Ralhrang In Kalay Ah Inn 200 Tlun An Urkang

Ralhrang ralkap cun Sagaing ramthen Kalaymyo thlanglam in ni 2 sungah inn 200 tlun an urkang sak ih, mipi tamzet cu umnak ding nei loin an vakvai.

Ralhrang in Inn an urkang sakmi pawl cu kalaymyo thlanglam khua 3 in a si ih, Siattaw khua , Kukkul khua le Lechia khua pawl an si. May 18 lawngah ralhrang ralkap cun innkhi 200 umnak Siattaw khua in inn 100 kiangkap an urkang sak ih, may 19 ah innkhi 200 hrawng umnak Kukkul khua in inn 100 an urkang sak bet. Ralhrang in lechia khua khalin inn an urkang nan, a zat an fiah thei hrih lo.

Doawknak um lo thla khalin ralhrang in mipi inn an urkang tikah khua ih phungki pawl cun ralhrang pawl cu inn urkang nawn lo dingin an dil nan, inn urkangtu ralhrang pawl cun kan thu asilo, tlunlam thehlut uh tin an rak let men.

Raltlan pakhat cun “Kannih kalaymyo thlanglam ih um pawl cu kan tuarzet. Tui thla sung lawngah ralhrang in khua 7 in inn 1500 tluk an urkang zo ih, raltlan mipum thawng 50 zik kan um ding. A remremnak hmunah tlan kan si ih, a harsa ngaingai a si,” tin a sim.

Ralhrang ralkap in rampi thuneihnak an lak hnuah kalaymyo sungin Kalay thlanglam ah doawknak a tam zetih, ralhrang ralkap cun vanzam tiang hmangin Kalay thlanglam ih um mipi ralkap pawl an do. Kalay thlanglam ih ralhrang le mipi ralkap pawl doawknak hmunpi pawl cu Myintthar tiva tluan le Kalay Gangaw lamzin karlak pawl an si.