Sagaing ramthen Kalaymyo thlanglam Nua-tuang chiyin kiangkap ih raltlan pawl cu may 14,zinglam nazi 9:30 hrawngin ralhrang ralkap pawl cun raldonak Helicopter le vanzam in bomb an thlak ih, an kap ciamco tin a hmunih um pawl cun an sim.
Raltlan pakhat cun “Helicopter 2 ,vanzam tlunah drone khal an hmangih ralhrang pawl cun raltlan pawl kan umnak hmun cu May 14, zinglam nazi 9:30 hrawngah tlunsang’n in kap ih, bomb in thlak. Kannih raltlan pawl cu vanzam le helicopter on kan theih veten hmunhim lam panin kan relh bet.
“Raltlan cu kanmah khua pakhat lawng siloin kan khua kiangkap khua 5 lai kan si. Ralhrang pawl cun raltlan umnak ah PDF pawl an um tin an kap siko. Heliocpter le Vanzam cu minute 30 sung hrawng tlunsang ah an zamkual ih ,hnuailam zohfelnak an nei.
“An tumbikmi cu PDF pawl umnak an zingzoi a siko ding. Mani khalah Helicopter pakhat kan umnak kiangkap in ra hel zo. Tuini ahcun tamsawn in an ra ih, bomb in thlak tlunah in kap phah. Tuhrih ahcun thinphang in hmunhim dangih relh bet kan si tikah thi le hriam ngahzat tivek felfai in kan thei hrih lo a si,” tin a sim.
Kalaymyo thlanglam Myintar tiva tluanah ralhrang ralkap le mipi ralkap komkhawm pawl cu April thlacem in May thlasung tiang an do aw ih, doawknak ah khatlam khatlam in thi an um. Doawknak ah Ralhrang lam thi an tam tinten ralhrang pawl cu mipi tuar ding zawngin an cangvai ringring thlangih, raltlan umnak tiang bomb an thlak phah thlang.
Leave a Reply