Ralhrang ralkap cun covid 19 natnak le ram buainak ruangih kum 2 lenglo kharmi E-visa cu ramdangmi pawl pek thok an tum thlangih, Myanmar ah khualtlawn a theih zo tin thu an suah.
Ralhrang ralkap cun “Kiangkap ram siseh innhnen ram siseh, leitlun ram tamzet thawn tuantlang sal dingin may 15 ah online in E-visa kan zuar thok thlang ding. Myanmar ram ih tlawng duhtu cun covid 19 nat a nei lo timi ca a keng dingih, Myanmar an luh zawng khalah zohfel ding an si” tin thu an suah.
Covid 19 natnak ruangah 2020, March thla in Myanmar cun ramleng khualtlawng hrang visa an rak khar ih, tu ah ralhrang ralkap in online in Myanmar ih tlawng duh pawl visa an pe tum thlang.
Ralhrang ralkap cun Sumdawnnak visa cu April 1 in an rak pe thok zo ih, ramleng vanzam pawl khal April 17 in an rak ong zo.
Ramleng visa buaipitu pakhat cun “Tui dinhmun kan ram buainak ruangah ralhrang in E-visa pek an tiam zo nan, ramdang pawl kan ram ah an lut ngam cuang lo ding. A lut an um khalle an tam lo ding. Ralhrang cun sumpai an ngah thei dan ding lamzin phunphun an dap rero ve cu a si,” tin a sim.
Leave a Reply