Shan le Kaya ramri Phekung myone Lwepaw khua luhnak ah ralhrang pawl cun duty vek milem an tuah ih, mipi ralkap pawl bum an tum. Asinan, hmunram thianfainak neitu mipi ralkap pawl cun ralhrang lem tuahmi an thei cih hngal.
Lwepaw khua ahcun ralhrang pawl reizet umhmun an rak khuar ih, mipi thilri duhtawk in an fir, an ei sak rero. Khua mipi pawl cu ralhrang tih ah an tlan thluh. Phekung myone sung ahcun July 12 in mipi ralkap le ralhrang pawl an rak do aw zo ih, July 13 ni ih an doawknak ah ralhrang 5 an thi tin Phekung PDF cun thu an rak suah zo.
Doawknak ahcun ralhrang ralkap pahnih le ralhrang lamtang pituhsit pathum pawl cu mipi ralkap lamin nungdam in an kai ngah ih, sakhan cuhawk ih doawknak ah ralhrang 15 an thi tin mipi ralkap lam cun mipi simtheihnak an nei.
Daw Suh In Court Ah Thu A Rel – Ralhrang ralkap in 2020 rampi hrilawknak thuthawn pehpar aw in thubuai an tuahsakmi Daw Aung San Suh Kyi cu July 15 ah Court ah thusuh a si ih, Daw Suh cun 2020 rampi hrilawknak ah diklonak zianghman a um lo tin thuthentu a simthei.
Ralhrang ralkap cun 2020 rampi hrilawknak ah diklonak a um tin ralthuam rinsannak thawn rampi thuneihnak an rak la ih, Daw Aung San Suh Kyi, U Win Myint le 2020 rampi hrilawknak tuanvo neitu pawl cu dik lo zetin hrilawknak tuahtu tin thubuai an rak tuahsak.
Daw Suh Kyi cun “Rampi hrilawknak cu UEC hlunin felfai zetin an kaihruai ih,kannih cozah khalin theitawk in kan rak bawm ve. Ramthen le ramkulh tinah tuanvo pek thluh an si ih, ramthen le ramkulh tinih tuanvo neitu pawl cun daan vek rori’n hrilawknak an tuah. Curuangah UEC an dik lo, NLD in vote an ru tivek cu thuphan puhawknak men a si ih, diklonak zianghman a um lo a si,” tin a sim.
2020 rampi hrilawknak thubuai thawn pehpar aw in ralhrang cun U Win Myint sawn thu an rak sut zo ih, U Win Myint khalin 2020 rampi hrilawknak ah diklonak zianghman a um lo tin Court a rak simthei ve zo.
Daw Aung San Suh Kyi cu Naypidaw thawnginn sungah a umlai ih, a harhdamnak a that tlunah a tulsammi hrekhat khal kan kuat thei tin amah buaipitu sihni pawl cun an sim. Ralhrang ralkap cun Daw Suh Kyi cu thubuai 6 hrang kum 11 sung thawngtla dingin hremnak an pe zo ih, thubuai 13 cu Court ah rel peh rero lai a si.
Ralkap Thuneinak Hnuaiah Sri Lanka – Sri Lanka president in a tlan suah hnuah President cun an ram thuneihnak cu ralkap kutah a ap ih, Prime Minister cu president tuanvo rak kaisung dingin a theihter.
Hivek ruangah Sri Lanka mipi cu an thinheng deuhdeuh ih, lamzawh duhphorhnak an bansan duh lo. Asinan, ralkap kutih rampi thuneihnak hlan hrih a si ruangah duhphorhnak neitu pawl cu ralkap le palik in an kham thlangih, mipi le ralkap buainak ah mi 80 tlunin hriamhma an ngah ih, mi pakat a thi zo.
Ramdang ih tlansuak president cun July 13 ah ka bangfel ding tin hlutdaw hotu a simthei nan, tuini tiang bannak ca a thehlut duhsal lo. Ramsung buainak ah hlutdaw cun July 20 ah president thar hrilsuah an tum ve.
Sri Lanka ram tlaksiatnak ah mipi cun president le Prime minsiter an puh ih, president bik a tlansuak zo nan, Prime minister cun president sinak a kai hrih lamlam sawn ih, mipi thinheng a sosang deuhdeuh. President bik khal a tlansuak zo nan, bannak ca a thehlut hrih lo ruangah hlutdaw lam khal an buaizet.
Mipi in duhphorhnak an nei peh ih, hlutdaw cun July 20 ah president thar hril an tum. Ziang an bang vivo ding timi cu leitlun ih thlirmi an si ve.
Leave a Reply