn cu kum upa an si ih, kum 20 hrawng pakhat a tel. Hriamhma ngah pawl cu a rangthei bikin sizung fehpi an si,” tin a sim.

Ramsung Sii Man A Kai – Ralhrang in rampi thuneihnak an lak hnuah ramsung thilri man phunphun a kai ih, tu ahcun sii man kai ah mipi cu sii lei ding cuh aw tiang an um ih, hrekkhat cu sidawr khar phah khal an um.

Yangon ahcun mi pakhat ih sii theizat bikhiah nei dawr khal an um ih,inn lam hman ding sii phunphun lei dingih tlar aw khal an um. Hivek cu dollar man a kai tuk ruangah tin an sim.

“Sii company tamzet cu july 19 ihsin bang zo khal an um. Ziangruangah ti asile dollar in ramdang ta sii lei an si tikah Myanmar sumpai thawn a kaih nawn lo a sibik. Nitin rori sii man kuan bet ringring a tul. Tlunlam cun hivek men in nan khar thei lo ding in ti nan, nitin sungzin cun kan zuar thei lo rori. Kannih in Myanmar tangka in kan zuaar ih, ramdang ah dollar in kan lei a tul. Cutikah a kaih nawn lo a si,” tin company neitu pakhat cun a sim.

Lakphak Dawr Ah Palik 4 An Kap That – Sagaing ramthen Salinkyi khua ih San nan Let lakphak dawr ah palik 4 pawl tisa in ih an tolai kah that an si.

July 22 zinglam nazi 7 hrawngah lakphak dawr ih to palik pawl cu PDF lamin thupten an pan ih,an kap. A hmunah palik 4 an thi ih,meithal zun 2 an laksak. PDF pawl cun an tlun lamah mitat zung khal an kap cih tin mipi an simthei.

Salinkyi PDF cun “lakphak in palik 4 kan kap that timi cu a dik ko. Cumi hnuah mitat zungih umhmun khuar ralhrang pawl khal kan kap cih. Mitat zung cu feh phah in kap kan si ih, ralhrang thi an um maw timi cu felfai in kan thei lo. Lakphak in palik pawl cu kan kap rori a si,” tin an sim.

Hivek ruangah Salinkyi ahcun ralhrang ralkap le palik pawlin lamzin sukso an cek ciamco ih, lamzin hrekkhat khal an kham. Asinan, PDF pawl cu himdamten sung an sip zo tin an sim.

Ralhrang Le Pyu Saw Htee 9 An Thi – Sagaing myone Cuaipung khua ih ralhrang sakhan cu July 22, zinglam nazi 4 hrawngah PDF komkhawm pahnih in an kap ih, ralhrang le Pyu Saw Htee 9 an thi tin mipi an theihter.

ZERO ralkap cun “Nazi 2 sung kap aw kan si ih, kan lamin RPG kapthiam miraltha Aung Ko Zin kan can ve. Kan lakin hriamhma ngah hrekkhat an um nan, an bese lo. Sakhan ahcun ralhrang ralkap mipum 20 hrawng le Pyu Saw Htee 30 hrawng an umtlang. Cuanpung khua cu Pyu Saw Htee umnak tin an larih, kan doawknak laiah mi 9 an thi timi cu felfai zetin kan hmu.

“Kan doawknak rero laiah ralhrang dang pawl an ra timi kan thei ih, dung kan sip. Doawknak ah kan miraltha pakhat kan can cu tuarhar kan ti ih, kan ui tuk lawlaw. Ziangahtile kan rinsanmi le RPG kapthiam kan neihmi lakin thiam hleice pakhat a si. kan miraltha hrang khal phuba kan la rori ding a si,” tin mipi an simthei.

India in President Thar An Nei – India ram president tuan rero lai ih caan a cem ding ruangah India cun presideng hrilnak an nei ih, Pi Murmu cu India ram president thar dingah hriltlin fel a si.

President Kovind cu July 24 ah a caan cem ding a si ih, president thar Pi Murmu in July 25 ah president thar sinak hrang thutiam a nei ve ding. Murmu cu India ram president 15-nak a si dingih, India thuanthu ah nunau president pahnihnak a si.

A pasal bank hnatuan in 2014 kum ah a rak thihsan zo ih, a pa pahnih khal an thi zo. Tu ah fanu pakhat a nei lai. Myanmar mipi tamzet cun india president thar ruangah India in ralhrang an tuanpinak ah danglamnak a um pei maw tin ruahsannak an rak nei ve. Cucu , caan in lai a rel vivo dingin a lang.

China In Nancy Pelosi An Hro – US House Speaker Nancy Pelosi cun 2022, August thla ah Taiwan ram tlawn a tumih , China lamin an rak thei tikah thinheng sosang in US an hro cih.

House Speaker Nancy cun April thla ah Taiwan a rak tlawng tum zo nan, Covid 19 natnak ruangah a tlawng thei lo. Tu ah nancy cun Taiwan tlawnsal a tumih, China lam thinheng sosang in an um.

China cun Taiwan cu kan ram, kan kuthnuai ih um an si an ti ih, Taiwan cun mahte ram nei, mahte thu ih um kan si an ti ve. Hivek ruagnah China le Taiwan karlak boruak a se zetih caan reipi sung khat le khat an hro aw zo.

China in Taiwan a hro tikah US cu Taiwn lamtang in an um ih, Taiwan hnenah ralhtuam phunphun an pe, an zawrh, an leiter rero. Cumen siloin US cun Taiwan ah US ralkap tiang an ret zo ih, Taiwan ralkap pawl raldo an zirh rero.

Hivek cingin China cun a takin US an thungrul ngam hrih lo nan, Taiwan ah Nancy pelosi a feh ahcun kan ummen lo ding tin thu an suah. Tutiang ahcun Nancy in Taiwan a tlawn ding thu a thulh hrih lo ih, a thulh leh pei maw ti cu theih a silo.