Ralhrang ralkap cun thubuai 19 an tuahsak zomi Daw Aung San Suh Kyi cu thubuai dang tuahsak dingin a sualnak an hawl peh rero sal ih, an zingzoi rero hrih tin Zaw Min Tun cun media pawl a simthei.
Ralhrang in rampi thuneihnak an lak hnuah Daw Suh Kyi cu an rak kai cih ih, thubuai phunphun 19 an tuah sak zo. Cumi sungin thubuai 6 hrang ralhrang cun Daw Suh cu kum 11 sung thawngtla dingin hremnak an pe zo ih, thubuai 13 cu rel rero lai an si.
Tui dinhmun ah ralhrang cun Daw Suh cu eiruk thubuai dang tuahsak bet an tum. Ralhrang in Daw Suh puhnak hrang thubuai dang an buaipimi cu, MIA vanzam License thawn pehpar aw in a si. Cumi ahcun Daw Suh in MIA vanzam license a sangih, Thailand ah a rualpi damlo thuhla a rak sut. Thailand a fehnak tangka cu amai ta maw, rampi tangka thupten a hmang timi cu ralhrang ih buaipi tharmi a si.
Chin Raltlan Nauhak 2 An Thi – Mizoram, Lungbyn khua, Lungbou raltlan camp ih um nauhak pahnih cu June 16, 2022 ah tili ah an tla ih an nunnak a cem tin buaipitu pawl cun an sim. Chin raltlan nauhak pahnih cu Chin ramkulh Matupi peng, Rezua khua in mizoram ih tlan an si.
Tili ih tla that Chin raltlan nauhak pahnih cu nunau kum 13 mi Noe Shwe Hla May le mipa nauhak kum 6 mi Paw San Lay Oo an si. An pahnih ruak khal an hmu zo.
Myanmar ramsung buainak ruangah khua mipi pawl cu sahimnak hawl in hmun dangdang ah an tlan ih cutawk ah harsatnak phunphun an tong. An tlannak hmun ah thihlohnak tong khal an tam. Hramlak ih um pawl khal damlonak phunphun in an buai ih ei le in khalah harsa mangbang in an um.
PDF 40 An Pe Aw Titu Ralhrang – Ralhrang ralkap cun June 16 ah thuthang cinfelnak an neisal ih, cumi ahcun ralhrang thuphuangtu Zaw Min Tun cun Media hnenah thusimnak a nei.
Zaw Min Tun cun “Kanmai hramthokmi siloin nulepa le tlangpar ralthuamkai pawl ih dilnak ruangah PDF pawl hrang sangka ongaw fang kan si. Nulepa hrekkhat in an fale PDF ih lut pawl ko kirsal dingin in simthei ih, tlangpar ralthuamkai hrekkhat khalin an lakih um pDF pawl cu an hnok sak tuk ih, ko kirsal dingin in dil ve.
“Curuangah, PDF pawl cu ralthuam thlah in kan hnenah pe aw dingih kan sawmnak a si. Ralthuam thlah in kan hnenah hahdam ten an pe aw asile ngaidam an si dingih, an sungte pawl thawn hahdam ten an um thei ding. Pe aw loin hramlak ah an um peh hrih asile an hrang lamzin a thim sinsin ding.
“Tutiang ahcun kan hnenih pe aw, PDF 40 an um zo ih, cupawl cu an nulepai’ hnenah kan ap thluh. Anmah cohlannak puai kan tuah ih, an nulepa khal kan sawm. Buainak tuah nawn lo dingin thu an tiamih, cumi hnu ahcun an nulepa hnenah kan ap a si,” tin a sim.
Ralhrang ralkap cun ramsung hmun tinkim in an hnenih pe aw PDF an um tin thu an suah ringring ih, pDF pawl an lomluh lai le puai an neih lai tivek an thlah ringring.
Hivek thu ah Kalay PDF tuanvo neitu pakhat cun “Kalay khalah PDF 5 an pe aw tin ralhrang lam cun thu an suah ih, lomluhnak khal an nei. Asinan, ralhrang in kan lawmlut an timi PDF 5 pawl cu kannih Kalay PDF tatyin hotu pawl kan sut aw vivo ih, zohman in kan thei lo.
“kan theihmi pakhat hman an um lo ih, PDF khal an lut lo hrimhrim. Curuangah ralhrang in anmah dinpitu lakin lemcangtu ding an hawl ih, PDF lomluhnak caan an hmang hrim men a si ding. Kannih Kalaymyo ih an lomluhmi PDF pawl cu PDF taktak pawlin kan thei lo lawlaw. Kan hnenih um le tuan an silo,a lem hlir an si,” tin a sim.
Hmundang ih PDF pawl khalin ralhrang pawl lomluh theumi PDF pawl cu PDF taktak an silo thu,ralhrang in an lamtang pawl lakin pDF lem an cangter ih, pe aw vekin an tuah menmi a si thu an sim ve.
Innkang Ah Mi Pakhat Thi – Mandalay ramthen Maha AUng Myay lamzin ih inn pakhat cu May 16 zingah a kangih, inn sungih um pitar pakhat a thi.
Mandalay Mitat cun “Innkang thuhla kan theih veten zamrang zetin kan pan ih, kiangkap mipi thawn tangtlang in theitawk kan mit cih. Innkang ahcun mi pakhat a thi ih, innteknu Daw Win Myiang a si. A fapa khal a hmai le taksa hrekkhat an kang.
“Inn dot 2 sang kang a si ih, ziangruangah inn a kang tin zingzoinak kan neih fel tikah an inn hnuaita sawn ih meisa vihnak sa tuk ruangah kang a rak si. Meisa hri vihnak a sa tukih a puak. Cumi puak ruangah inn a kangkai vivo ih, inntek nu a thih phah. Innkang cu zamrang zetin kan mit thei nan, inn sungih bike pakhat khal a rak kangsiat man a si,” tin a sim.
Than Shwe Kiltu Inn A Puak – Thuneihnak atcilhtu Ralhrang hotu hlun Than Shwe kiltu pakhat U Soe Shing ih inn cu June 16 sun ah bomb in an deng puak tin kiangkap ih um pawl cun an sim.
Yangon ramthen, North Okkalapa myone Mayda’wi lamzin ih um ralhrang hlun Than Shwe kiltu pakhat U Soe Shing inn cu May 16, sun nazi 12 hrawngah kutden bomb in an deng puak.
“Bomb in Than Shwe kiltu ih inn an deng timi cu thudik a si ko. Bomb puak a ring tuk ih vengsungmi pawl cun kan thei ban thluh. Bomb puak ruangah thi an um le um lo cu kan thei lo. Ziang pawlkom in bomb an puah tikhal kan thei lo a si,” tin media a simthei.
Ralhrang in rampi thuneihnak an lak hnuah ralhrang bawi hlun Than Shwe ih inn hmuansung khalah bomb 2 an rak denglut zo. Than Shwe cu Min Aung Hlaing hlanah thuneihnak atciltu ralhrang bawi a si ih, amah siseh amah kiltu mipi huatmi an si.
UK In Ralhrang Bawmtu Company 6 An Hrem – UK cun ralhrang pawl ralthuam hmangin bawm ringringtu Russia company 3 le Myanmar company 3 pawl hremnak a tisuak ih, an sumpai tuahnak a kharsak.
UK in hremnak a pekmi company 6 pawl cu Synpex Shwe, Myanmar New Era Trading, Sky Aviator, Russia Ural Avia, Sins Avia Trading House le JSC Gorizont pawl an si.
UK in hremnak a pekmi pawl cu vanzam le Heilocpter thilri zuartu le tuahtu company pawl an si ih, ralhrang in rampi thuneihnak an lak hnu khalah ralhrang tuanpitu pawl an si.
Myanmar New Era Trading cu Russia tuah Mi-17 Helicopter thilri zuartu a si ih, Sky Aviator cu Russia le Ukraine ralthuam puaisa tuahtu an si. Synpes Shwe Company cu ralhrang in rampi thuneihnak an lak hnuah Russia Sins Avia thawn tuantlang in Myanmar ah Helicopter thilri phurtu an si.
UK in hremnak a pekmi Company pawl cu UK siseh UK thawn rualremnak nei ramdanh pawl ah an company thilri an zuar thei lo ding. Uk le ramdang ih an neihsiah sumpai le thilri khal anmai thuthu in an hmang thei nawn lo ding.
Leave a Reply