Ralhrang In Daw Suh Hremnak An Pe Bet

Kalay Khalah Datsi An Harsa Thok – Sagaing ramthen Kalaymyo khalah datsi dawr hrekkhat khar an um zo ih, datsi man nitin in a kai tin’ mipi cun an sim.

Kalay ih um pakhat cun ‘Dawr picang pawl cu datsi zuar ding kan nei nawn lo tin’ dawr an khar men. Curuangah lamzin sir dawrah datsi lei kan cuh aw. Tuih dinhmun ah galan khat thawng 18 le thawng 20 in zuar an um. Cukhat galan khat hnakih tam lei an siang lo. A hlanah liter 1 thawngkhat ih kan lei theumi kha tu ah thawng 5 a thleng zo,” tin a sim.

Kalaymyo sungah August 12 ahcun datsi galan khatah thawng 12 a si hrih ih, zanlam ah thawng 14 a kai cih. August 15 ahcun datsi galan khat thawng 18 le thawng 20 karlak a thleng. Hivek ruangah mi tampi bike mawng thei nawn lo an tam. Thenkhat cun Myanmar khal Sri Lanka ram vek kan si pang tin an thinphang tuk zo. Ziangahtile , Sri Lanka ram khal an ramsung ah ramdang thil a thleng thei nawn lo ih, datsi hman ding nei lo ruangah rampi in an rak buainak a rei tuk zo ih, an ram a tlase thluh.

Ralhrang In Daw Suh Hremnak An Pe Bet – Ralhrang in Daw Suh thubuai an tuahsakmi lakah Daw Khin Kyi Foundation thawn pehpar aw in eiruk thubuai an tuahsakmi cu August 15 ah relfel a si ih,ralhrang cun kum 6 sung thawngtla dingin Daw Suh Kyi hremnak an pe bet.

A hlanah ralhrang ralkap cun thubuai 6 hrang Daw Suh Kyi cu kum 11 sung thawngtla dingin hremnak an rak pe zo ih, tuitum ah thubuai 4 hrang kum 6 sung thawngtla dingin hremnak an pek bet tikah ralhrang in Daw Suh Kyi hremnak an pekmi zaten kum 17 a kim zo.

Daw Suh Kyi cun rampi thuron a silai ah Daw Khin Kyi Foundation hmin in Naypidaw ah hmuan tumpi a rak lei ih, cumi ah eiruknak a um tin ralhrang lamin thubuai an tuahsak. Ralhrang ralkap in Daw Suh Kyi parih hrilawknak thubuai an tuahsakmi khal August 26 ah thuthennak neih peh a si ding thu ralhrang Court lamin an sim.

Kum 77 kim zo Daw Aung San Suh Kyi cu ralhrang ralkap in rampi thuneihnak an lak hnuah thubuai 19 an tuahsak ih, thubuai 10 hrang kum 17 sung thawngtla dingin hremnak an pe zo. Tu ah thubuai 9 cu Court ah rel peh rero lai an si.