Ralhrang In Daw Suh Hremnak An Pe Bet

Ralhrang In Daw Suh Hremnak An Pe Bet – Ralhrang ralkap cun Daw Aung San Suh Kyi cu milian hnenin dollar a la thup tin eiruk thubuai pahnih an tuahsak ih, cumi eiruk thubuai pahnih hmangin October 12 zingah ralhrang cun kum 3 sung thawngtla dingin Daw Suh Kyi an hrem bet.

Milian Mg Wit cun Daw Khin Kyi Foundation hrangah tin 2019 kum 2020 kum ah dollar ting 5 le thawng 50 a rak pe ih, cucu bomnak hrangih a pekmi a sinan, ralhrang cun bomnak tangka a silo ih, politics hrangih hman dingah Daw Suh Kyi in thupten tangka a eirukmi a si tin thubuai an tuahsak. Daw Suh cun Court ah eirukmi a silo tin a el rero nan, Court cun eiruk a siko tin Daw Suh Kyi hremnak an pe.

Milian Mg Wit khalin Dollar ting 5 le thawng 50 cu Daw Khin Kyi Foundation hrang a pekmi a si thu Court ah a sim ve nan, ralhrang lam cun an zum duh lo ih,bomnak timi hmang tangkai in eiruknak le thupte remawknak sumpai men a si tin an rak el.

Hitin ralhrang ralkap cun thubuai 14 hrang Daw Aung San Suh Kyi cu kum 26 sung thawngtla dingin hremnak an pe zo ih, thubuai dang 5 cu Court ah rel rero lai an si hrih.

Ralhrang thuphuangtu Zaw Min Tun cun “Daan tlunah zohman an um lo ih, Daw Aung San Suh Kyi khal daan tlunah a um ve zo. Curuangah Court in hremnak a pekmi pawl cu daan vekin a tuar thluh a tul ve a si,” tin a sim.

Tu ah kum 78 kim zo Daw Aung San Suh Kyi cu thubuai dang 5 khalah ralhrang pawlin hremnak pek thluh an tum ih, a thawngtlak ding kum a tam vivo bet dingin a lang.

Falam Ah Palik Pakhat An Kap That – Chin ramkulh Falam khawpi sipin kiangkap ah mipi cun October 11 zan ah meithal puak awn an thei ih, October 12 zing ahcun palik pakhat kah that an rak si.

Falam ih um pakhat cun “Zan nazi 10 hrawng a si ih, cuvek ahcun mipi cu lengah kan um nawn lo. Meithal puak awn vei 7 hrawng kan thei ih, a hnuah palik pakhat an kap that tin thuhla kan thei. Zoin palik an kap that ti cu felfai in kan thei lo ih, palik thi cu Dal Kat Khai tiah an sim.

“Falam ahcun zan sim hnu lengsuak lo dingin anmah ralhrang pawlin thu an suah ih, mipi cu zan sim hnuah leng kan suak lo. Tuitum palik cu zan sim hnuah inn tin a si ih, sipin zung kiangah an rak kap that. Anmah ralhrang lamin an kap that khal a si thei ih,ralthuamkai ih cangvaihnak khal a si thei. Zoin palik a kap that timi cu kannih mipi lamin kan fiang hrih lo a si,” tin a sim.

Tio Ah Ruang Pakhat An Sar – Chin ramkulh Falam peng Rikhawdar vengthan Tio in Haimual fehnak lamzin ruang pakhat sar a si ih, thahmi a si ding ruang buaipitu pawl cun an sim.

Ruang buaipitu pakhat cun “October 11 ah ruang kan sar ih, a hmin le sinak khal kan thei zo. Ruang kan sarmi cu Aung Hty Min a si ih, Tio ih um a si. Tio le Haimual karlak thlacamnak tlang lamah a ruang ka sar.

“A takih hriamhma umdan pawl kan zoh tikah an that in a lang. Zo pawlin an that ti cu kan thei lo. Aung Hty Min cun a nupi le a fanu kum 4 mi a fehsan a si,” tin a sim.

Tedim Ih Zung Kang Nupinu Pakhat Thi – Chin ramkulh Tedim khawp ih lah-wah-kah zung le cozah dung kangah ralhrang pawlin duhduh in ralthuampi an kap ciamco ih, nupinu pakhat a thih phah.

October 11, zan nazi 9 hrawngah Chin ramkulh Tedim khawpi ih Lah-wah-kah zung le cozah zung a kangih, ralhrang pawl cun duhduh in ralthuampi an kap ciamco. Ralhrang pawlih kahsuakmi ralthuampi cun inn pakhat a tlak ngah ih a sungih um fate 4 ih nu pakhat a thi.

Tedim ih um pakhat cun “Ralhtuamkai pawlin zung hngaktu hnenah tawh an dilih, zung an urkang. Zung kiltu cu ziangtin hman an tilo. Kawl tong an nal tukih,ralhthuamkai pawlkom pakhat an sinan, ziang pawlkom an si ti cu kan thei lo. Zung pahnih a kang veten ralhrang pawl cun duhduh in kiangkap an kap ciamco ih, fate 4 ih nu pakhat a thih phah,” tin a sim.

Tedim peng sungih cangvai PDF zoland cun Tedim khawpi sungih cozah zung kang cu anmai urkang a silo thu mipi theihternak an nei ih, zoin a urkang timi khal an zingzoi hngal thu an tarlang.

CDF Mara Le Mara Army An Kap Aw Peh Ding – CDF Mara le Mara Army buainak cun remawknak lam an pan thei hrih lo ih, kap aw vivo dingin kaphnih pawlkom cun thu an suah veve.

Chin ramkulh sungah Mara hmunmram nei dingin dinmi Mara Army le ralhrang do dingin dinmi CDF Mara hi 2022, March thla ah veikhatnak, 2022 October 3 veihnihnak tin le October 9 ah veithumnak tin an do aw zo ih, doawknak thuhla an suah vevemi netabik ahcun hmailam ah nasa sinsin in doawk an tum hrih.

Mara Army cun “October 9 ih buainak thuhla thawn pehparaw in relfiangawk kan duh ve. CDF Mara tiaw pawl cun Mara hmunram sungih Mara mipi pawl duhtawkin an kai ih, an hrem, sumpai an kuanter ih, sumpai an dil ringring. Cumi ruangah khua mipi pawl cun Mara Army hnenah CDF Mara pawl hremnak pe dingin in dil.

“Khua mipi lakin CDF Mara cangvaihnak duh lo ruangah kan hnenih raldo ra zir an um ih, Cucu, CDF Mara lamin an theih tikah an thinheng ih an tlunnak lamzin in an rak bawh. Curuangah mino pawl cu anmahten khua ah an tlung ngam lo ih, Mara Army thenkhat in kan thlah. Cucu, CDF Mara lamin kan sakhan in la tum tin an tuanpi CDF dang an sawm ih, in rak kap.

“Khua sung ahcun CDF Mara le an tuanpi pawlin Mara Army le raldo zir mino pawl in kap ciamco. Kannih Mara Army lam cun mipi an tuar tuk ding kan phan ruangah dung kan sip. Meithal khal kan kap puak tam man lo. Kanmah Mara veve kan doawk ruangah Ngaiphaipi khuami pawl cu an khuapum in Mizoram lamah an tlan. Tuitum kan doawknak cu anmah CDF Mara lamih hramthok a si ih, tuanvo la ngam haiseh. Mara ramsung ih CDF Mara pawl buainak an tuah ringring ruangah Mara hmunram sungih mino 300 lenglo cu ralthuam an kai ih, CDF Mara do bet vivo dingin timtuahnak nasaten kan nei a si,” tin Mara army cun thu an suah.

CDF Mara cun “Kannih CDF Mara cu ralhrang do dingin dinsuahmi pawlkom kan si ih, CNA, CJDC le ZZMLS pawl cu kan tuanpi pawl an si. 2022 , October 6, zan nazi 8:30 hrawngah Mara Army tiaw pawl cun CDF Mara umnak hmun an tibuai. Mara Army le raldo zir mino an timi pawl an zaten mipum 50 hrawng an si ding, Ngaiphaipi khua an ra thlengih Gate onsak dingin in dil.

“Kannih CDF Mara tlunlam hotu cun Gate kil pawl kan biak thei lo ruangah khua sung ahcun lut hrih lo dingin Mara army le an tuanpi pawl kan sim. Siannak um loin khua sungah an lut asile buainak a suak pang thei ih, zinglam khuavan hnu lawngah khua sung lut dingin kan theihter.

“Asinan, Mara army le an tuanpi pawl cu October 7,zinglam nazi 3 hrawngah thupten lamzin dangin khua sungah an lut thotho ih, tlawnginn le harhdamnak zungah umhmun an khuar. Khua sungih an um hnuah Mara Army le an tuanpi pawl cun CDF Mara pawl an kap ih, kannih khal mah le mah humhimawknak hrang kan rak kap ve.

“Nazi 2 sung kan doawk hnuah ralhrang tuanpi Mara Army pawl cu dung an sip ih, an umhmun khuarnak kan thianfai tikah CDF Mara umnak pawl lak vivo an tum thu an ngannak cabu, meithal zunkhat, Laptop pakhat, Bike 4 , bomb 7, cerek le hridai pawl kan sar. Midang CDF pawl cu CDJC ih thu umdan vekin MDF pawl dung an sip theinak dingah lamzin rak zialtu men an si.

“Mara Army lamih thusuahmi hrimhrim cu mipi zokhal ih zum tlak a silo ih, zum duh hlah uh. Annih Mara Army MDF pawl cu ralhrang an do lo ih, mipi ralkap pawl sawn an tibuai. Curuangah, CDF Mara tibuaitu cu ziang pawlkom an sikhalle kannih CDF Mara cun kan do vivo ding a si,” tin thu an suah.

Pawlkom pahnih ih thubuaimi zoh tikah a cemnetnak ah kan do vivo ding timi an telh veve ih, remawknak hnakin ralthuam hmangin an hringhro aw vivo hrih ih, an do aw vivo hrih dingin a lang.

UBP Party An Balsal – 2019 kum ih an rak dinmi UBP party cu party pakhat vekin an feh nawn lo ding thu mipi theihternak an nei. UBP party hi ralkap hlun le hlutdaw chairman hlun Tura shwe Mann ih rak dinmi a si ih, 2020 rampi hrilawknak ah an rak tel ve. Asinan, hmunkhat hmanah nehnak an co lo.

Tura Shwe Mann hi Than Shwe san ah ralbawi pathumnak a rak si ih, 2013 kum ahcun ralkap in a cawlh hnuah USDP party ah hotu sang a rak si. Thein Sein cozah san ahcun Hlutdaw Chairman a rak tuan. Rampi president beisei in Party rak din a si ve ih, ralhrang in rampi thuneihnak an lak hnuah an pary bal a si thu mipi an theihter.

UDP Party Chairman Tura Shwe Man Cun “UDP party kan din thok ihsin tuini kalsal ni tiang sumpai le thazang ih in bawmtu nan zate parah lungawi thu ka lo sim. Party sungih hruaitu pawl kan kum a upa vivo ih, kan harhdamnak ngai poimawh a tul tlunah Party lamih pum kan pekawk thei nawn lo ruangah UDF Party bal fel dingin kan lungkim khawm.

“Curuangah October 11,2022 ihsin UDP party bal a si ih, tlunlam khalin in cohlan sak dingah ca kan thehlut zo. UDP rak dinpitu nan zate parah kan lungawi ngaingai a si,” tin thu a suah.

Canada Ralkap 40 In Ukraine An Pan Ding – Russia le Ukraine buainak ah Poland ih Ukraine ralkap pawl raldo zirh dingin Canada cun cun raldo thiam mipum 40 an thlah ding thu an than.

Canada cun 2015 kum ihsin Ukraine ralkap pawl raldo an rak zirh ringring ih,2022 kum thokah a rak bansan. Asinan, tu ahcun Cnada in Ukraine ralkap pawl raldo an zirhsal ding thu an suah. Canada ralkap 40 pawl cu bomb puah, lei laih, bomb kammi phelh, tlunsang kap thiam hleice pawl an si.

Ukraine le Russia buainak ah remawknak zianghman an nei thei hrihlo ih, an boruak a sosang deuhdeuh sawn. Russia in Ukraine nisuahnak lam Donbas ramthen sung lawng lakfel an tummi cu Russia ram sungih Crimea lilawn a puak ruangah Russia cun Ukraine an puh ih, Ocotber 10 ihsin Russia cun Ukraine khawpi Kyiv lam khal an kap ciamco sal. Hivek ruangah Ukraine cun ramdang hnenah ralkap in siseh, ralthuam le sumpai khalin anmah bawm dingin an dil.

Tu ah Canada raldo thiam 40 cun Ukraine ralkap pawl zirhnak an pe dingih US khalin Ukraine an bom bet vivo ding thu an rak suah ve. Curuangah ram pahnih doawknak a tawp hrih lo dingin a lang.