Ralhrang In Kalay Mipi Ralkap Sakhan An La – Sagaing ramthen kalaymyo peng thlanglam Lay-in Suh khua kiangih Kalay mipi ralkap sakhan pakhat cu Ralhrang ralkap mipum 50 hrawngin August 16 zingah an luhcilh ih, mipi ralkap sakhan an urkang sak thluh tin Kalay PDF tatyin pahnihnak cun thu an suah.
Ralhrang ralkap pawl cun Lay-in Suh khua sungin inn pahnih an urkang sak ih, inn pahnih an urkang sakmi cu mipi ralkap pawl rawl pe theutu an si. Dalan pakhat cun ralhrang pawl a hruai vivo ih, inn an urkang dingmi khal a sim vivo.
Zinglam nazi 6 hrawngah ralhrang pawl cun Lay-in Suh khua kiangih mipi ralkap sakhan pakhat an luhcilh hnuah an siatsak thluh ih, an urkang. Mipi ralkap pawl cu an rak tlan thluh man nan, an tantami kuttuah meithal zunkhat, phone pakhat le thildang neuhneuh cu ralhrang pawlin an laksak.
Ralhrang pawl cun mipi sakhan kiangih um lo hnatuan pahnih khal an kai ih, an kap that cih. Ralhrang pawlih kah thatmi lo hnatuan pahnih ih ruang cu khuami pawlin an la thei ih, an vuiliam. Mipi ralkap komkhawm cun ralhrang pawl an rak bawh nan, ralhrang pawl cu lamzin dangin Kalaymyo sungah an lut thei. Tu ah ralhrang in an sakhan an siatsakmi mipi ralkap UG pawl cu bom tul tuk an si tin Kalay PDF tatyin pahnihnak cun an tarlang.
Kalay Raltlan Hrang Ting 125 Tlun An Ngah – Sagaing ramthen Kalay peng sungih raltlan hrang Mizoram Aizawl khawpi ah sumpai hawlnak neih a si ih, ting 125 kyats lenglo an ngah thu tuanvo neitu lamin an sim.
Tawlreltu pawl cu MSU , NGo, MZI, MDM le PUMP pawl an si ih, Aizawl khawpi ah kalay peng sung raltlan hrang sumpai an khong. Hlathiam pawlin lamzin sirah hlasak in mipi an awi ih, an hmaiah raltlan hrang bomnak tangka peknak bawmte an ret. Thenkhat in raltlan bomnak hrang lamzin sukso vak pawl tangka an khong.
Kalay peng sung raltlan bomnak hrang July 29, August 6 le August 15 in Aizawl khawpi sung lamzinpi ah bomnak tangka an khong ih, a zaten ting 125 kyat lenglo an ngah. Tuitum cu kalay peng sungih raltlan hrang rori bomnak tangka an hawlsakmi a si.
Ralhrang ralkap in rampi thuneihnak an lak hnuah ramsung hmun tinkim ah buainak a um ih, kalay peng sung khalah doawknak a sosang. Cumi ruangah kalay peng sungah raltlan tampi an um.
Mizoram pawlkom siseh mipi khal Myanmar raltlan pawl zawnruat zettu an si ih, Mizoram ih Myanmar raltlan thawn 40 lenglo khal Mizoram cozah, NGO, YMA le kawhhran pawlin rawl an pe, an cawm ih theitawk an zoh. Tu ahcun Mizoram sungih Myanmar raltlan lawng siloin Kalay peng sungih raltlan hrang hrnag sumpai an hawlmi a si.
Ralhrang In Mino 7 An That – Sagaing ramthen Khin Oo myone Wankyi khua ih mino 7 pawl cu lo hnatuan dingin hramlak ah an feh ih, ralhrang pawl thawn an tonawk tikah ralhrang pawlin an kai ih, an kap that thluh.
Mino 7 pawl cu kum 14 in kum 22 karlak an si ih,August 14 zingah lo hnatuan dingin khua an suahsan. Lamzin ah ralhrang pawl thawn an tongaw ih ralhrang pawlin an kaih hnuah an kap that ih, lamzin sirah an ruang pawl an hlon men. Ralhrang ih thahmi pawl cu Kyaw Thu Hein ( kum 19 ), Zaw Hein ( kum 15 ), Min Ko ( kum 20 ),Min Ngi ( kum 14 ), Phyo Ngwe Soe ( kum 19 ), Naing Naing ( kum 22 ) le Thura Htun ( kum 21 ) pawl an si.
Khua mipi cun August 15 ni ah mino 7 pawl ih ruang an sar ih, an vuiliam cih. Ralhrang ralkap cun mino 7 an kah thatmi pawl kiangah meithal an ret hrim ih, PDF pawl an si tin thu an rak suah ve.
Ralhrang Gate An Urkang – Sagaing ramthen Inttaw myone Naba lanzung kiangih ralhrang gate pakhat cu August 16, zinglam nazi 10 hrawngah KIA le PDF tangtlang in an luhcilh ih, ralhrang gate an urkang tlunah ralhrang hrangih hnatuan vuanhtan 4 an kai.
Khuami pakhat cun “Inttaw ah KIA le PDF tangtlang in ralhrang an donak a rei thlang. Tuitum ih gate an urmi cu ralhrang pawl umnak a silo nan, ralhrang hnuai ih hnatuan pawl umnak a si. An kaihmi mi 4 khal ralhrang ralkap le palik an silo ih, vuanhtan hnatuan men an si.
“Curuangah KIA le PDF khalin thuhla kan suh thluh hnuah kaihmi 4 pawl kan thlahsal ding tin an sim zo. Ralhrang tuanpi le ralhrang hrangih hnatuan an si ruangah an kai. An theih duhmi thuhla an suh thluh ahcun an thlahsal ko ding,” tin a sim.
AA le Ralhrang Doawknak A Sosang – AA cun August 15 ni ah Rakhine ramkulh le Chin ramkulh sungih ralhrang thawn an doaknak ah ralhrang 37 an thi ih ralthuam 30 tlun kan laksak thei tin thu an rak suah. August 16 hkalah AA le ralhrang an do aw pehsal.
Rakhine ramkulh Maungttaw myone Waila tlawngah ralhrang ralkap le AA an do aw ih,zinglam nazi 8 in sun hnu tiang kiangkap mipi cun doawknak puak awn an thei. Doawknak ah ralhrang pawl cun ralthuampi le ralthuamte an hmang ciamco ih, a kiangih um mipi hrang puak awn ring tukin an thei ban.
Khuami pakhat cun “Kan khua thawn a hla aw deuh nan, puak awn phunphun kan thei ban. Khatlam ah ralhrang hmunpi pawlin ralthuampi an rak puak ciamco ih, zanlam nazi 4 hrawng tiang puak awn thei bantu khal an um. A hnu reilo ralhrang heilocpter pahnih an zam kan hmu ih, hnuailam an kah le kah lo cu kan thei lo. Tuitum an doawknak ah mithi an um le um lo kan thei hrih lo a si,” tin a sim.
Doawknak sosang ah AA siseh ralhrang lam khalin doawknak thuhla cipciar an suah hrih lo. Rakhine ramkulh sung ahcun August 13 le 14 ah nasaten an rak do aw zo ih, Chin ramkulh Paletwa peng sung ahcun hlaral do in an do aw ih, an doawk caan a rei zo.
Ralhrang In Russia Suak Datsi Lei An Tum – A tufang Myanmar ramsung hmun tinkim ah datsi daihawklonak a nasa tukih, hmun hrekkhat ahcun datsi zuar ding nei lo ruangah dawr khar tiang an um.
Datsi man lei ding a har tlunah datsi man a kai tukih, bike mawng thei lo, mawtaw mawng thei lo, mawtaw hmang thei lo tampi an um zo. Company pawlin ramdang ih datsi an lei man le Myanmar ih an zuar man a kaihawk lo ruangah la thei nawn lo an si tlangpi. Ziangahtile, Myanmar tangka man a tlak tuk ramdang ih datsi lei company pawl an buai thluh.
Ralhrang ralkap cun ramsung dollar buainak an kilkhawi thei lo ih, tu ahcun US tangka fangkhat khal Myanmar in thawng 2 tlun a si zo. Hivek cu Myanmar ram santhuanthu ah avei thlennak a si ih, ttum lam loin a kai deuhdeuh bet.
Hivekin rampi a buai tikah ralhrang ralkap cun ziangkim ah an rinsan lenglengmi Russia cu datsi thu ah dawr an tumih, Russia dawrtu dingah ralhrang cun pawlkom an din. Ziangtin ralhrang palai pawlin Russia an dawr ding timi cu felfei an phuang hrih lo. Tu ah pawlkom an dinfel ih, hotu ah ralbawi Ngio Saw an ret.
US In Nuclear Zohsinnak An Nei – Leitlun ram buainak phunphun ruangah US khal ralrin thupnak an nei ve ih, an ralthuam picang bik Nuclear a tha maw tin zohfelnak an nei. Zohfelnak an neih tikah buainak zianghman a um lo, a tha felfai tin US ralkap hmunpi cun thu an suah.
Tu ah US cun theitawkin Ukraine an bawm ringring lai ih, ralthuam an pe rero. Hivek ruangah Russia in duh vekin Ukraine an do thei phah ih, US parah Russia lam an thinheng tuk zo. A thok ah Russia in Nuclar bomb an rak salsuak rero nan, Ukraine an donak ah a takin ramdang tel an um lo ih, Russia lam khalin tutiang Nuclear an hmang hrih lo.
US in Ukraine an dinpi ringring tlunah Taiwan khal an dinpi ringring ih,anmai bomnak in zalenter an tum. Cutikah China lam an rak thinheng sosang tuk zo ih, raldo an man zo thu tiang an suah. Hivek ruangah US khal ralthuam zohfeknak nei an siko ding tin leitlun mithiam pawl cun an sim.
Russia le Ukraine buainak ah Russia cun Ukraine nisuahnak lam Donbas ramthen sung hmun tamsawn an luah vivo. Hivek ruangah Ukraine lam cangvaih dan an thlengih, Russia ralkap pawl tuar ding zawngin kan cangaih ve a ttul tin thu an suah. Tuitum ih Russia ralthuam retnak puak khal kanmai kahmi a si tin Ukraine lam cun an sim. Hivek a si tikah ram pahnih remawk ding cu a hla deuhdeuh ih, nasa sawn in an do vivo tum.
China in Taiwan ramri ah ralthuam an ret thepthep ih, cangvaih an man ringring. US cu ramdang buaitertu , ramdang buainak hmangin hlawknak rak tel tumtu men an si tin China cun US an mawhthluk. Taiwan khal US thulung menah cangvai luailo lo dingin China cun an sim.
Leave a Reply